ប្រទេសឥណ្ឌា ៖ ព្យុះឈ្មោះ FANI ជាព្យុះខ្លាំងបំផុតវាយប្រហារលើប្រទេសឥណ្ឌា ចាប់តាំងពី៣ថ្ងៃមកហើយ បណ្ដាលឲ្យមនុស្សស្លាប់យ៉ាងតិច១២នាក់ នៅរដ្ឋអូឌីសា ភាគខាងកើតប្រទេស មុនពេលវាបោកបក់ទៅដល់ប្រទេសបង់ក្លាដែស នាថ្ងៃទី៤ ឧសភា ដែលនៅទីនោះមនុស្សប្រមាណជាជាង១លាននាក់ត្រូវជម្លៀសចេញ។
ព្យុះស៊ីក្លូននោះបើតាមផ្នែកឧតុនិយមឥណ្ឌាថា បានបាត់បង់កម្លាំងចាប់តាំងពីបោកបក់ដល់ដែនដីឥណ្ឌាកាលពីថ្ងៃទី៣ឧសភា ហើយក្លាយជាព្យុះធម្មតា។ មនុស្សប្រមាណជា១,២លាននាក់ត្រូវបានជម្លៀសចេញ ពីបណ្ដាតំបន់ឆ្នេរសមុទ្រដែលទឹកងាយជន់លិចរបស់បង់ក្លាដែស ដោយនៅទីនោះគេបានបើកជម្រកដល់ទៅ៤០០០កន្លែង។ ព្យុះនេះបណ្ដាលឲ្យមានការខូចខាត និងមនុស្សស្លាប់៩នាក់នៅបង់ក្លាដែស។
នៅឥណ្ឌាដែលមនុស្សជាង១លាននាក់ត្រូវជម្លៀសចេញ ព្យុះបានអមដោយភ្លៀងធ្លាក់យ៉ាងខ្លាំងនិងខ្យល់បោកបក់ក្នុងល្បឿនដល់២០០គីឡូម៉ែត្រក្នុង១ម៉ោង បណ្ដាលឲ្យមនុស្ស១២នាក់ស្លាប់ និងបង្កការខូចខាតច្រើនមហិមា។ បណ្ដាដើមឈើត្រូវរលំបាក់ អគារនានារងការខូចខាត បណ្ដាបង្គោលអគ្គិសនីនិងទូរស័ព្ទត្រូវដួលរលំ ពិសេសនៅរដ្ឋអូឌីសា៕
ចែករំលែកព័តមាននេះ