រាជធានីភ្នំពេញ ៖ ឧស្សាហកម្មគ្មានផ្សែងនៅតែដើរតួនាទីសំខាន់សម្រាប់លើកកិត្យានុភាពកម្ពុជាលើឆាកអន្តរជាតិ និងជាប្រភពចំណូលដ៏សំខាន់មួយសម្រាប់សេដ្ឋកិច្ចជាតិ ហេតុដូច្នេះហើយគេកត់សម្គាល់ឃើញថាក្រសួងពាក់ព័ន្ធជាច្រើនបានខិតខំផ្សព្វផ្សាយអំពីវប្បធម៌និងតំបន់ទេសចរណ៍សំខាន់ៗរបស់ប្រទេសកម្ពុជា តាមរយៈការរៀបចំនូវមហោស្រព្យសិល្បៈនិងចូលរួមពិព័រណ៍ទេសចរណ៍នៅក្រៅប្រទេសជាដើម ។
ប្រាកដណាស់ ទេសចរជប៉ុនតែងស្ថិតក្នុងចំណោមប្រភពទីផ្សារទេសចរណ៍ធំៗទាំង១០របស់កម្ពុជាសម្រាប់ឆ្នាំ ២០១៨ កន្លងមក ហើយក្នុងឆ្នាំ២០១៩ នេះ កម្ពុជារំពឹងថានឹងទទួលបានទេសចរជប៉ុនប្រមាណជាង ២៣ ម៉ឺននាក់ ។ កាលពីឆ្នាំ២០១៨កន្លងទៅនេះ កម្ពុជាទទួលបានទេសចរអន្តរជាតិជាង ៦.២លាននាក់ ក្នុងកំណើន ១០.៧% ក្នុងនោះទេសចរជប៉ុនមានចំនួនជាង ២១ម៉ឺននាក់ ក្នុងកំណើន ៣.៥% ហើយ២ខែដើមឆ្នាំ២០១៩ នេះ កម្ពុជាទទួលបានទេសចរអន្តរជាតិជាង ១,២ លាននាក់ ក្នុងនោះទេសចរជប៉ុន ជិត៤ ម៉ឺននាក់ ក្នុងកំណើន ៣.១%។ នេះបើយោងតាមរបាយការណ៍របស់ក្រសួងទេសចរណ៍កម្ពុជា។
ជាក់ស្តែងថ្មីៗនេះ កម្ពុជាបានរៀបចំនួវមហោស្រពកម្ពុជា ឆ្នាំ២០១៩ (Cambodia Festival 2019) នៅទីក្រុងតូក្យូ ជប៉ុន រយៈពេល ២ ថ្ងៃ គិតចាប់ពីថ្ងៃទី ០៣-០៤ ខែឧសភា ឆ្នាំ២០១៩ នៅសួន Yoyogi នៅទីក្រុងតូក្យូ ក្រោមកិច្ចសហការរៀបចំដោយក្រសួងទេសចរណ៍កម្ពុជា ក្រសួងវប្បធម៌ វិចិត្រសិល្បះ ក្រសួងពាណិជ្ជកម្ម ស្ថានឯកអគ្គរាជទូតកម្ពុជាប្រចាំប្រទេសជប៉ុន ហើយដែលពិធីបើកមានការចូលរួមពីសំណាក់ ឯកឧត្តម Kenji YAMADA អនុរដ្ឋមន្ត្រីនៃក្រសួងការបរទេសជប៉ុន ក៏ដូចជាលោក ថោង ខុន រដ្ឋមន្ត្រីក្រសួងទេសចរណ៍ លោក Masahiro Imamura ប្រធានសម្ព័ន្ធមិត្តភាពសភាជប៉ុន-កម្ពុជា ជាដើម។
ថ្លែងក្នុងមហោស្រព ឯកឧត្តម Masahiro Immamura បានគូសបញ្ជាក់ថា«ខ្ញុំសូមអបអរសាទរការរៀបចំពិព័រណ៍កម្ពុជាក្រោមអាកាសធាតុល្អ។ កម្មវិធីនេះបានរៀបចំឡើងនៅដើមរជ្ជកាលរ៉េវ៉ាក់ ដែលគួរឱ្យចងចាំ។ ខ្ញុំសូមអរគុណចំពោះក្រុមការងាររៀបចំពិព័រណ៍នេះ។ ឆ្នាំមុនជាខួបលើកទី៦៥នៃបង្កើតទំនាក់ទំនងការទូតជប៉ុន កម្ពុជា ដែលមានកម្មវិធីផ្លាស់ប្តូរទំនាក់ទំនងរវាងជប៉ុន និងកម្ពុជាជាច្រើន។ ហើយការិយាល័យកុងស៊ុលជប៉ុនប្រចាំទីក្រុងសៀមរាប ដែលជាក្រុងប្រវត្តិសាស្ត្រមានអង្គរវត្ត ត្រូវបានដាក់ឱ្យសម្ពោធដំណើរការជាផ្លូវការនៅឆ្នាំមុន។ ហើយយន្តហោះត្រង់រវាងតូក្យូ ភ្នំពេញ ក៏ដំណើរការល្អដែរ» ។ លោកបានបន្តថា ហើយតាមការឲ្យដឹងរបស់លោក អ៊ុង រចនា ឯកអគ្គរាជទូតកម្ពុជាប្រចាំប្រទេសជប៉ុន គឺនៅក្នុងខែឧសភានេះ ក៏មានដំណើរទស្សនកិច្ចរបស់ សម្តេចតេជោ ហ៊ុន សែន មកកាន់ប្រទេសជប៉ុន ជាថ្មីផងដែរ។ ក្នុងនាមជាតំណាងប្រធានសម្ព័ន្ធខ្ញុំមានក្តីរំភើបដែលនឹងបានទទួលស្វាគមន៍សម្តេចតេជោជាថ្មី ។
លោកបានបន្តទៀតថា «ប្រទេសកម្ពុជាបានឆ្លងកាត់ប្រវត្តិសាស្ត្រដ៏ក្រៀមក្រំ ហើយទទួលការអភិវឌ្ឍរឹងមាំនាពេលបច្ចុប្បន្ន ហើយប្រទេសជប៉ុនបាននិងកំពុងជំរុញនូវការបង្កើតឱកាសមួយសម្រាប់ជនជាតិបរទេសដើម្បីរៀនសូត្រឬក៏ធ្វើការ ហើយយើងមានសេចក្តីរីករាយណាស់ប្រសិនបើជនជាតិខ្មែរ មករៀន ឬមកធ្វើការ បានទទួលចំណេះដឹង ក៏ដូចជាបទពិសោធន៍ពីប្រទេសជប៉ុន ត្រឡប់ទៅស្រុកខ្មែរវិញ ហើយប្រើប្រាស់សម្រាប់ជាប្រយោជន៍ដល់កម្ពុជា។ ទាំងអស់គ្នា សូមបន្តចូលរួមចំណែកក្នុងការពង្រឹងទំនាក់ទំនងទ្វេភាគីជប៉ុន កម្ពុជា ហើយបានខ្លាំងក្លាថែមទៀតចាប់ពីពេលនេះតទៅ»។ សម្រាប់ ឆ្នាំ២០១៩ នេះជាខួបលើកទី៦៦ នៃទំនាក់ទំនងការទូតរវាងប្រទេសទាំងពីរ កម្ពុជា និងជប៉ុន ហើយបច្ចុប្បន្នជប៉ុនមិនមែនមានត្រឹមតែស្ថានទូតនៅរាជធានីភ្នំពេញប៉ុណ្ណោះទេ តែក៏មានស្ថានកុងសុលនៅខេត្តសៀមរាបអង្គរផងដែរ។
សូមបញ្ជាក់ថាពិព័រណ៍នេះធ្វើឡើងរយៈពេល ២ ថ្ងៃ ដោយមានកិច្ចសហការពីស្ថានទូតកម្ពុជាប្រចាំប្រទេសជប៉ុន សមាគមខ្មែរនៅប្រទេសជប៉ុន ក្នុងនោះមានការសម្តែងរបាំបុរាណខ្មែរ សម្តែងក្បាច់គុនល្បុក្កតោរបស់ខ្មែរ និងច្រៀងចម្រៀងខ្មែរដោយក្រុមតន្ត្រី Dark Storm Band និងក្រុមតន្ដ្រីករខ្មែរផ្សេងទៀត និងការតាំងពិព័រណ៍ម្ហូបអាហារខ្មែរ វប្បធម៌ និងទេសចរណ៍ប្រមាណ ២៥០ស្តង់ និងមានអ្នកចូលរួមប្រមាណជាង១០ម៉ឺននាក់។ព្រឹត្តិការណ៍នេះធ្វេីឡេីងជារៀងរាល់ឆ្នាំ ចាប់តាំងពីឆ្នាំ២០១៥ មកម្ល៉េះ ហេីយក្រសួងទេសចរណ៍ក៏បានចូលរួមជារៀងរាល់ឆ្នាំផងដែរ។
ឆ្នាំ២០១៩នេះ ជាខួបលើកទី៦៦ នៃទំនាក់ទំនងការទូតរវាងកម្ពុជា និងជប៉ុន ពិសេសស្របពេល នៃការឡើងគ្រងរាជ្យរបស់ព្រះករុណា ណារ៉ូហ៉ីតូ ព្រះចៅអធិរាជជប៉ុន ដែលបានឡេីងគ្រងរាជ្យនៅថ្ងៃទី០១ ខែឧសភា ឆ្នាំ២០១៩។ ដើម្បីបន្តការផ្សព្វផ្សាយទេសចរណ៍កម្ពុជា លើទីផ្សារជប៉ុន ក៏ដូចជាការរឹតចំណងមិត្តភាពកម្ពុជា-ជប៉ុន ក្រសួងទេសចរណ៍ នឹងចូលរួមពិព័រណ៍ទេសចរណ៍អន្តរជាតិ JATA Travel Showcase និងរៀបចំកម្មវិធីផ្សព្វផ្សាយបង្ហាញផ្លូវទេសចរណ៍កម្ពុជា Cambodia Tourism Roadshow ដែលនឹងប្រព្រឹត្តិទៅចាប់ពីថ្ងៃទី២៤-២៧ ខែតុលា ឆ្នាំ២០១៩ នៅទីក្រុងអូសាកា ប្រទេសជប៉ុនផងដែរ៕
ចែករំលែកព័តមាននេះ