រាជធានីភ្នំពេញ ៖ ទីផ្សារមូលបត្រ និងទីផ្សារឥណទានជាប្រភព និងជាច្រកដ៏សំខាន់ក្នុងការប្រមូលទុនរបស់សហគ្រាស ព្រោះតាមរយៈទីផ្សារមូលបត្រ សហគ្រាសអាចធ្វើការប្រមូលនូវទុនដោយមិនចាំបាច់ចំណាយលើការប្រាក់ ហើយសម្រាប់គ្រឹះស្ថានហិរញ្ញវត្ថុក៏អាចធ្វើការពង្រីកដើមទុនរបស់ខ្លួនបន្ថែមពីលើបានទៀត។ នេះបើតាមការលើកឡើងរបស់លោក ហាំ ចងហាន់ (Hahm Jeong-han) អគ្គទីប្រឹក្សា និងអគ្គកុងស៊ុល នៃស្ថានទូតសា ធារណរដ្ឋកូរ៉េប្រចាំកម្ពុជា នៅក្នុងពិធីពិព័រណ៍ផ្សារភាគហ៊ុនកម្ពុជា រៀបចំនៅផ្សារទំនើបអុីអនទី២ កាលពីថ្ងៃទី៥ ឧសភា ម្សិលមិញនេះ ។
លោក បានមានប្រសាសន៍បន្តថា ក្នុងបណ្តាប្រទេសជាច្រើនលើពិភពលោក ទីផ្សារមូលបត្រ តែងបាននឹងកំពុងដើរតួនាទីយ៉ាងសំខាន់ និងគឺជាចំណុចស្នូលក្នុងការអភិវឌ្ឍន៍សេដ្ឋកិច្ចជាតិ។ មិនតែប៉ុណ្ណោះ ការកកើតនូវក្រុមហ៊ុនផ្សារមូលបត្រកាន់តែច្រើន ជួយឱ្យគេអាចទស្សន៍ទាយអំពីការគ្រប់គ្រងសហគ្រាស ចូលរួមចំណែកបន្តស្ថេរភាពក្នុងការពង្រីកលទ្ធភាពប្រមូលពន្ធអាករជាដើម ដែលវានឹងដើរតួនាទីយ៉ាងធំធេង ក្នុងការអភិវឌ្ឍន៍នូវកម្លាំងប្រកួតប្រជែងរបស់ប្រទេសជាតិក្នុងរយៈពេលវែង។ លោកសង្កត់ធ្ងន់ដូច្នេះថា « ប្រជាជនកម្ពុជាក៏អាចធ្វើការវិនិយោគលើតម្លៃនៃសហគ្រាសដែលកំពុងលូតលាស់តាមរយៈទីផ្សារមូលបត្រនេះ ហើយតាមរយៈការចែករំលែកនូវលទ្ធផលជាផ្លែផ្កាអំពីការរីកលូតលាស់នៃសហគ្រាសតាមរយៈទីផ្សារមូលបត្រនេះ ក៏នឹងបង្កើតបានជា ផលប័ត្រចម្រុះ និងឱកាសក្នុងការប្រមូល ពង្រីកដើមទុន។ យើងអាចនិយាយបានថា រាល់ចំនុចទាំងឡាយនេះស្របទៅនឹងតម្លៃនៃចំនុចស្នូល ‘ការបង្កើតនូវសហគមន៍វិបុលភាពរួម ដែលផ្តោតសំខាន់លើមនុស្ស’ នៃគោលនយោបាយទិសដៅភាគខាងត្បូងថ្មី ដែលរដ្ឋាភិបាលកូរ៉េកំពុងធ្វើការជម្រុញអនុវត្ត»។
ស្របពេលវិស័យមូលបត្រកម្ពុជាបាននឹងកំពុងបោះជំហានទៅមុខជាបណ្តើរៗ លោក ហាំ ចងហាន់ លើកឡើងថា នៅក្នុងកំឡុងឆ្នាំ១៩៩០ ប្រទេសកូរ៉េបានជួបប្រទះនូវការប្រែប្រួលស្ថានភាពជាច្រើនលើកច្រើនសារ ដូចជាការជួបប្រទះនូវវិបត្តិហិរញ្ញវត្ថុជាដើម ហើយក៏បានធ្វើការសន្សំរហូតមកនូវបទពិសោធន៍ក្នុងការអភិវឌ្ឍន៍ទីផ្សារមូលបត្រប្រកបដោយស្ថេរភាព ហើយពេលនេះ កូរ៉េកំពុងតែធ្វើការចែករំលែកនូវបទពិសោធន៍ទាំងនោះ ជាមួយនឹងបណ្តាប្រទេសអាស៊ាន។ ការចូលរួមចំណែកក្នុងការបង្កើតក្រុមហ៊ុនផ្សារមូលបត្រកម្ពុជា ក្នុងឆ្នាំ២០១០ គឺជាសកម្មភាពធំមួយក្នុងចំណោមការចែករំលែកបទពិសោធន៍។
លោក ហុង សុហួរ អគ្គនាយកនៃក្រុមហ៊ុនផ្សារមូលបត្រកម្ពុជាមានប្រសាសន៍ថា «ស្របតាមចក្ខុវិស័យរបស់រាជរដ្ឋាភិបាលយើង ផ្សារ មូលបត្រកម្ពុជារបស់យើងបានឈានមកដល់ជំនាន់ថ្មីមួយទៀត ដោយដាក់ជាប្រែនឌីងថា CSX 2.0។ ជំនួសឱ្យការទូរស័ព្ទ ឬអ៊ីម៉ែលទៅក្រុមហ៊ុនមូលបត្រ គឺវិនិយោគិនអាចប្រើប្រាស់ប្រព័ន្ធជួញដូរចល័ត MTS ដើម្បីធ្វើការដាក់បញ្ជារ ។ ជំនួសឱ្យការផ្តល់ព័ត៌មានទាន់ពេល តាមរយៈអុីម៉ែល ក្រុមហ៊ុនចុះបញ្ជីលក់មូលបត្រ អាចប្រើប្រាស់នូវបង្ហាញព័ត៌មាន e-disclosure ដើម្បីឱ្យការផ្តល់ព័ត៌មានកាន់តែមានប្រសិទ្ធភាព និងទាន់ពេលវេលា»។
ចំណែកលោក ស៊ូ សុជាតិ អគ្គនាយកគណៈកម្មការមូលបត្រកម្ពុជាមានប្រសាសន៍ថា រហូតមកទល់នឹងពេលនេះ មានក្រុមហ៊ុនមូលបត្រដែលទទួលបានអាជ្ញាប័ណ្ណចំនួន១០ កំពុងផ្តល់សេវានៅក្នុងទីផ្សារមូលបត្រកម្ពុជា ខណៈដែលតួអង្គសំខាន់ៗផ្សេងទៀត ត្រូវបានផ្តល់ការអនុញ្ញាត និងការទទួលស្គាល់បន្តបន្ទាប់ ហើយចំនួនវិនិយោគិនក៏មានការកើនឡើងពីមួយឆ្នាំទៅមួយឆ្នាំ ដែលលេខអត្តសញ្ញាណវិនិយោគិនគិតត្រឹមត្រីមាសទី១ គឺមានចំនួន២០.៥៤៩ ដែលរួមមានវិនិយោគិនរូបវន្តបុគ្គល សញ្ជាតិខ្មែរចំនួន ១៧.៦១១ នាក់ និងបរទេសចំនួន ៣.២៨៨នាក់ ខណៈដែលវិនិយោគិននីតិបុគ្គលសញ្ជាតិខ្មែរមានចំនួន ២៥ក្រុមហ៊ុន និងសញ្ជាតិបរទេសមាន៩០ក្រុមហ៊ុន។
លោកអគ្គនាយក បានគូសបញ្ជាក់ថា «ផលិតផលដែលកំពុងដាក់ឱ្យដំណើរការជួញដូរនៅក្នុងផ្សារមូលបត្រកម្ពុជាមានចំនួន៣ រួមមាន មូលបត្រកម្មសិទ្ធិ ដែលហៅថា ភាគហ៊ុន, មូលបត្របំណុល ឬហៅថាសញ្ញាប័ណ្ណ និងឧបករណ៍និស្សន្ទ។ ក្រុមហ៊ុនបោះផ្សាយលក់មូលបត្រចំនួន៦បាននឹងកំពុងចុះបញ្ជីនៅលើក្រុមហ៊ុនផ្សារមូលបត្រ កម្ពុជា ក្នុងនោះក្រុមហ៊ុនចំនួន៥ បានចុះបញ្ជីជួញដូរមូលបត្រកម្មសិទ្ធិនិងក្រុមហ៊ុនចុះបញ្ជី១ទៀតជាក្រុមហ៊ុនបោះផ្សាយសញ្ញាប័ណ្ណ»។ លោកបន្តថា ការចូលរួមវិនិយោគនៅក្នុងទីផ្សារមូលបត្រ គឺមិនត្រឹមតែជាជម្រើសវិនិយោគសក្តានុពលក្នុងផែនការហិរញ្ញវត្ថុ គ្រួសារ និងផ្ទាល់ខ្លួនប៉ុណ្ណោះទេ ថែមទាំងជាការចូលរួម នៅក្នុងការអភិវឌ្ឍសេដ្ឋកិច្ចជាតិ ដោយហេតុថាទីផ្សារមូលបត្រ គឺជាសរសៃឈាមសេដ្ឋកិច្ចដែលអាចកៀរគរ នូវមូលនិធិដែលនៅសេសសល់
នៅក្នុងទីផ្សារឱ្យប្រើប្រាស់អស់ពីលទ្ធភាព ជួយបង្កើតការងារក្នុងស្រុក និងលើកកម្ពស់សមត្ថភាពប្រកួតប្រជែងរបស់សហគ្រាសក្នុងស្រុក ព្រមទាំងជំរុញនូវតម្លាភាពអាជីវកម្មនៅកម្ពុជា។
ក្នុងឱកាសនោះដែរ លោកបណ្ឌិតសភាចារ្យ ហ៊ាន សាហ៊ីប រដ្ឋលេខាធិការនៃក្រសួងសេដ្ឋកិច្ចនិងហិរញ្ញវត្ថុ បានមានប្រសាសន៍ថាទន្ទឹមនឹងការជំរុញលើកកម្ពស់ទឹកចិត្តដល់សហគ្រាសឯកជន ឱ្យចុះបញ្ជីក្នុងផ្សារមូលបត្រ រាជរដ្ឋាភិបាលកំពុងពិនិត្យពិចារណាលើសហគ្រាសសាធារណៈផ្សេងទៀត ដើម្បីនាំមកចូលផ្សារមូលបត្រ ក្នុងគោលដៅមិនត្រឹមតែជំរុញការអភិវឌ្ឍទីផ្សារប៉ុណ្ណោះទេ តែក៏រួមចំណែកដល់ការជំរុញឯកជនភាវូបនីយកម្ម, បង្កើនប្រសិទ្ធភាពការងារ ផលិតភាពនិងភាពប្រកួតប្រជែងរបស់សហគ្រាសទាំងនោះ។ ក្រៅពីការបោះផ្សាយមូលបត្រកម្មសិទ្ធិ, ការបោះផ្សាយមូលបត្របំណុល ក៏ជាផលិតផលថ្មីមួយដែលត្រូវមានសកម្មភាពជាមួយគ្នា ហើយរាជរដ្ឋាភិបាលបានកំពុងយកចិត្តទុកដាក់រៀបចំបទបញ្ញាត្តិនិងយន្តការនានា ដើម្បីត្រៀមខ្លួនបោះផ្សាយមូលបត្របំណុលរដ្ឋ។
លោកបណ្ឌិត ក៏បានលើកឡើងថា «កន្លងមកនេះក្នុងគោលដៅជំរុញការអភិវឌ្ឍផ្សារមូលបត្រនេះ រាជរដ្ឋាភិបាលក៏បានផ្តល់ការលើកទឹកចិត្តផ្នែកពន្ធដារដល់វិនិយោគិន និងក្រុមហ៊ុនដែលចុះបញ្ជីនៅផ្សារមូលបត្រកម្ពុជា ដែលជាផ្នែកមួយចាំបាច់នៃការលើកទឹកចិត្តក្រុមហ៊ុនចុះបញ្ជីនិងជំរុញកំណើននៃវិស័យមូលបត្រ។ស្របគ្នានេះដែរ រាជរដ្ឋាភិបាលកម្ពុជាតាមរយៈអគ្គនាយកដ្ឋានពន្ធដារកំពុងពង្រឹងការអនុវត្តការប្រមូលពន្ធក្នុងគោលដៅបង្កើនចំណូលរដ្ឋ និងកាត់បន្ថយការប្រកួតប្រជែងមិនយុត្តិធម៌ ជាពិសេសរវាងក្រុមហ៊ុនដែលចុះបញ្ជីនៅផ្សារមូលបត្រកម្ពុជា និងក្រុមហ៊ុនដែលនៅខាងក្រៅ
ផ្សារ»៕
ចែករំលែកព័តមាននេះ