ខេត្តក្រចេះ ៖ សមត្ថកិច្ចអះអាងថា និងបន្តស្រាវជ្រាវស្វែករកអ្នកនៅពីក្រោយបទល្មើសព្រៃឈើដ៏ធំមួយដែលក្រុមសមត្ថកិច្ចបានចុះបង្ក្រាបបាន កាលពីថ្ងៃទី៤ ឧសភានេះ នៅក្បែរនឹង ព្រំដែនប្រទេសវៀតណាម ខណៈដែលឈើចំនួនជាង១កំណាត់ទាំងនោះត្រូវបានលើកដាក់លើឡានធំមួយគ្រឿង បម្រុងឆ្ពោះឆ្លងដែនលើចម្ងាយផ្លូវតែជាង៣គីឡូម៉ែត្រតែប៉ុណ្ណោះ ។
មេបញ្ជាការអាវុធហត្ថខេត្តក្រចេះលោកឧត្តមសេនីយ៍ត្រី សាន្ត ប៊ុនថាន បានឲ្យដឹងនៅថ្ងៃទី៥ ឧសភានេះទៀតថា ឈើទាំងនេះសុទ្ធសឹងជាប្រភេទឈើលេខ១ មានមុខកាត់ធំៗត្រូវបានកម្លាំងអាវុធហត្ថខេត្ត និងស្រុកចុះធ្វើការរុករក និងប្រទះឃើញមានមួយចំនួនត្រូវបានលើកដាក់ឡាន និងមួយចំនួនទៀតត្រូវបានដាក់នៅរាយប៉ាយពេញក្នុងព្រៃកៅស៊ូចំនុចឃុំ២ធ្នូ ស្រុកស្នួល ។ លោកថា ឈើទាំងអស់នេះ គឺត្រូវធ្វើការចាប់រឹបអូសទាំងស្រុងពីក្រុមសមត្ថកិច្ចអាវុធ ។
បើតាមលោកឧត្តមសេនីយ៍ត្រី សាន្ត ប៊ុនថាន បានចាត់ទុកថា នេះជាបទល្មើសដឹកជញ្ជូនឈើខុសច្បាប់ជាលក្ខណៈទ្រង់ទ្រាយធំមួយទៀត នៅតាមតំបន់ព្រំដែនដែលត្រូវបានកម្លាំងរបស់លោកចុះបង្ក្រាបបានជាលើកទី២ ។ ហើយករណីមួយនេះដែរក៏ត្រូវបានលោកអះអាងថា ក្រៅពីធ្វើការបង្ក្រាប និងបានរឹបអូសយកឈើប្រគល់ឲ្យមន្ត្រីជំនាញកម្លាំងសមត្ថកិច្ច និងបន្តស្រាវជ្រាវរកម្ចាស់ ឬក៏អ្នកដែលនៅពីក្រោយបទល្មើសឈើទាំងនេះ ដើម្បីអនុវត្តតាមផ្លូវច្បាប់ ។
នៅមិនទាន់មានសេចក្តីរាយការណ៍ណាមួយទម្លាយឲ្យដឹងថា ឈើខុសច្បាប់ទាំងនេះជាកម្មសិទ្ធរបស់ជនណាម្នាក់នៅឡើយនោះទេ ។ ចំនែកឯកការដឹកជញ្ជូនក៏គេមិនទាន់ដឹងថា ឈ្មួញធ្វើឡើងតាមរបៀបណានោះដែរ ខណៈសព្វថ្ងៃបារាស់ត្រួតពិនិត្យរបស់កម្លាំងអាវុធហត្ថត្រូវបានដាក់ពង្រាយយ៉ាងច្រើនស្អេកស្កះស្ទើរគ្រប់កន្លែងនៅលើផ្លូវជាតិ ក្នុងទិសដៅបង្ក្រាបការដឹកជញ្ជូនឈើទៅវៀតណាមខុសច្បាប់ តែឈើមានចំនួនរាបរយម៉ែត្រគូប គឺនៅតែអាចមានការដឹកជញ្ជូនទៅស្តុកនៅតាមតំបន់ជាប់ព្រំដែនបាន ៕
ចែករំលែកព័តមាននេះ