រាជធានីភ្នំពេញ ៖ បុរសចិត្តស្រាលម្នាក់ត្រូវបាននគរបាលឃាត់ខ្លួននាំយកទៅសាកសួរបន្ទាប់ពីប្រើមេសោ១វាយទៅលើបុរសម្នាក់ទៀត ដែលជាបងថ្លៃ បណ្ដាលឲ្យរងរបួសធ្ងន់សន្លប់ស្ដូកស្ដឹង ព្រោះតែខឹង និងបងថ្លៃផឹកស្រវឹង ហើយរករឿងបង្កហិង្សាក្នុងគ្រួសារ ។ បន្ទាប់មកដោយសារតែខ្លាចបងថ្លៃស្លាប់ក៏បានប្រញាប់ប្រញាល់បញ្ជូនទៅកាន់គ្លីនិកឯកជន ដើម្បីសង្គ្រោះបន្ទាន់ ប៉ុន្តែពេលទៅដល់គ្រូពេទ្យមិនហ៊ានមើល ព្រោះរបួសធ្ងន់ទើបបញ្ជូនបន្តទៅកាន់មន្ទីរពេទ្យព្រះកុសុមៈវិញ ។
បេតុការណ៍នោះបានកើតឡើងកាលពីវេលាម៉ោង៦ព្រឹក ថ្ងៃទី០៧ ខែឧសភា ឆ្នាំ២០១៩ នៅក្នុងភូមិព្រៃសាលា សង្កាត់កាកាប២ ខណ្ឌពោធិសែនជ័យ រាជធានីភ្នំពេញ ។ បុរសដែលត្រូវនគរបាលឃាត់ខ្លួននោះឈ្មោះ ចិន វិចិត្រ អាយុ៣៥ឆ្នាំ ស្នាក់នៅផ្ទះកើតហេតុខាងលើ ។ ចំណែកបុរសជាបងថ្លៃដែលជាជនរងគ្រោះឈ្មោះ ធីម សៀងហ៊ីម អាយុ៣៥ឆ្នាំ ស្នាក់នៅផ្ទះកើតហេតុជាមួយគ្នា ។
តាមប្រភពព័ត៌មានបានឲ្យដឹងថា កាលពីវេលាយប់ថ្ងៃទី០៦ ខែឧសភា ឆ្នាំ២០១៩ បុរសដែលជាបងថ្លៃបានដើរផឹកស៊ីរហូតដល់ស្រវឹង ទើបត្រឡប់ចូលផ្ទះ បន្ទាប់មកបានបង្ករឿងនៅក្នុងគ្រួសារ បណ្ដាលឲ្យមានទំនាស់ពាក្យសម្តីគ្នាជាមួយប្រពន្ធ ។ ខណៈនោះបុរសជាប្អូនថ្លៃខឹងយ៉ាងខ្លាំង តែមិនបានមាត់.កអ្វីទេ និងបានចាកចេញពីផ្ទះបាត់ ចំណែកនគរបាលបានសម្របសម្រួលទើបមានការស្ងប់ស្ងាត់ហើយក៏បានចូលដេករៀងៗខ្លួនដែរ ។
ប្រភពដដែលបានបន្តថា រហូតដល់វេលាម៉ោង៦ព្រឹកថ្ងៃទី០៧ ទើបបុរសជាប្អូនថ្លៃវិលត្រឡប់ចូលទៅផ្ទះវិញបើកទ្វារផ្ទះរួចទាញបានមេសោវាយទៅលើបងថ្លៃ បណ្តាលឲ្យរងរបួសធ្ងន់ធ្ងរសន្លប់ស្តូកស្ដឹង ។ បង្កការភ្ញាក់ផ្អើលឆោឡោ ហើយបានសែងជនរងគ្រោះទៅកាន់គ្លីនិក ដើម្បីសង្គ្រោះបន្ទាន់ ប៉ុន្តែដោយសារតែរបួសធ្ងន់ពេកគ្រូពេទ្យមិនហ៊ានទទួលមើលទើបក្រុមគ្រួសារ ហៅរថយន្តសង្គ្រោះដឹកបញ្ជូនជនរងគ្រោះទៅមន្ទីរពេទ្យព្រះកុសុមៈវិញ ៕
ចែករំលែកព័តមាននេះ