រាជធានីភ្នំពេញ ៖ តើមានបងប្អូនណាខ្លះ បានទៅទិញដីឡូត៍ពីក្រុមហ៊ុនពុះដីឡូត៍មួយ ដែលមានស្លាកយីហោ«រៀលប្រជេកប៊ីហ្សនេសឯ.ក»ដែរទេ ? ហើយក្រោយពេលទិញរួចហើយ ទាំងអ្នកដែលទិញឲ្យលុយគ្រប់ចំនួននិងអ្នកដែលទិញបង់រំលស់នោះ ដែលធ្លាប់ទៅមើលដី ដើម្បីឲ្យមានភាពប្រាកដប្រជាថា…
រាជធានីភ្នំពេញ ៖ តើមានបងប្អូនណាខ្លះ បានទៅទិញដីឡូត៍ពីក្រុមហ៊ុនពុះដីឡូត៍មួយ ដែលមានស្លាកយីហោ«រៀលប្រជេកប៊ីហ្សនេសឯ.ក»ដែរទេ ? ហើយក្រោយពេលទិញរួចហើយ ទាំងអ្នកដែលទិញឲ្យលុយគ្រប់ចំនួននិងអ្នកដែលទិញបង់រំលស់នោះ ដែលធ្លាប់ទៅមើលដី ដើម្បីឲ្យមានភាពប្រាកដប្រជាថា ដីនោះ គឺជាដីរបស់ខ្លួនពិតប្រាកដដែរទេ ។ ព្រោះពេលនេះ ក្រុមហ៊ុនពុះដីឡូត៍ខាងលើកំពុងទទួលរងបណ្ដឹងពីសំណាក់អតិថិជនរបស់ខ្លួន ដែលបានចោទប្រកាន់ថា ជាក្រុមហ៊ុនបោកប្រាស់លក់ដីខ្យល់គាត់បង់លុយរាល់ខែ ទីបំផុតមិនដឹងថា ដីដែលគាត់ទិញនោះនៅឯណាឡើយ ។
ជាក់ស្ដែង កាលពីល្ងាចថ្ងៃទី០៦ ឧសភា មានអតិថិជនម្នាក់ ដែលចាញ់បោកក្រុមហ៊ុនមួយនេះ បានទៅរឹបអូសយកសម្ភារការិយាល័យ នៅក្នុងទីស្នាក់ការលក់ដីឡូត៍របស់ក្រុមហ៊ុន ដែលមានទីតាំងស្ថិតនៅផ្ទះលេខ៣៦ មហាវិថីឈ្នះឈ្នះ ក្នុងភូមិស្រែរាជ្ជៈ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញដើម្បីកាត់លុយ ។ ប៉ុន្តែមិនត្រឹមតែយកមិនបានប៉ុណ្ណោះទេ ត្រូវបានប្រធានក្រុមហ៊ុនរារាំង បណ្ដាលឲ្យមាន ការទាស់ពាក្យសម្ដីគ្នាយ៉ាងបែកផ្សែង រវាងអិថិជនរងគ្រោះ និងបុគ្គលដែលបើកក្រុមហ៊ុនលក់ដីខ្យល់នេះរហូតមានការអន្តរាគមន៍ពីនគរបាលនិងអាជ្ញាធរសង្កាត់ ទើបស្ងប់ស្ងាត់ ។
លោក សាន មឿន អាយុ៤៥ឆ្នាំ ដែលជាជនរងគ្រោះចំណាយលុយទិញប៉ះចំដីខ្យល់ពីក្រុមហ៊ុននេះ បានឲ្យដឹងថា គាត់បានទិញដីបង់រំលស់ពីក្រុមហ៊ុន«រៀល ប្រជេក ប៊ីហ្សនេស ឯ.ក»ខាងលើ ដែលមានឈ្មោះ លី វ៉ាឌីណា មានទីលំនៅក្នុងភូមិសង្កាត់កើតហេតុ ជាតំណាង។ ដោយទិញក្នុង១ឡូត៍ តម្លៃ៩,៨០០ដុល្លារតាមរយៈការបង់រំលស់ក្នុង១ខែ២០០ដុល្លារ ហើយគិតរហូតមកទល់ពេលនេះ គាត់បង់បានចំនួន២៥០០ដុល្លារហើយ ។ ប៉ុន្តែអ្វីដែលជាការហួសចិត្តបំផុតនោះ គឺក្រុមហ៊ុននេះ រំលោភលើទំនុកចិត្តគ្មានដីសម្រាប់ឲ្យរូបគាត់ឡើយ នៅពេលគាត់សួរនាំរកដីដែលគាត់ទិញ បែរជាចង្អុលខុសទីតាំងដែលគាត់មើលដំបូងចេះតែដើរចង្អុលដីគេដីឯងផ្ដេសផ្ដាស គ្មានការប្រាកដប្រជាទេ មិនតែប៉ុណ្ណោះបានឆ្លើយដោះសារពង្វាងដានម្ដងចេះម្ដងចោះ កុហកមិនចេះចប់ឡើយ ។
ប្រភពដដែលបានបន្តថា បន្ទាប់ពីការទាល់តម្រិះភាគីក្រុមហ៊ុនមួយនេះ បានសន្យាប្រគល់ឲ្យលុយគាត់វិញ ពេលនោះ គាត់ក៏បានយល់ព្រមដែរ ដោយនឹកឃើញថា ប្រសើរជាងមិនបាន ។ បន្ទាប់មក បានធ្វើកិច្ចសន្យាមួយ ជាមួយគ្នាដោយភាគីក្រុមហ៊ុននេះ បានសន្យាថា បើមិនបានប្រគល់លុយគ្រប់ចំនួន តាមកិច្ចសន្យាទេនោះ គឺទោះបីជារូបគាត់ដែលជាអ្នកទិញដីចង់រុះរើយកទីស្នាក់ការ ឬចង់ចង់អ្វីក៏យកទៅ ។លុះដល់ថ្ងៃកំណត់ក្រុមហ៊ុននេះ មិនបានគោរពកិច្ចសន្យាមិនព្រមប្រគល់លុយឲ្យវិញឡើយ ថែមទាំងប្រើពាក្យសម្ដីទ្រគោះបោះបោក កោងឈ្លើយថែមទៀត ទើបគាត់ធ្វើតាមកិច្ចសន្យា គឺបានរើយកសម្ភារការិយាល័យ នៅក្នុងទីស្នាក់ការ ដើម្បីកាត់លុយ។
ប៉ុន្តែពេលនោះ ត្រូវបានក្រុមអ្នកលក់ដីខ្យល់ទាំងនោះ ធ្វើការរារាំងមិនព្រមឲ្យ ទើបមានការទាស់ពាក្យសម្ដីគ្នាបង្កការភ្ញាក់ផ្អើលដល់នគរបាល និងអាជ្ញាធរសង្កាត់ចុះទៅសម្របសម្រួល ដោយប្រាប់ឲ្យស្ងប់ស្ងាត់រងចាំការដោះស្រាយគ្នានៅពេលក្រោយ ។
ទាក់ទិនទៅនឹងការចោទប្រកាន់ខាងលើ ខាងភាគីក្រុមហ៊ុនមួយនេះ ដែលមានលោក ឈ្មោះ លី វ៉ាឌីណា ជាតំណាង មិនបានធ្វើការបំភ្លឺឲ្យដឹងថា តើរឿងនេះ ពិតឬមិនពិតនោះឡើយ ហើយដីដែលគាត់លក់ឲ្យទៅបុរសរងគ្រោះនោះនៅត្រង់ណាដែរ ។
ទោះបីជាបែបណា កន្លងមក ក៏មានអ្នកទៅធ្វើការតវ៉ាជាមួយក្រុមហ៊ុននេះ ជាបន្តបន្ទាប់និងចោទថាក្រុមហ៊ុនលក់ដីខ្យល់ឲ្យ ព្រមទាំងបានឈ្លោះប្រែកគ្នាបែបនេះមកហើយដែរ ហើយនេះគឺជាសារមួយសម្រាប់បងប្អូនទូទៅ មុននិងទិញដីត្រូវពិនិត្យមើលប្រវត្តិដី និងឯកសារពាក់ព័ន្ធរួម និងទីតាំងដីឲ្យបានច្បាស់លាស់ជាមុនសិន ចៀសវាងទិញប៉ះចំដីខ្យល់បែបនេះ ។
ចែករំលែកព័តមាននេះ