រាជធានីភ្នំពេញ៖ លោកវ៉ាត លីម៉េង សង្កេតឃើញពីចរិតអ្នកសិល្បៈភាគច្រើន ក្រោយពីធ្វើការសិល្បៈបានរយៈពេល២០ឆ្នាំកន្លងមកនេះជាមួយផលិតកម្ម៦ ទាំងតូចទាំងធំ ។ តាមរយៈហ្វេសប៊ុករបស់ខ្លួនកាលពីថ្ងៃទី៥ ឧសភា ២០១៩ លោកវ៉ាត លីម៉េង បានទម្លាយចេញអ្វីដែលលោកជួបផ្ទាល់ពីភាពក្រអើតក្រទម ឆ្មើងឆ្មៃរបស់តារាល្បីជាច្រើន ។ លោករៀបរាប់ថា ៖
-អ្នកចម្រៀង : ពេលមិនទាន់ល្បី គឺថាលើកដៃជម្រាបសួរយើងតាំងពីចម្ងាយក៏មាន យកចិត្ត យកថ្លើមយើង ព្រោះយើងជាអ្នកដឹកនាំសម្តែង អាចជួយឲ្យគាត់រឹតតែល្បី… ដល់ពេលល្បីគឺថាលើកដៃជម្រាបសួរយើងអត់កើតដូចមុនទេ ប្រហែលជាគាត់កើតបូសក្លៀកហើយមើលទៅ អ្នកខ្លះពេលឃើញយើង គឺងក់ក្បាល និងញញឹមដាក់ (មិនចង់ឲ្យគាត់លើកដៃជម្រាបសួរគ្រប់ពេលទេ គឺគ្រាន់តែចង់ឲ្យគាត់ធ្វើអ្វីដែលគាត់ធ្លាប់ធ្វើពីមុនទៅបានហើយ ព្រោះវាក៏ជាទំនៀមទម្លាប់របស់ខ្មែរយើងដែរ) ។
បើនិយាយពីការងារវិញ ពេលយើងធ្វើMVបទគាត់ល្អ និងល្បី គឺថាគាត់កើបលុយរាប់មុឺនដុល្លារ តែសូម្បីពាក្យអរគុណយើងមួយម៉ាត់ក៏គ្មានដែរ ហើយសូម្បីពេលរដូវបុណ្យទាន ម្តងៗ មិនដែលទាំងផ្ញើសារជូនពរយើងផង(មិនអន់ចិត្តទេ ព្រោះវាជាការងារដែលយើងត្រូវធ្វើ ព្រោះសុីប្រាក់ខែផលិតកម្ម តែគ្រាន់តែចង់ដឹងពីទឹកចិត្តរបស់ពួកគាត់ប៉ុណ្ណោះ) ដល់ពេលយើងធ្វើMVបទគាត់អត់បានល្អ អត់ល្បី គឺថា ពេលជួបមុខគ្នា ពេលខ្លះសឹងតែធ្វើមិនឃើញយើងផង បើនិយាយជាមួយយើងវិញ គឺថាបែបចុងមាត់ចុងក(បែបមិនឲ្យតម្លៃ)… ។
-តារាសម្តែង : ពេលមិនទាន់ល្បី គឺថាលើកដៃជម្រាបសួរយើងតាំងពីចម្ងាយក៏មាន យកចិត្ត យកថ្លើមយើង ដល់ពេលបានល្បី គឺថា ពេលជួបយើង ធ្វើដូចចង់លើកដៃជម្រាបសួរតិច អត់តិច ហើយបើអ្នកខ្លះ គឺថាធ្វើមិនឃើញយើង ចាំឲ្យយើងឃើញគាត់ ហើយហៅគាត់មុនក៏មាន ហើយបើនិយាយពីការងារវិញ ពេលមិនទាន់ល្បី ណាត់ម៉ោង៧ព្រឹក គឺមកចាំតាំងពីម៉ោង៦ក៏មានដែរ…ហើយបទអីក៏ថតដែរបង ឲ្យតែបានថត ដល់ពេលល្បីគួរសម មានអ្នកឧបត្ថម្ភ ណាត់ម៉ោង៧ គឺថាមកម៉ោង៨ជាង ឬ៩ជាងក៏មានដែរ… ហើយពេលហៅថត គឺសុទ្ធតែសួរថា ខ្ញុំដើរតួអីបង តួឯកបានខ្ញុំថត តួរងខ្ញុំអត់ថតទេ ហើយថតនៅក្តៅក៏អត់ថតដែរ ខ្លាចខូចស្បែក ថតដល់យប់ពេក ក៏អត់ថតដែរ…។
ក្រោយធ្វើការសិល្បៈ២០ឆ្នាំកន្លងមកនេះ គឺខ្ញុំសង្កេតឃើញថា សង្គមសិល្បៈគឺជាសង្គមមួយដែលគួរអោយខ្លាច គឺពោរពេញទៅដោយការរាប់អានក្លែងក្លាយ…ភាគច្រើនគឺរាប់អានសម្លឹងឃើញតែប្រយោជន៍ផ្ទាល់ខ្លួន អ្វីៗភាគច្រើនគឺសុទ្ធតែជាការសម្តែង និយាយល្អតែនៅនឹងមុខយើងទេ ក្រោយខ្នងយើងវិញ និយាយអាក្រក់ពីយើងឡើងហុយ… ប៉ុន្តែមិនមែនទាំងអស់នោះទេ ក៏មានគេអ្នកល្អដែរ ហើយមិនមែនមានតែសង្គមសិល្បៈទេ សង្គមផ្សេងក៏អ៊ីចឹងដែរ មានអ្នកល្អ និងអ្នកមិនល្អ ។ នៅមានច្រើនចំណុចទៀត បើសរសេរក៏សរសេរមិនអស់ដែរ…»។
ការលើកឡើងរបស់លោកវ៉ាត លីម៉េង បែបនោះ អ្នកនាងស្វែង សុជាតា បានចូលរួមជាមតិបែបគាំទ្រ៖«បន្ថែមតិចទៀតចុះ កាលចូលសិល្បៈដំបូង អត់ទាន់ល្បី ជើងនៅក្រិន អត់ទាន់មានលុយបកស្បែក យាយពីម្ហូបអីក៏ចេះដែរ ឡូកឡំជាមួយក្រុមកាងារ ដល់ពេលមានឡានទំនើប ស្រាប់តែទាល់តែ ប្រេនៗបានអាច តែបើលុយថតវិញដូចមិនថ្លៃប៉ុន្មានទេ សំខាន់ស្អប់មនុស្សភ្លេចកំណើត ។ ហើយបើឃើញឯង ចាស់ៗវិញ តែមុខក៏វាមិនមើលផង កុំថាឡើយមកជម្រាបសួរ មិនចង់និយាយទេ ។ បើខ្ញុំចូលសិល្បៈដំបូងចរិត អន់ៗអុីចេះខ្ញុំប្រហែលគ្មានថ្ងៃហ្នឹងទេ » ។
អ្នកនាងស្វែង សុជាតា បន្តថា«ខុសពីតារាបរទេសដែលខ្ញុំធ្លាប់ជួប ពួកគេដឹងថាយើងមានឈុតត្រូវសម្តែងជាមួយ គេៗខំមកស្វាគមន៍យើង សមប៉ារ៉ូលជាមួយយើង ឲ្យយើងមានភាពស្និទ្ធស្នាលគ្នាដើម្បីតួអង្គសម្តែងទៅវាល្អឥតខ្ចោះ ទោះពួកយើងជាតិផ្សេងគ្នាក៏ដោយ អ្នកឯងក្រក៏ដោយ តែតារាមួយចំនួនវិញគឺ«អញ»តែម្តង ចាំចូលប្លង់ចាំញញឹមដាក់ ចប់ប្លង់អញល្អជាង ក្មេងជាង មានជាង…»៕
ចែករំលែកព័តមាននេះ