រាជធានីភ្នំពេញ ៖ យុវជនម្នាក់រួមជាមួយបក្សពួក៤នាក់ទៀត បានទៅធ្វើសកម្មភាពចូលលួចយកគ្រឿងសមុទ្រ នៅក្នុងផ្ទះលក់គ្រឿងសមុទ្រមួយកន្លែង ។ ប៉ុន្តែសំណាងអាក្រក់ត្រូវបានអ្នកជិតខាងឃើញស្រែកឆោឡោ បង្កការភ្ញាក់ផ្អើលដេញតាមចាប់បាន ចំណែកបក្សពួករត់គេចខ្លួនរួច ។…
រាជធានីភ្នំពេញ ៖ យុវជនម្នាក់រួមជាមួយបក្សពួក៤នាក់ទៀត បានទៅធ្វើសកម្មភាពចូលលួចយកគ្រឿងសមុទ្រ នៅក្នុងផ្ទះលក់គ្រឿងសមុទ្រមួយកន្លែង ។ ប៉ុន្តែសំណាងអាក្រក់ត្រូវបានអ្នកជិតខាងឃើញស្រែកឆោឡោ បង្កការភ្ញាក់ផ្អើលដេញតាមចាប់បាន ចំណែកបក្សពួករត់គេចខ្លួនរួច ។ ហេតុការណ៍នោះបានកើតឡើងកាលពីវេលាម៉ោង៣និង៣០នាទីទៀបភ្លឺឈានចូលថ្ងៃទី០៦ ខែឧសភា ឆ្នាំ២០១៩ នៅខាងក្រោយសាលាបឋមសិក្សាជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ។
យុវជនសង្ស័យដែលត្រូវចាប់ខ្លួនបានម្នាក់នោះឈ្មោះសែម ចាន់វិសាល អាយុ២២ឆ្នាំ មុខរបរ មិនពិតប្រាកដ ស្នាក់នៅក្នុងភូមិសង្កាត់កើតហេតុ ចំណែកបក្សពួក៤នាក់ទៀតមិនទាន់ត្រូវបានស្គាល់អត្តសញ្ញាណនៅឡើយ ព្រោះកំពុងរត់គេចខ្លួន ។ រីឯបុរសជាអាជីវករលក់គ្រឿងសមុទ្រដែលជាម្ចាស់ផ្ទះឈ្មោះឡុង សេងថៃ អាយុ៣៩ឆ្នាំ បាត់បង់អស់ក្តាមសមុទ្រ៥គីឡូក្រាម ប៉ុន្តែនេះពុំមែនទើបតែចាប់ផ្ដើមបាត់គ្រឿងសមុទ្រជាលើកដំបូងឡើយ ដោយកន្លងមកបានបាត់ជាបន្តបន្ទាប់មកហើយ ។
បុរសរូបនេះបានបញ្ជាក់ថា នៅមុនពេលកើតហេតុគាត់បានដេកលង់លក់ដោយមិនដឹងខ្លួនឡើយ ខណៈនោះក្រុមជនសង្ស័យបាននាំគ្នាទៅធ្វើសកម្មភាពលួចគ្រឿងសមុទ្រនៅក្នុងធុងក្លាស្សេរបស់គាត់ ។ ប៉ន្តែនៅពេលយកបានខ្លះហើយ ស្រាប់តែត្រូវបានអ្នកជិតខាងឃើញក៏ស្រែកឆោឡោឡើង បង្កឲ្យមានការភ្ញាក់ផ្អើលទើបដេញតាមចាប់បានម្នាក់ ចំណែកបក្សពួកជនសង្ស័យចំនួន៤នាក់ទៀតបាននាំគ្នារត់ផាសក្រញាំបាត់អស់ ។ កន្លងមកគាត់បានខាតបង់ជាបន្តបន្ទាប់លក់ដូររកប្រាក់ចំណេញមិនឃើញទេ ដោយសារតែត្រូវចោរលួចយកគ្រឿងសមុទ្រជាញឹកញាប់ ហើយមិនដែលចាប់បានចោរម្ដងណាឡើយ ទើបតែពេលនេះចាប់បានម្នាក់ហើយនៅតែបាត់គ្រឿងសមុទ្រអស់៥គីឡូក្រាមទៀត ។
ក្រោយការចាប់ខ្លួនជនសង្ស័យខាងលើបុរសដែលជាអាជីវកររូបនោះបានប្រគល់ជូននគរបាលប៉ុស្តិ៍ចោមចៅ៣ ដើម្បីសាកសួរ និងកសាងសំណុំរឿងបញ្ជូនទៅផ្នែកព្រហ្មទណ្ឌខណ្ឌពោធិ៍សែនជ័យចាត់ការតាមច្បាប់ ៕
ចែករំលែកព័តមាននេះ