ឧក្រិដ្ឋជនម្នាក់បានដកកាំភ្លើងបាញ់ប្រហារទៅលើបុរសម្នាក់ ហើយបុរសនោះក៏បានដួលស្លាប់ នៅតាមដងផ្លូវក្នុងខេត្តព្រះសីហនុ ។ នេះមិនមែនជាឈុតឆាកបាញ់ប្រហារនៅក្នុងខ្សែភាពយន្តចិនហុងកុងទេ ។ ប៉ុន្តែវាជាហេតុការណ៍បាញ់សម្លាប់កណ្តាលថ្ងៃត្រង់ ដែលកើតមានពិតនៅលើទឹកដីកម្ពុជា បន្ទាប់ពីមានការចូលមកយ៉ាងច្រើននៃជនជាតិចិនមកទេសចរណ៍ មករកស៊ីមកធ្វើការ…
ឧក្រិដ្ឋជនម្នាក់បានដកកាំភ្លើងបាញ់ប្រហារទៅលើបុរសម្នាក់ ហើយបុរសនោះក៏បានដួលស្លាប់ នៅតាមដងផ្លូវក្នុងខេត្តព្រះសីហនុ ។ នេះមិនមែនជាឈុតឆាកបាញ់ប្រហារនៅក្នុងខ្សែភាពយន្តចិនហុងកុងទេ ។ ប៉ុន្តែវាជាហេតុការណ៍បាញ់សម្លាប់កណ្តាលថ្ងៃត្រង់ ដែលកើតមានពិតនៅលើទឹកដីកម្ពុជា បន្ទាប់ពីមានការចូលមកយ៉ាងច្រើននៃជនជាតិចិនមកទេសចរណ៍ មករកស៊ីមកធ្វើការ និងមករស់នៅក្នុងប្រទេសកម្ពុជា ។
មានករណីផ្ទុះអាវុធមួយបានកើតមាន កាលពីរសៀលថ្ងៃទី០៦ ខែឧសភា ដែលគេយល់ថា ការបាញ់សម្លាប់គ្នារវាងជនជាតិចិន និងជនជាតិចិនដូចគ្នា នៅទីរួមខេត្តព្រះសីហនុដែលជាទឹកដីកម្ពុជា មានវត្តមានជនជាតិចិនច្រើនជាងគេ ក្នុងចំណោមខេត្តទាំង២៤របស់កម្ពុជា ។
ភ្លាមៗបន្ទាប់ពីនោះអាជ្ញាធរបានឃាត់ខ្លួនជនជាតិចិនពីរនាក់ បើទោះបីជារហូតមកទល់ពេលនេះគេមិនទាន់អោយដឹងពីមូលហេតុនៃអំពើឃាតកម្មដ៏សាហាវនោះក៏ដោយ ។ អំពើឃាតកម្មមួយនោះទាក់ទាញការចាប់អារម្មណ៍ខ្លាំងពីសំណាក់ប្រជាជនកម្ពុជាដែលកាន់តែមានការភ័យខ្លាច ចំពោះសន្តិសុខនៅក្នុងខេត្តព្រះសីហនុ បន្ទាប់ពីមានការចូលមកកាន់តែច្រើននៃជនជាតិចិន និងការបើកកាស៊ីណូកាន់តែច្រើននៅទីនោះ ។
សេចក្តីរាយការណ៍ព័ត៌មានដែលដាក់ផ្សាយបន្តទៀតតាមហ្វេសប៊ុកបានទទួលការអាននិងshare យ៉ាងច្រើនបំផុត បើប្រៀបធៀបនឹងសេចក្តីរាយការណ៍ព័ត៌មានផ្សេងៗទៀត ។ការបាញ់សម្លាប់មនុស្សកណ្តាលថ្ងៃត្រង់ គឺមានន័យថា ជនជាតិចិនទាំងនោះមិនខ្លាចរអាសមត្ថកិច្ចកម្ពុជា ហើយវាធ្វើអោយខេត្តព្រះសីហនុមានសន្តិសុខមិនរឹងមាំជាទីកក់ក្តៅសម្រាប់ប្រជាជនកម្ពុជារស់នៅ និងធ្វើដំណើរទៅកម្សាន្ត ។ខណៈពេលដែលកម្ពុជាត្រូវការការវនិយោគចិនកាន់តែច្រើននោះ វាមិនមានន័យថាកម្ពុជាត្រូវលះបង់សន្តិសុខ និងសេចក្តីសុខរបស់ប្រជាជន ដើម្បីប្រាក់ដុល្លារនោះឡើយ ។
ក្នុងន័យនេះ ការរឹតបន្តឹងសន្តិសុខនៅខេត្តព្រះសីហនុ គឺជារឿងដែលត្រូវធ្វើបន្ទាន់ បំផុតដើម្បីធានាថា ជនជាតិចិនទាំងអស់ដែលមករស់នៅ និងមករស៊ីនៅក្នុងប្រទេសកម្ពុជាត្រូវតែគោរពច្បាប់កម្ពុជា ហើយមិនត្រូវផ្តល់ការរំខានណាមួយដល់ប្រជាជនកម្ពុជានោះឡើយ ។ខណៈដែលជនជាតិចិនដែលមករកស៊ីនៅកម្ពុជាភាគច្រើនបានចូលរួមចំណែកធ្វើអោយសេដ្ឋកិច្ចកម្ពុជាមានការរីកចម្រើននោះជនជាតិចិនមួយក្តាប់តូចបានប្រព្រឹត្តអំពើផ្តេសផ្តាសដូចជា ករណីឃាតកម្ម កាលពីថ្ងៃទី៦ ខែឧសភា ការចាប់ជម្រិតតាមអ៊ីនធើណិត អំពើប៉េស្យាចារ្យជាដើម ។ ជនជាតិចិនមួយក្តាប់តូចនេះ បានធ្វើអោយមានចំណាប់អារម្មណ៍មិនល្អ ចំពោះជនជាតិចិនជាទូទៅនៅកម្ពុជា ក្នុងចំណោមសាធារជនកម្ពុជា ។
ការទប់ស្កាត់ និងបង្ក្រាបមិនអោយជនជាតិចិនមួយក្តាប់តូចបង្កព្យុះភ្លៀងនៅកម្ពុជានឹងមិនត្រឹមតែធ្វើអោយប្រជាជនកម្ពុជាមានអារម្មណ៍ស្ងប់ស្ងាត់ និងសន្តិសុខនៅក្នុងការរស់នៅទេ ប៉ុន្តែវាក៏ផ្តល់ការធានាដល់វិនិយោគិនចិនល្អៗ និងវិនិយោគិនបរទេសផ្សេងទៀតទុកចិត្តនៅក្នុងការរមករកស៊ីនៅក្នុងប្រទេសកម្ពុជាផងដែរ ។ផ្ទុយមកវិញបើសិនជាអំពើឃាតកម្មកើតមានញឹកញាប់នៅកម្ពុជានោះវានឹងធ្វើអោយកម្ពុជាក្លាយជាកន្លែងដែលមិនមានសុវត្ថិភាព ហើយជាលទ្ធផលវានឹងរុញច្រានវិនិយោគិន និងភ្ញៀវទេសចរណ៍បរទេសចេញពីប្រទេសកម្ពុជា ។ រឿងរ៉ាវអាក្រក់ៗទាំងអស់នេះនឹងធ្វើអោយគោលនយោបាយរបស់រដ្ឋាភិបាលនៅក្នុងការលើកកម្ពស់បរិយោកាសវិនិយោគ និងកំណើនសេដ្ឋកិច្ចជួបប្រទះការលំបាក ។
ជាមួយនឹងផលវិបាកបែបនេះ វាចាំបាច់បំផុតដែលអាជ្ញាធរកម្ពុជាត្រូវចាត់វិធានការណ៍ ដ៏តឹងរឹងបំផុត ដើម្បីរឹតបន្តឹងសន្តិសុខនៅខេត្តព្រះសីហនុ ជាពិសេស និងកន្លែងផ្សេងៗទៀតនៅក្នុងប្រទេសកម្ពុជា ដើម្បីកុំអោយជនជាតិចិនមួយក្តាប់តូច ធ្វើអោយខូចឈ្មោះកម្ពុជាជាកន្លែងដែលមានសន្តិសុខ និងសន្តិភាពសម្រាប់ការវិនិយោគ និងដើម្បីអោយប្រជាជននៅខេត្តព្រះសីហនុអាចរស់នៅបានសុខដូចមុនពេលដែលការហូរចូលជនជាតិចិនយ៉ាងគំហុកទៅក្នុងខេត្តជាប់សមុទ្រមួយនេះ ៕
ចែករំលែកព័តមាននេះ