ខេត្តមណ្ឌលគិរី ៖ ទោះបីជាខេត្តមណ្ឌលគិរីមានព្រំប្រទល់ជាប់ជាមួយខេត្តរតនគិរី ដែលកំពុងផ្ទុះឡើងនូវជម្ងឺបេស្តជ្រូកអាហ្វ្រិកបានសម្លាប់សត្វជ្រូកអ្នកស្រុករាប់រយក្បាលបង្កជាការខាតបង់យ៉ាងធ្ងន់ធ្ងរ ប៉ុន្តែគិតរហូតមកដល់ដើមខែឧសភាឆ្នាំ ២០១៩ សម្រាប់ខេត្តមណ្ឌលគិរីមិនទាន់មានការឆ្លងជម្ងឺបេស្តជ្រូកអាហ្វ្រិកនោះទេ ខណៈអាជ្ញាធរកំពុងតាមដាន និង ដាក់វិធានការទប់ស្កាត់ការឆ្លងជម្ងឺនេះ ។
លោកសុង ឃាង ប្រធានមន្ទីរកសិកម្មរុក្ខប្រមាញ់ និងនេសាទខេត្តមណ្ឌលគិរីបានឲ្យដឹងថា ក្រោយជម្ងឺបេស្តជ្រូកអាហ្វ្រិកផ្ទុះឡើងនៅខេត្តរតនគិរី រដ្ឋបាលសាលាខេត្តមណ្ឌលគិរីបានបើកកិច្ចប្រជុំ និងបានចេញលិខិតអន្តរាគមន៍ទៅគ្រប់ច្រកព្រំដែនទាំងអស់មិនឲ្យមានការនាំសត្វជ្រូក ឬសាច់ជ្រូកពីប្រទេសវៀតណាមចូលមកនោះទេ ។ លោកក៏បានបញ្ជាទៅជំនាញពេទ្យសត្វឲ្យចុះតាមដានសកម្មភាពការចិញ្ចិមជ្រូករបស់កសិករគ្រប់កន្លែងដែរ និងឲ្យពួកគាត់រាយការណ៍ភ្លាម ប្រសិនមានករណីជ្រូកឈឺ ឬសង្ស័យថា មានផ្ទុកជម្ងឺបេស្តជ្រូកអាហ្វ្រិក ដើម្បីមានវិធានការទប់ស្កាត់ទាន់ពេលវេលា។លោកសុង ឃាង បន្តថា ការចរាចរសត្វជ្រូកពីខេត្តផ្សេងចូលមកខេត្តមណ្ឌលគិរីក៏មានការត្រួតពិនិត្យសុខភាពពីសំណាក់ពេទ្យសត្វ និងបាញ់ថ្នាំសម្លាប់មេរោគផងដែរមុនយកចូលកន្លែងសត្តឃាត ។
កសិករចិញ្ចិមសត្វជ្រូកលក្ខណៈគ្រួសារប្រមាណ៧០ក្បាល នៅភូមិអូរស្ពាន ក្រុងសែនមនោរម្យ លោកមាស រិទ្ធី បានប្រាប់ដែរថា ជម្ងឺបេស្តជ្រូកអាហ្វ្រិកនេះពិតជាកាចសាហាវណាស់ វាអាចសម្លាប់សត្វជ្រូកក្នុងរយៈពេលដ៏ខ្លី ហើយក្រោយមានករណីរីករាលដាលជម្ងឺប្រភេទនេះនៅខេត្តមណ្ឌលគិរី លោកបានបង្កើនការមើលថែសត្វជ្រូក និងបាញ់ថ្នាំសម្លាប់មេរោគច្រើនជាងធម្មតា ប៉ុន្តែទោះជាយ៉ាងណាលោកមិនបារម្ភអំពីជម្ងឺបេស្តជ្រូកអាហ្វ្រិកប៉ុន្មានទេ ព្រោះការចិញ្ចិមជ្រូករបស់លោក មិនបាននាំជ្រូកពីខាងក្រៅចូលថ្មីទេ ដូចនេះមានហានិភ័យឆ្លងតិចតួចបំផុត ។
កសិករដដែលបានប្រាប់ទៀតថា អ្វីដែលធ្វើឲ្យលោកព្រួយបារម្ភនោះ គឺបញ្ហាអាកាសធាតុទៅវិញទេ ព្រោះមួយរយៈចុងក្រោយនេះ អាកាសធាតុប្រែប្រួលលឿន ម្ដងក្ដៅ-ម្ដងត្រជាក់ អាចធ្វើឲ្យកូនជ្រូកងាយ និងប្រឈមជាមួយជម្ងឺផ្សេងៗ ។
សូមបញ្ជាក់ថា បើតាមលោកប៉ែន ប្រុស ប្រធានការិយាល័យពេទ្យសត្វបានឲ្យដឹងជម្ងឺប៉េស្តជ្រូកអាហ្វ្រិកមិនបង្កឲ្យឆ្លងដល់មនុស្សទេ វាគ្រាន់តែឆ្លងទៅសត្វដូចគ្នា បណ្តាលឱ្យស្លាប់ភ្លាមៗបាន និងធ្វើឲ្យប្រជាពលរដ្ឋដែលចិញ្ចឹមជ្រូកមានការខាតបង់តែប៉ុណ្ណោះ ហើយមន្ត្រីជំនាញពេទ្យសត្វខេត្តក៏កំពុងយកចិត្តទុកដាក់តាមដានបញ្ហានេះដែរបង្កាមិនឲ្យមានកើតឡើងនូវជម្ងឺប្រភេទនេះ ។ លោកបញ្ជាក់ថា បច្ចុប្បន្ននៅខេត្តមណ្ឌលគិរីមានជ្រូកចិញ្ចឹមប្រហែល១,១២៩០ក្បាលប្រហាក់ប្រហែល និងឆ្នាំមុន និងមានតែការចិញ្ចិមជ្រូកលក្ខណៈគ្រួសារប៉ុណ្ណោះ ៕
ចែករំលែកព័តមាននេះ