កងទ័ពរបស់លោកមូអាម៉ា កាដាហ្វី បានបន្តរុលទៅមុខឆ្ពោះទៅកាន់ទីក្រុងបេនហ្គាហ្ស៊ី ជាទីតាំងបង្អែករបស់ពួកបះបោរស្ថិតនៅភាគខាងកើតប្រទេស ក្រោយវាយដណ្តើមបានទីក្រុងថ្មីៗមក ។
កាលពីថ្ងៃទី១៣ មីនា កងកម្លាំងលោកកាដាហ្វី បន្តរុលទៅមុខ ។ ខ្សែបន្ទាត់រណសិរ្សពេលនេះបានរំកិលថែមទៀតឆ្ពោះទៅទិសខាងកើត ។ បណ្តាទីក្រុងកាន់កាប់ដោយពួកឧទ្ទាមត្រូវធ្លាក់បន្តបន្ទាប់គ្នាក្នុងកណ្តាប់ដៃរបស់កងទ័ពស្និទ្ធលោកកាដាហ្វី ។ ទូរទស្សន៍រដ្ឋលីប៊ីអះអាងថា ទីក្រុង BREGA ត្រូវរំដោះពីពួកបះបោរ ។
កាលពីថ្ងៃទី១២ មីនា កន្លងមកនេះ លោកសៃអុីហ្វ អាល់អុីស្លាម កូនប្រុសរបស់លោកកាដាហ្វី ដែលកាន់អំណាចចាប់តាំងពី៤២ឆ្នាំមកហើយ និយាយថា រូបគេមានទំនុកចិត្តលើជោគជ័យរបស់កងទ័ពរដ្ឋាភិបាលដោយអះអាងក្នុងបទសម្ភាសន៍ជាមួយបណ្តាកាសែតអុីតាលីថា កងទ័ពរដ្ឋាភិបាលដណ្តើមកាន់កាប់ដែនដី៩០% របស់ប្រទេសរួចហើយ ។ កូនប្រុសលោកកាដាហ្វី រូបនេះសន្យាពីការធ្វើសង្គ្រាមមួយរហូតដល់ទីបញ្ចប់ ។ លោកសៃអុីហ្វ អាល់អុីស្លាម បន្តថា «ឆាប់ៗនេះអ្វីៗនឹងត្រូវបញ្ចប់» ។
ទោះបីជារបបលោកកាដាហ្វី ហាក់ដូចជាមានប្រៀបក្នុងការវាយបកវិញរបស់ខ្លួនក៏ដោយ ក៏សហគមន៍អន្តរជាតិហាក់ដូចជាមានប្រតិកម្មយឺតៗ ។ ក្រោយកិច្ចប្រជុំរបស់អូតង់ និងរបស់សហភាពអឺរ៉ុប ដែលពុំសម្រេចបានលទ្ធផលជាក់លាក់នានា ដើម្បីបញ្ឈប់ការបង្ក្រាប ការជួបគ្នាថ្មីមួយរបស់ G8 គ្រោងធ្វើនាថ្ងៃទី១៤ មីនា ។
ពួកប្រឆាំងលោកកាដាហ្វី កំពុងជួបការលំបាក ។ កងទ័ពលោកកាដាហ្វី វាយដណ្តើមត្រួតត្រាវិញកាលពីថ្ងៃទី១៣ មីនា នូវទីក្រុងប្រេងយុទ្ធសាស្ត្រ BREGA តាមផ្លូវទៅកាន់ទីក្រុងបេនហ្គាហ្ស៊ី ។ បរាជ័យថ្មីនេះរបស់ពួកបះបោរញ៉ាំងឱ្យមានការកាត់បន្ថយយ៉ាងខ្លាំងនូវការផ្តល់ថាមពលដល់ពួកគេនៅភាគខាងកើតប្រទេសក្រោយការបាត់បង់ទីក្រុង RAS LANOUF កាលពីថ្ងៃទី១២ មីនា ។ កងកម្លាំងរដ្ឋាភិបាលបានឡោមព័ទ្ធភាគកណ្តាលទីក្រុង MISRATA ។ បណ្តាប្រមុខកុលសម្ព័ន្ធបានពិភាក្សាគ្នាជាមួយពួកឧទ្ទាម ដើម្បីឱ្យពួកគេយល់ព្រមចុះចូល ។ ទូរទស្សន៍រដ្ឋលីប៊ី ប្រកាសផងដែរថា បណ្តាកំពង់ផែប្រេងរបស់ប្រទេសពេលនេះត្រូវបានធានាសន្តិសុខវិញហើយ ៕
ចែករំលែកព័តមាននេះ