ខេត្តមណ្ឌលគិរី ៖ ប្រភពទឹកដ៏សំខាន់ចំនួនបីសម្រាប់ផ្គត់ផ្គង់ប្រជាពលរដ្ឋរស់នៅក្នុងក្រុងសែនមនោរម្យ កំពុងប្រឈមបញ្ហារីងស្ងួតក្រោយអាកាសធាតុបន្តអូសបណ្តាយ មិនមានភ្ញៀងធ្លាក់។
កាលពីពេលថ្មីៗកន្លងទៅ អាជ្ញាធរខេត្តមណ្ឌលគិរីបានចុះពិនិត្យស្ថានភាពជាក់ស្តែង ព្រមទាំងរៀបចំគម្រោងផែនការបង្ការនៃការខ្វះខាតទឹកប្រើប្រាស់ប្រចាំថ្ងៃ ខណៈប្រភពទឹក៣កន្លែងគឺ បឹងទំនប់លើ, បឹងទំនប់ក្រោម និងអាងស្តុបទឹកមុខសណ្ឋាគារមណ្ឌលគិរី កំពុងរីងបន្តិចម្តងៗ។
លោកស្វាយ សំអ៊ាង អភិបាលខេត្តមណ្ឌលគិរី បានឲ្យដឹងនៅថ្ងៃទី៨ ឧសភា ថា ទឹកទំនប់លើ ក្រោយការចុះទៅពិនិត្យជាក់ស្តែងរបស់លោកកាលពីពេលថ្មីៗកន្លងទៅនេះ គឺអាចវាយតម្លៃបានថា វាអាចនឹងរីងពិតមែន តែនៅពុំទាន់រីងអស់ទាំងស្រុងនោះទេ។ លោកអភិបាលខេត្តថា នៅក្នុងដំណោះស្រាយ លោកបានឲ្យខាងទឹកស្អាតផ្អាកបូមទឹកទំនប់លើ ជាប៉ុណ្ណោះអាសន្នបានន័យថា បើនៅតែបូមទៀត វាអាចនិងរីងឆាប់ៗ។
លោកស្វាយ សំអ៊ាង បានបន្តថា ចំណែកទំនប់ក្រោមវិញ អាចនៅប្រើប្រាស់បានខ្ទង់កន្លះខែទៀតបើគ្មានភ្លៀងធ្លាក់នោះទេ ប៉ុន្តែប្រសិនបើនៅប្រើអាចនិងរីងដូចទំនប់លើដែរ។
លោកអភិបាលខេត្តបានដាក់ផែនការ ទី១-គឺរៀបចំទុយោចល័តបូមទឹកពីទំនប់មុខសណ្ឋាគារមណ្ឌលគិរី និងទឹកទំនប់ក្រោម ផ្គត់ផ្គង់ប្រជាជនសិន និងទី២-ចំពោះទំនប់លើរដ្ឋបាលសាលាខេត្ត មានគម្រោងស្តារឲ្យជ្រៅឡើងវិញ ដីបាតបឹងដែលរីងហើយនោះ ។ លោកបញ្ជាក់ថា ទីតាំងប្រភពទឹកចំនួនបីកន្លែងដែលសម្រាប់ផ្គត់ផ្គង់ដល់ប្រជាជនក្នុងក្រុងសែនមនោរម្យ នឹងធ្វើការបួមចល័តទៅមក បង្កានូវការខ្វះទឹកដោយសារតែគ្រោះរាំងស្ងួត។
លោក សូ សុណ្ណារិទ្ឋ ប្រធានរដ្ឋាករទឹកខេត្តមណ្ឌលគិរី បានឲ្យដឹងថា សព្វថ្ងៃអង្គភាពទឹកស្អាតក្រុងសែមនោរម្យ មានអតិថិជនទទួលសេវាទឹកស្អាតចំនួន១១៦០គ្រួសារ ស្មើរ៩ភូមិ មាន៣សង្កាត់។
លោក សុណ្ណា រិទ្ឋ បានបញ្ជាក់ថា«ក្នុងករណីប្រភពដែលកំពុងផ្គត់ផ្គង់ទឹកនៅក្រុងសែមនោរម្យ ត្រូវរីងស្ងួត អង្គភាពទឹកស្អាតបានត្រៀមប្រភពទឹកពីរកន្លែងបន្ថែមទៀត ដែលនៅជាយក្រុងដើម្បីបញ្ជៀសពីបញ្ហាខ្វះខាតទឹក ។ ប្រភពទឹកដែលត្រៀមសម្រាប់បន្តផ្គត់ផ្គង់ដល់អ្នករស់នៅក្រុងសែមនោមរម្យ ទី១-គឺអូរបម្លែង មានចម្ងាយពីប្រភពទឹកចាស់ជាង៣គីឡូម៉ែត្រ ចំណែកប្រភពទឹកទី២-គឺទឹកអូរទេរ ដែលមានប្រភពទឹកធំ តែមានចម្ងាយពីប្រភពទឹកចាស់៩គីឡូម៉ែត្រ»។
ថ្វីដ្បិតក្រុងសែនមនោរម្យមានប្រភពទឹកសម្រាប់ផ្គត់ផ្គង់គ្រប់គ្រាន់ក៏ដោយ លោក សុណ្ណា រិទ្ឋ បានសំណូមពរដល់ប្រជាពលរដ្ឋចូលរួមប្រើប្រាស់ទឹកដោយសន្សំសំចៃ ព្រោះឆ្នាំនេះប្រទេសកម្ពុជានឹងមានគ្រោះរាំងស្ងួតអូសបន្លាយរយៈពេលយូរ៕
ចែករំលែកព័តមាននេះ