ខេត្តបាត់ដំបង ៖ សេចក្តីរាយការណ៍បឋមឱ្យដឹងថា មុខសញ្ញានៃក្រុមរត់ពន្ធគ្រឿងញៀនចំនួន៣នាក់(មានទាំងស្ត្រីម្នាក់ផង) ត្រូវកម្លាំងសមត្ថកិច្ចឃាត់ខ្លួនបន្តបន្ទាប់ កាលពីវេលាម៉ោង៩ព្រឹកថ្ងៃទី០៦ ឧសភា នៅក្នុងភូមិអូរថ្មី ឃុំពេជ្រចិន្តា ស្រុកភ្នំព្រឹក ជាមួយនឹងការរឹបអូសបានថ្នាំញៀនយ៉ាងច្រើនសន្ធឹករហូតជិត២ពាន់គ្រាប់ឯណោះ ដែលការបង្ក្រាបធ្វើឡើងកម្លាំងប្រឆាំងគ្រឿងញៀនរបស់អធិការស្រុកភ្នំព្រឹកពេល កំពុងប្រព្រឹត្តបទល្មើសជាក់ស្ដែង ។
សេចក្តីរាយការណ៍ន្តថា ជនសង្ស័យទាំង៣នាក់ ១-ឈ្មោះភ្លើង យ៉ង ភេទប្រុស អាយុ៣៦ឆ្នាំ ២-ឈ្មោះវ៉ាត វង្សរស្មី ភេទស្រី អាយុ២៤ឆ្នាំ ជាប្ដីប្រពន្ធ រស់នៅចំណុចកើតហេតុខាងលើ និង៣-ឈ្មោះខេង ផល្លា ហៅភេទប្រុស អាយុ៣៥ឆ្នាំ នៅភូមិភ្នំតូច ឃុំពេជ្រចិន្តា ។
បើតាមប្រភពដដែលថា នៅក្នុងកិច្ចប្រតិបត្តិការនេះ ដំបូងកម្លាំងជំនាញបានធ្វើការបង្ក្រាបនិងឃាត់ខ្លួនជនសង្ស័យ២នាក់ប្ដី-ប្រពន្ធ ដែលកំពុងធ្វើសកម្មភាពដោះដូរទំនិញ ហើយក្រោយពីទទូលបាននូវចម្លើយបឋមពីជនសង្ស័យប្ដីប្រពន្ធនេះ ទើបមន្ត្រីជំនាញឈានដល់ការតាមឃាត់ខ្លួនមុខសញ្ញាជួញដូរគ្រឿងញៀនដ៍ធំម្នាក់ទៀតឈ្មោះខេង ផល្លា ហៅភេ នេះ ក្រោមការបញ្ជាផ្ទាល់ពីលោកស្នងការខេត្ត ហើយថែមទាំងរឺបអូសបានគ្រឿងញៀនយ៉ាងច្រើនទៀតផង ។
វត្ថុតាងដែលកម្លាំងជំនាញដកហូតបានពីក្រុមជួញដូរថ្នាំញៀនខាងលើនេះ មានថ្នាំញៀនប្រភេទគ្រាប់សញ្ញាអក្សរWY (យ៉ាម៉ា) សរុបជាង១,៧០០គ្រាប់ និងម្សៅក្រាមពណ៌សថ្លាចំនួន០១កញ្ចប់ធំ ។
ចែករំលែកព័តមាននេះ