រដ្ឋធានីវ៉ាស៊ីនតោន ៖ ភ្នាក់ងារសារព័ត៌មាន AP បានឲ្យដឹងកាលពីថ្ងៃច័ន្ទកន្លងមកថា លោកប្រធានាធិបតីបានដាក់សម្ពាធលើប្រទេសចិនកាលពីថ្ងៃអាទិត្យលើ Twitter ដោយគម្រាមថានឹងបង្កើនពន្ធលើផលិតផលចិនប្រមាណ ២០០ប៊ីលានដុល្លារ។
ការគម្រាមកំហែងនេះបានលេចចេញឡើងខណៈដែលក្រុមប្រតិភូចិនត្រូវបន្តកិច្ចចរចាក្នុងរដ្ឋធានីវ៉ាស៊ីនតោននៅថ្ងៃពុធដើម្បីដោះស្រាយសង្គ្រាមពាណិជ្ជកម្មដែលបានប៉ះពាល់ដល់ទីផ្សារហិរញ្ញវត្ថុនិងសេដ្ឋកិច្ចពិភពលោក។
លោកត្រាំបានគម្រាមថានឹងបង្កើនពន្ធនាំចូលលើផលិតផលចិនប្រមាណ២០០ប៊ីលានដុល្លារពី ១០% មកស្មើ ២៥%វិញនៅថ្ងៃសុក្របន្ទាប់ពីបង្ហាញថាលោកកំពុងតែបាត់បង់ភាពអត់ធ្មត់ហើយក្នុងការចរចាលើកិច្ចព្រមព្រៀងពាណិជ្ជកម្មមួយជាមួយនឹងប្រទេសចិន។ គួរបញ្ជាក់ដែរថា លោកបានពន្យាពេលបង្កើនពន្ធចំនួនពីដងមកហើយកាលពីខែមករានិងខែមិនាដើម្បីបានពេលវេលាដើម្បីចរចាលើកិច្ចព្រមព្រៀងបន្ថែម។
ប្រទេសទាំងពីរបានធ្លាក់ក្នុងជម្លោះទាក់ទិននឹងការខិតខំប្រឹងប្រែងពីភាគីចិនក្នុងការក្លាយជាប្រទេសនាំមុខក្នុងផ្នែកបច្ចេកវិទ្យាទៀតផង។ សហរដ្ឋអាមេរិកបានចោទប្រកាន់ដល់ប្រទេសចិនថាប្រើយុទ្ធសាស្ត្រខុសច្បាប់ដែលមានដូចជាការលួចតាមប្រព័ន្ធអ៊ីនធើណែត និងការបង្ខំឲ្យក្រុមហ៊ុនបរទេសផ្ទេរបច្ចេកវិទ្យារបស់ពួកគេដើម្បីជួយដល់ក្រុមហ៊ុនចិនឲ្យក្លាយជាក្រុមហ៊ុននាំមុខក្នុងវិស័យជាច្រើនដូចជាមនុស្សយន្ត និងរថយន្តអគ្គិសនីជាដើម។
កាលពីខែកក្កដាមុន រដ្ឋាភិបាលលោកប្រធានាធិបតីត្រាំបានចាប់ផ្តើមដាក់ពន្ធនាំចូលលើផលិតផលចិនបន្តិចម្តងដើម្បីដាក់សម្ពាធឲ្យប្រទេសចិនប្តូរគោលនយោបាយរបស់ខ្លួន។ បច្ចុប្បន្ននេះពួកគេដាក់ពន្ធ១០%លើផលិតផលចិនប្រមាណ ២០០ប៊ីលានដុល្លារ ហើយ ២៥%ទៀតលើផលិតផលប្រមាណ៥០ប៊ីលានដុល្លារ។
កិច្ចព្រមព្រៀងពាណិជ្ជកម្មរវាងប្រទេសទាំងពីរតម្រូវឲ្យប្រទេសចិនពិចារណាឡើងវិញទាក់ទិននឹងការដែលប្រទេសនេះព្យាយាមសម្រេចមហិច្ចតាសេដ្ឋកិច្ចរបស់ខ្លួនដោយមានដូចជាបោះបង់ ឬកាត់បន្ថយការផ្តល់ឧបត្ថម្ភធនដល់ក្រុមហ៊ុនខ្លួន កាត់បន្ថយភាពតានតឹងសម្រាប់ក្រុមហ៊ុនក្នុងការចែករំលែករឿងសម្ងាត់ពាណិជ្ជកម្ម និងការបើកទូលាយទីផ្សារចិនជាដើម។
យ៉ាងណាក្តី លោក Philip Levy ដែលមកពីក្រុមប្រឹក្សា Chicago Council on Global Affairs និងជាសេដ្ឋវិទូម្នាក់ក្រោមលោកប្រធានាធិបតី George W. Bush បាននិយាយថា ការគម្រាមកំហែងនេះប្រហែលជាមិនមានប្រសិទ្ធិភាពឡើយព្រោះការចរចាមានភាពស្មុគស្មាញណាស់។
ចែករំលែកព័តមាននេះ