អ្នកខ្លះព្រោះតែចង់បានអារម្មណ៍ស្រស់ថ្លា សប្បាយចិត្តក៏ដើរលំហែកាយនៅតាមតំបន់រមណីយដ្ឋានផ្សេងៗមាននៅតាមឆ្នេរសមុទ្រ តាមព្រៃភ្នំ តាមទីផ្សារជាដើម គឺធ្វើយ៉ាងណាដើម្បីឲ្យខ្លួនបានសប្បាយ បានត្រជាក់ចិត្តរួចផុតអំពីគំនរភ្លើង គឺសេចក្តីទុក្ខសោក គ្រោះវិបត្តិនានា ។
ទោះជាយ៉ាងណាការដើរលំហែទាំងអស់នេះមិនអាចឱ្យយើងបានធូរស្រាល ស្រាកស្រាន្តអំពីសេចក្តីទុក្ខសោកទាំងស្រុងបានទេ គ្រាន់តែអាចបានធូរស្រាលអំពីសេចក្តីទុក្ខសោកខ្លះ ឬក៏បានមួយខណៈប៉ុណ្ណោះ សេចក្តីទុក្ខក៏វិលមកចូលជ្រៀតវិញដដែល ប្រៀបដូចថ្នាំស្ពឹក ដែលគេចាក់ដើម្បីកុំឲ្យឈឺក្នុងរយៈពេលខ្លីត្រឹមតែ១ម៉ោង ឬ២ម៉ោងប៉ុណ្ណោះ រួចក៏ត្រឡប់ឈឺវិញដដែល ។
ដូចនេះការដើរកម្សាន្តនៅតាមទីកន្លែងនានាមិនមែនជាដំណោះស្រាយធ្វើឲ្យធូរស្រាលត្រជាក់ចិត្តរហូតបានឡើយ មានតែការធ្វើទានរក្សាសីលចម្រើនមេត្តា ភាវនាប៉ុណ្ណោះទើបបានសុខត្រជាក់ចិត្តយូរអង្វែង ព្រោះអំពើល្អនេះអាចរំលត់នូវសភាពក្តៅក្រហាយក្នុងចិត្តបាន ។
តាមពិតទៅសេចក្តីសុខមិនមែននៅឆ្ងាយអំពីចិត្តយើងទេ ឯសេចក្តីទុក្ខក៏នៅក្នុងចិត្តយើងនេះ ដូច្នេះការត្រាច់ទៅកាន់ទីណាក៏ដោយក៏មានចិត្តរួមដំណើរទៅជាមួយដែរ បើយើងមានបញ្ញាក៏អាចរំលត់សេចក្តីទុក្ខបាន ។
ចែករំលែកព័តមាននេះ