ខេត្តកំពង់ឆ្នាំង ៖ បឹងធំ គឺជាបឹងមួយដែលមានផ្ទៃទឹកធំល្វឹងល្វើយនៅខែវស្សា លាតសន្ធឹងពីចំណុចទំនប់បារាំង ស្ថិតនៅក្នុងភូមិកណ្ដាល សង្កាត់ផ្សារឆ្នាំង ក្រុងកំពង់ឆ្នាំង រហូតមកដល់ទួលអំពិល ស្ថិតនៅក្នុងភូមិដំណាក់ពពូល…
ខេត្តកំពង់ឆ្នាំង ៖ បឹងធំ គឺជាបឹងមួយដែលមានផ្ទៃទឹកធំល្វឹងល្វើយនៅខែវស្សា លាតសន្ធឹងពីចំណុចទំនប់បារាំង ស្ថិតនៅក្នុងភូមិកណ្ដាល សង្កាត់ផ្សារឆ្នាំង ក្រុងកំពង់ឆ្នាំង រហូតមកដល់ទួលអំពិល ស្ថិតនៅក្នុងភូមិដំណាក់ពពូល សង្កាត់កំពង់ឆ្នាំង ក្រុងកំពង់ឆ្នាំង ចំណែកឯម្ខាងបឹងជាប់ដងទន្លេវិញ គឺជាប់ភូមិកំពង់អុស ឃុំពាមឆ្កោក ស្រុកជលគីរី ។ បឹងមួយនេះមានវិសាលភាពទឹកធំធេងណាស់ និងពុំដែលរីងស្ងួតនោះឡើយ ។ ប៉ុន្តែជាអកុសល ឆ្នាំនេះបឹងដែលមានផ្ទៃទឹកធំធេងប្រែជារីងស្ងួតគោកស្ទើរអស់ទាំងស្រុង ។
ផ្តើមចេញពីបញ្ហានេះធ្វើអោយប្រជាពលរដ្ឋខ្លះបានចោទលើកត្តាធម្មជាតិក្តៅហូតហែង ប៉ុន្តែអ្នកមានដីស្រែចំការជុំបឹងខាងលើនេះបានចោទមកពីមានការបង្ហូរទឹកចេញតាមទំនប់បារាំង បានបណ្តាលខូចខាតដំណាំរបស់ពួកគាត់មានដូចជា ស្រូវប្រាំង និងឈូកជាដើម ។
ទាក់ទងនឹងបញ្ហានេះលោកដោក ប៊ុនថុន ប្រធានមន្ទីរធនធានទឹក និងឧតុនិយម ខេត្តកំពង់ឆ្នាំងបានមានប្រសាសន៍ថា ការដែលបណ្ដាលឱ្យបឹងធំរីងស្ងួតហួតអស់ គឺមិនមែនមកពីកត្តាធម្មជាតិនោះទេ គឺបណ្ដាលមកពីខាងមន្ទីរជំនាញរបស់លោកជាអ្នកបង្ហូរទឹកចេញ ។ លោកបានពន្យល់ថា មូលហេតុ គឺដោយសារបឹងធំនេះចេះតែគោករាក់ពីមួយឆ្នាំទៅមួយឆ្នាំជារៀងរាល់ឆ្នាំ ទើបមន្ទីរជំនាញរបស់លោក បានធ្វើសំណើសុំទៅក្រសួងធនធានទឹក ដើម្បីស្ដាបឹងនេះឲ្យទឹកមានជម្រៅជ្រៅឡើងវិញ ។ ជាមួយគ្នានេះរដ្ឋក៏គ្មានធនធាន ឯណានឹងអាចស្ដាបឹងនេះបានដែរ ទើបសហគមន៍រកដៃគូមកជួយស្ដាបឹងធំនេះវិញ ដោយចំណេញទាំងរដ្ឋ ចំណេញទាំងសហគមន៍ដៃគូដែលជាអ្នកចង់បានអាចម៍ដី ។
និយាយជារួមដើម្បីស្ដាបឹងធំនេះបានលុះត្រាតែមានដៃគូពីវិស័យឯកជនស្ដាយកអាចម៍ដីយកទៅចាក់ទីតាំងណាមួយដែលគេត្រូវការ ។ ហើយបញ្ហានេះមិនមែនជារឿងត្រូវលាក់លាមនោះទេត្រូវធ្វើជាចំហរនៅពេលយ៉ាងខ្លីនេះ លោកនឹងលើកផ្ទាំងប៉ាណូបញ្ហាញពីគម្រោងការស្តាបឹងធំនេះ ។ លោកប្រធានមន្ទីរបានបញ្ជាក់ទៀតថា បើតាមគម្រោងរបស់ឯកឧត្តមអភិបាលខេត្តបានឲ្យដឹងថា កំពុងវាស់វែងគ្រោងប្លង់លើទីតាំងអាងបឹងធំនេះ ដោយកំណត់ទីតាំងអោយបានច្បាស់លាស់ ព្រោះថាបច្ចុប្បន្នកំពុងតែមានការទន្ទ្រានយកដីជុំវិញបឹងពីសំណាក់ប្រជាពលរដ្ឋដែលចេះតែរំកិលបោះព្រំយកដីចូលទៅក្នុងអាងបឹងធំយ៉ាងអនាធិបតេយ្យផងដែរ ។
យ៉ាងនេះក្តីក៏មានប្រជាពលរដ្ឋដែលមានស្រែប្រាំង និងមានចំការឈូកនៅជុំវិញបឹងបានត្អូញត្អែថា មកដល់ពេលនេះដំណាំពួកគាត់បានងាប់ខូចខាតអស់ទៅហើយ ដោយសារតែការបង្ហូរទឹកចេញ ពិសេសប្រជាពលរដ្ឋនៅភូមិកំពង់អុស ។ មកដល់ពេលនេះគេមិនទាន់ដឹងថា តើការអភិវឌ្ឍន៍ការស្តាបាតបឹងខាងលើ អាចទៅដោយរលូន ឬយ៉ាងណានោះទេ ព្រោះមិនទាន់ចេញរូបរាងផងមានលេច ឮបញ្ហាអវិជ្ជមានខ្លះៗជាបណ្តើរៗទៅហើយ ម្យ៉ាងវិញទៀតប្រជាពលរដ្ឋមានដីស្រែចំការជុំវិញបឹងធំនេះខ្លះបានកាន់កាប់ និងអាស្រ័យផល តាំងសម័យចេញពីរបបខ្មែរក្រហមមកម្លេះមិនមែនធម្មតាទេ ៕
ចែករំលែកព័តមាននេះ