រាជធានីភ្នំពេញ ៖ ជន៣នាក់កោរសក់គ្រងស្បង់ជីវរ រួមទាំងអ្នករត់រ៉ឺម៉ូតូម្នាក់ត្រូវបានកម្លាំងនគរបាលប៉ុស្តិ៍គោកឃ្លាងឃាត់ខ្លួន ខណៈពេលដែលពួកគេក្លែងជាសង្ឃចេញដើរបិណ្ឌបាតនៅតាមទីប្រជុំជន ។ ការឃាត់ខ្លួនបុគ្គលិកក្លែងជាសង្ឃនេះ កាលពីម៉ោង០៥និង៣០នាទីព្រឹកថ្ងៃទី០៧ ឧសភា ឆ្នាំ២០១៩ នៅតាមដងផ្លូវសម្តេចជាស៊ីម ក្នុងភូមិក្រុងថ្មី សង្កាត់គោកឃ្លាង ខណ្ឌសែនសុខ ។
ជនដែលត្រូវឃាត់ខ្លួន១ – ឈ្មោះជា ផាន់នី អាយុ២៨ឆ្នាំ ២-ឈ្មោះជិន សាមុន អាយុ៣៩ឆ្នាំ ៣-ឈ្មោះ វៃ ស៊ីណា អាយុ៣២ឆ្នាំ ។ អ្នកទាំង៣នាក់បានកោរសក់គ្រងស្បង់ក្លែងបន្លំជាសង្ឃស្នាក់នៅបន្ទប់ជួល ក្នុងភូមិត្រពាំងស្វាយ សង្កាត់គោកឃ្លាង ខណ្ឌសែនសុខ និងមានស្រុកកំណើតភូមិស្រម៉រ ឃុំត្រពាំងស្រែ ស្រុកមេសាង ខេត្តព្រវែង ។ ដោយឡែកអ្នករត់រ៉ឺម៉កឈ្មោះសួស ពិសិទ្ធ អាយុ២០ឆ្នាំ ស្នាក់នៅម្តុំចំការដូង ។
តាមនគរបាលខណ្ឌសែនសុខបានអោយដឹងថា នៅមុនពេលកើតហេតុមានប្រជាពលរដ្ឋរាយការណ៍ពីជនមួយក្រុមបានក្លែងជាសង្ឃដើរបិណ្ឌបង្កអោយប៉ះពាល់ដល់ព្រះពុទ្ធសាសនា។ នៅពេលទទួលបានព័ត៌មានសមត្ថកិច្ចនគរបាលប៉ុស្តិ៍ក៏បានចុះទៅគោលដៅក៏បានប្រទះឃើញជនសង្ស័យ៤នាក់ជិះរ៉ឺម៉ក់ម៉ូតូ ហើយឃាត់ខ្លួនត្រួតពិនិត្យមានស្បង់ជីវរ ថង់សាក់ និងបាតព្រមទាំងសម្ភារសង្ឃមួយចំនួនទៀតក៏បានឃាត់ខ្លួនតែម្តង ។
តាមចម្លើយសារភាពជនទាំង៣នាក់នោះបានអោយដឹងថា ខ្លួនបានទិញស្បង់ជីវរនៅស្រុក និងកោរសក់ក្លែងបន្លំជាព្រះសង្ឃដើរបិណ្ឌបាតនៅជាយក្រុង និងនៅតាមផ្សារនានា ដើម្បីរកប្រាក់រយៈពេលប្រមាណ៣ថ្ងៃមកហើយ នៅក្នុងមួយថ្ងៃម្នាក់បានប្រមាណ៣ទៅ៤ម៉ឺនរៀល ។ កន្លងមកពួកគេធ្លាប់ធ្វើជាកម្មករសំណង់ដែរ តែហត់នឿយណាស់ និងម្យ៉ាងទៀតខែក្តៅផង មានតែក្លែងជាសង្ឃទើបរកប្រាក់បានស្រួល ។
តាមជនសង្ស័យឈ្មោះវៃ ស៊ីណា បានអោយដឹងថា នៅមុនពេលកើតហេតុពួកគេក៏បានរៀបចំចេញបិណ្ឌបាតដោយជិះរ៉ឺម៉កម៉ូតូចេញពីផ្ទះជួលពេលចេញបានបន្តិចក៏ត្រូវកម្លាំងនគរបាលឃាត់ខ្លួនតែម្តង ។ ជនក្លែងបន្លំនោះត្រូវបាននគរបាលបញ្ជូនទៅកាន់អធិការដ្ឋានខណ្ឌសែនសុខ ដើម្បីចាត់ការតាមច្បាប់ ៕
ចែករំលែកព័តមាននេះ