ខេត្តកំពង់ធំ ៖ ពេលមេឃកំពុងតែភ្លៀងឪពុកយកចបកាយបង្ហូរទឹកចេញពីក្នុងផ្ទះ ចំណែកកូនប្រុសកំពុងមុជទឹកភ្លៀងក្បែរនោះ ស្រាប់តែត្រូវរន្ទះបាញ់ បណ្តាលឱ្យរងរបួសធ្ងន់ទាំង២នាក់ឪពុកនិងកូនកាលពីវេលាម៉ោង៥ល្ងាចថ្ងៃទី៥ ខែឧសភា ឆ្នាំ២០១៩ ស្ថិតនៅភូមិអូរកន្ធរត្បូង សង្កាត់អូរកន្ធរ…
ខេត្តកំពង់ធំ ៖ ពេលមេឃកំពុងតែភ្លៀងឪពុកយកចបកាយបង្ហូរទឹកចេញពីក្នុងផ្ទះ ចំណែកកូនប្រុសកំពុងមុជទឹកភ្លៀងក្បែរនោះ ស្រាប់តែត្រូវរន្ទះបាញ់ បណ្តាលឱ្យរងរបួសធ្ងន់ទាំង២នាក់ឪពុកនិងកូនកាលពីវេលាម៉ោង៥ល្ងាចថ្ងៃទី៥ ខែឧសភា ឆ្នាំ២០១៩ ស្ថិតនៅភូមិអូរកន្ធរត្បូង សង្កាត់អូរកន្ធរ ក្រុងស្ទឹងសែន ខេត្តកំពង់ធំ ។
លោកអនុសេនីយ៍ឯក ស៊ន នឿន មេប៉ុស្តិ៍អូរកន្ធរ បានប្រាប់ឱ្យដឹងថា ជនរងគ្រោះទាំង២នាក់ខាងលើ ក្នុងនោះម្នាក់ឈ្មោះ ឌុច វុទ្ធី ភេទប្រុស អាយុ៤១ឆ្នាំ មុខរបរកសិករ ត្រូវជាឪពុក និងឈ្មោះ ធី សកណា ភេទប្រុស អាយុ១៣ឆ្នាំ ត្រូវជាកូន ។ ជនរងគ្រោះទាំង២នាក់ឪពុកនិងកូនរស់នៅក្នុងភូមិឃុំកើតហេតុខាងលើ។
លោកមេប៉ុស្តិ៍បានបន្តថា បើយោងតាមសម្តីរបស់សាច់ញាតិជនរងគ្រោះបានប្រាប់ថា ជនរងគ្រោះមានប្រពន្ធ និងមានកូនចំនួន៤នាក់ រស់នៅក្នុងផ្ទះតៀម ហើយពួកគាត់បានចាក់ដីខ្ពស់នៅជុំវិញផ្ទះតៀមនោះ។
តាមប្រភពដដែលបានបន្តថា លុះនៅល្ងាចថ្ងៃកើតហេតុ មេឃភ្លៀងធ្វើឲ្យទឹកហូរចូលទៅក្នុងផ្ទះរបស់គាត់ ឃើញដូច្នេះជនរងគ្រោះក៏បានយកចបទៅកាយដីបង្ហូរទឹកចេញ ចំណែកកូនប្រុសកំពុងតែងូតទឹកភ្លៀងលេងនៅក្បែរនោះដែរ គាប់ជួនមានផ្លេកបន្ទោរលាយឡំនឹងរន្ទះផងក៏បានបាញ់ចំឪពុកនិងកូន បណ្តាលឲ្យរងរបួសធ្ងន់ ហើយត្រូវបានសាច់ញាតិ និងប្រជាពលរដ្ឋជិតខាងសែងយកទៅកប់ក្នុងដីខ្សាច់ដើម្បីជួយសង្គ្រោះជីវិត ក៏ប៉ុន្តែដោយសារតែអាការៈធ្ងន់ធ្ងរក៏បញ្ជូនទៅព្យាបាលនៅមន្ទីរពេទ្យខេត្តទាំងយប់ ៕
ចែករំលែកព័តមាននេះ