ខេត្តត្បូងឃ្មុំ ៖ មានហេតុការណ៍ភ្ញាក់ផ្អើលមួយបានកើតឡើង ដោយកម្មករឡើងលើបង្គោលអង់ទែនទូរស័ព្ទបានធ្លាក់ស្លាប់គួរឲ្យអាណោចអាធម៌ កាលពីវេលាម៉ោង៣និង៣០នាទីរសៀលថ្ងៃទី០៥ ឧសភា ២០១៩ ស្ថិតនៅដីភូមិព្រីង ឃុំមង់រៀវ ស្រុកត្បូងឃ្មុំ ក្នុងខណៈពេលឡើងទៅមើលថតយករូបភាពក្រុមកម្មករធ្វើការជួសជុលអង់តែននោះ ។
លោកវរសេនីយ៍ត្រី សេង មី អធិការរងនគរបាលស្រុកត្បូងឃ្មុំទទួលផែនព្រហ្មទណ្ឌប្រាប់ថា នៅពេលមុនកើតហេតុមានកម្មករចំនួន៣នាក់ក្នុងនោះមាន១-ឈ្មោះសុខ សាន់ ភេទប្រុស អាយុ២៤ឆ្នាំ ២-ឈ្មោះសារឿន ភេទប្រុស អាយុ៣៧ឆ្នាំ និងឈ្មោះសុខអិន ភេទប្រុស អាយុ២៧ឆ្នាំ បានឡើងលើអង់តែនដែកដោយសុទ្ធតែមានខ្សែក្រវ៉ាត់ការពារសវុត្ថិភាព ដើម្បីរៀបឲ្យបច្ចេកទេសសេវាលើបង្គោលបានដំណើរការទៅបានល្អ ។
លោកវរសេនីយ៍ត្រី សេង មិ ប្រាប់បន្តថា បន្ទាប់មកស្រាប់តែមានឈ្មោះជ្រុយ សុខសាន់ ដែលនៅលើគេក្នុងចំណោមកម្មករ៣នាក់ដែលបានថតយកទិដ្ឋភាពពេលឡើងជួសជុលលើបង្គោល តែចៃដន្យដោយសារមិនបានពាក់ខ្សែក្រវ៉ាត់សុវត្ថិភាពថ្ពួកនឹងអង់តែនក៏របូតដៃ បណ្តាលឲ្យធ្លាក់មកដីកម្ពស់២០ម៉ែត្រស្លាប់ភា្លមៗ ។
ដោយមិនអស់ចិត្តក្រុមកម្មករបានបញ្ជូនអ្នករងគ្រោះទៅកាន់មន្ទីរពេទ្យស្រុកត្បូងឃ្មុំ ក្រោយពីបានដឹងហេតុការណ៍នេះសមត្ថកិច្ចបានប្រញាប់ចុះទៅមកដល់កន្លែងកើតហេតុ និងបានពិនិត្យលើរាងកាយសពឃើញថា បាក់ឆ្អឹងក បាក់ជើងឆ្វេង១កន្លែង បាក់ឆ្អឹងជំនី និងឆ្អឹងប្រអប់ទ្រូង មានស្នាមជាំឈាមត្រង់កខាងស្តាំ១កន្លែង និងចេញឈាមតាមច្រមុះ ហើយក៏បានធ្វើការសន្និដ្ឋានថា សពពិតជាបានស្លាប់ដោយធ្លាក់ពីលើអង់តែនមែន ។ សពត្រូវបានគេដឹកយកទៅធ្វើបុណ្យនៅស្រុកកំណើតក្នុងស្រុកគៀនស្វាយ ខេត្តកណ្តាល តាមប្រពៃណី ៕
ចែករំលែកព័តមាននេះ