ខេត្តសៀមរាប ៖ លោកលឹម គង់ មានអាយុ៥៧ឆ្នាំ មានស្រុកកំណើតនៅភូមិគោកបេង សង្កាត់គោកចក ក្រុងសៀមរាប ខេត្តសៀម បានចំណាយពេលអស់រយៈពេល១៥ឆ្នាំ…
ខេត្តសៀមរាប ៖ លោកលឹម គង់ មានអាយុ៥៧ឆ្នាំ មានស្រុកកំណើតនៅភូមិគោកបេង សង្កាត់គោកចក ក្រុងសៀមរាប ខេត្តសៀម បានចំណាយពេលអស់រយៈពេល១៥ឆ្នាំ ជាអ្នកជួសជុលប្រាសាទនៅក្នុងរមណីយដ្ឋានអង្គរបាត់ដំបង និងបន្ទាយមានជ័យរហូតក្លាយជាអ្នកជំនាញរៀបថ្ម តថ្ម ដែលទទួលបានការងារជាហូរហែ ហើយបានបង្រៀនដល់អ្នកជំនាន់ក្រោយ អំពីវិជ្ជាជីវៈជំនាញរបស់ខ្លួនទៀតផង ។
សព្វថ្ងៃលោកលឹម គង់ កំពុងបំពេញភារកិច្ចជាមេក្រុមមួយផ្នែកលើការជួសជុលប្រចាំការដ្ឋានប្រាសាទមេបុណ្យខាងលិចដែលជាគម្រោងសហប្រតិបត្តិការរវាងអាជ្ញាធរជាតិអប្សរា និងស្ថានទូតបារាំងប្រចាំកម្ពុជា ។ បើទោះបីមិនមែនជាអ្នកជំនាញដែលទទួលបានការអប់រំថ្នាក់បរិញ្ញាបត្រ ឬបណ្ឌិតជំនាញជួសជុលប្រាសាទក៏ពិតមែនក៏មេក្រុមជួសជុលប្រចាំការដ្ឋានប្រាសាទមេបុណ្យខាងលិចរូបនេះមានបទពិសោធន៍គ្រប់គ្រាន់ច្បាស់លាស់ក្នុងការតថ្ម រៀបថ្ម ដាប់ថ្ម លាយកាវ និងបង្រៀនកូនក្រុមអំពីការងារបានយ៉ាងល្អ ។
ក្នុងនាមជាអ្នកជួសជុលប្រាសាទដូនតាមួយរូបលោកគង់ បានបង្ហាញនូវឆន្ទៈ និងក្តីស្រឡាញ់ចំពោះការងារថា «ខ្ញុំសប្បាយចិត្តណាស់ ខ្ញុំចង់ធ្វើតែប្រាសាទមួយជីវិតខ្ញុំ នៅតែចង់បន្តធ្វើការងារនេះរហូតឱ្យតែនៅមានកម្លាំង ព្រោះខ្ញុំចង់ឱ្យបេតិកភណ្ឌពិភពលោកកាន់តែរីកចម្រើនតទៅមុខ កុំឱ្យរលុះបាក់បែក ។ ខ្ញុំសោកស្តាយណាស់ ដែលប្រាសាទខ្មែរជាច្រើនខូចខាតខ្ទេចខ្ទាំ ខ្ញុំចង់ជួសជុលថ្មីឱ្យបានល្អដូចបុរាណវិញ តាមសមត្ថភាព និងការចេះដឹងរបស់ខ្ញុំ» ។ លោកជាមេក្រុមបានបញ្ជាក់ដែរថា បទពិសោធន៍ការងារជាអ្នកជួសជុលប្រាសាទដំបូងឡើយ លោកបានធ្វើការជាមួយអ្នកជំនាញចិនដែលជួសជុលនៅប្រាសាទចៅសាយទេវតា និងប្រាសាទតាកែវ ។
ក្រោយចប់គម្រោងលោកក៏បានបន្តការងារជាមួយអ្នកជំនាញឥណ្ឌានៅប្រាសាទតាព្រហ្ម និងជាមួយអ្នកជំនាញខ្មែរដែលធ្វើការជួសជុលនៅប្រាសាទបាសែត ប្រាសាទនៅអូរជីក និងនៅបន្ទាយឆ្មារ ។ ការអនុវត្តជាប្រចាំនេះហើយដែលធ្វើឱ្យលោកអាចស្គាល់ពីគុណភាពថ្ម រៀបថ្មឱ្យជាប់មាំទាំ ជិតល្អដូចបុរាណ ហើយមានសមត្ថភាពអាចសង្គ្រោះប្រាសាទបុរាណបាន ។
លោកក៏សង្ឃឹមថា មិនយូរទេប្រាសាទក្នុងប្រទេសខ្មែរនឹងទទួលបានការអភិរក្សជួសជុល ឱ្យរួចផុតពីហានិភ័យ ហើយសូមឱ្យកូនខ្មែរទាំងអស់ចេះស្រឡាញ់ការពារថែរក្សាប្រាសាទដូនតាជាបេតិកភណ្ឌពិភពលោកទាំងអស់គ្នា ។ ចំពោះលោកវិញលោកមានមោទនភាពណាស់ ហើយប្តេជ្ញានឹងបន្តការងារនេះរហូត ព្រោះបានបន្សល់នូវស្នាដៃថ្មីលើវត្ថុបុរាណទុកឱ្យកូនចៅជំនាន់ក្រោយបានស្គាល់ ៕
ចែករំលែកព័តមាននេះ