រាជធានីភ្នំពេញ ៖ ជនសង្ស័យជាជនជាតិវៀតណាមម្នាក់ត្រូវបានប្រជាពលរដ្ឋនាំគ្នាចាប់ខ្លួន បានប្រគល់អោយសមត្ថកិច្ចចាត់ការតាមច្បាប់ បន្ទាប់ពីឃើញម្ចាស់មិនដកសោចេញពីម៉ូតូ ហើយជនសង្ស័យក៏បានធ្វើសកម្មភាពលួចជិះគេចខ្លួនពីតាំងពីទួលសង្កែ រហូតដល់ទួលគោកតែរត់មិនរួច ។
ហេតុការណ៍ខាងលើនេះបង្កអោយមានការភ្ញាក់ផ្អើលកាលពីវេលាម៉ោង៨និង៣០នាទីព្រឹក ថ្ងៃទី៤ ខែឧសភា ឆ្នាំ២០១៩ ក្នុងភូមិបាក់ទូក សង្កាត់ទួលសង្កែទី១ ខណ្ឌឬស្សីកែវ។
ជនសង្ស័យម្នាក់ខាងលើឈ្មោះឡង យ៉ាំងងិន ភេទប្រុស អាយុ៣៥ឆ្នាំ ជាជនជាតិវៀតណាម ស្នាក់នៅម្តុំអន្លង់ក្ងាន សង្កាត់ឃ្មួញ ខណ្ឌសែនសុខ ។ ចំណែកជនរងគ្រោះជាម្ចាស់ម៉ូតូឈ្មោះជីវ អង្គារ៉ា ភេទប្រុស អាយុ៥០ឆ្នាំ មុខរបរលក់ដូរ ស្នាក់នៅផ្ទះលេខ២៩ ផ្លូវលេខ៨ ក្នុងបុរីពភពថ្មី ភូមិទួលគោក សង្កាត់ទួលសង្កែទី១ ខណ្ឌឫស្សីកែវ។ រីឯម៉ូតូមួយគ្រឿងដែលត្រូវជនសង្ស័យលួចនោះម៉ាកហុងដាឌ្រីម ពណ៌ខ្មៅ ពាក់ស្លាកលេខ ភ្នំពេញ ១A-៨១៣៣ ស៊េរីឆ្នាំ២៩៩៨។
តាមប្រភពពីម្ចាស់ជាជនរងគ្រោះបានអោយដឹងថា នៅមុនពេលកើតហេតុ គាត់បានជិះម៉ូតូមួយគ្រឿងខាងលើចេញពីផ្ទះទៅទិញនំបញ្ចុកហូប ហើយក៏បានចុះពីលើម៉ូតូដោយពុំបានដកសោចេញនោះទេ ស្រាប់តែមានជនសង្ស័យម្នាក់បានធ្វើសកម្មភាពលួចជិះគេចខ្លួនបាត់ ។
តាមប្រភពដដែលបានអោយដឹងទៀតថា ភ្លាមៗនោះ មានអ្នកជិតខាងឃើញទាន់ ក៏បានស្រែកចោរៗ ហើយអ្នករត់ម៉ូតូឌុប និងអ្នកនៅក្បែរកន្លែងកើតហេតុប្រមាណ៤ទៅ៥នាក់ក៏បាននាំគ្នាជិះម៉ូតូដេញតាម រហូតជិតដល់អេអិន ក្នុងសង្កាត់ផ្សារដេប៉ូ៣ ខណ្ឌទួលគោក ពេលនោះជនសង្ស័យក៏បានជួបគ្រោះថ្នាក់ចរាចរណ៍បណ្តាលឱ្យដួលម៉ូតូ ហើយក៍ត្រូវប្រជាពលរដ្ឋចាប់ខ្លួនបាន និងប្រគល់អោយនគរបាលប៉ុស្តិ៍ផ្សារដេប៉ូ៣ រួចនគរបាលប៉ុស្តិ៍ផ្សារដេប៉ូ៣ក៏ប្រគល់បន្តទៅអោយសមត្ថកិច្ចប៉ុស្តិ៍ទួលសង្កែទី១ដើម្បីចាត់ការតាមច្បាប់៕
ចែករំលែកព័តមាននេះ