ខេត្តបន្ទាយមានជ័យ ៖ តាមសេចក្តីរាយការណ៍បឋមបានឲ្យដឹងថា ក្មេងប្រុស២នាក់ ទៅឃ្វាលគោ ខណៈនោះមេឃកំពុងភ្លៀងក៏ស្រាប់តែរន្ទះបាញ់ស្លាប់ម្នាក់ របួសធ្ងន់ម្នាក់ និងរងគ្រោះដោយខ្យល់កន្ត្រាក់ប៉ះពាល់ចំនួន៣៩៤ខ្នង នៅល្ងាចថ្ងៃទី០៣ ខែឧសភា…
ខេត្តបន្ទាយមានជ័យ ៖ តាមសេចក្តីរាយការណ៍បឋមបានឲ្យដឹងថា ក្មេងប្រុស២នាក់ ទៅឃ្វាលគោ ខណៈនោះមេឃកំពុងភ្លៀងក៏ស្រាប់តែរន្ទះបាញ់ស្លាប់ម្នាក់ របួសធ្ងន់ម្នាក់ និងរងគ្រោះដោយខ្យល់កន្ត្រាក់ប៉ះពាល់ចំនួន៣៩៤ខ្នង នៅល្ងាចថ្ងៃទី០៣ ខែឧសភា ឆ្នាំ២០១៩ នៅខេត្តបន្ទាយមានជ័យ ។
សេចក្តីរាយការណ៍បានបន្តថា លោកឧត្តមសេនីយ៍ទោអាត់ ខែម ស្នងការនគរបាលខេត្តបន្ទាយមានជ័យបានប្រាប់ថា នៅពេលមេឃកំពុងភ្លៀងមានក្មេងប្រុសជនរងគ្រោះ២នាក់ ឃ្វាលគោត្រូវបានរន្ទះបាញ់ស្លាប់ម្នាក់និងរបួសម្នាក់ ហើយងាប់សត្វពាហនៈចំនួន២ក្បាល ដែលកើតឡើងនៅវេលាម៉ោង៤និង៣០នាទី ដែលនៅចង្ងាយប្រមាណ២៥០ម៉ែត្រ ស្ថិតភូមិទ្រយោឃុំភ្នំលៀប ស្រុកព្រះនេត្រព្រះ ។
លោកបានបញ្ជាក់ថា ខ្យល់កន្ត្រាក់បណ្តាលឲ្យប៉ះពាល់៣ស្រុកខាងលើនេះបានខូចខាតផ្ទះសម្បែងប្រជាពលរដ្ឋអស់ចំនួន៣៩៤ខ្នង ក្នុងនោះមាន១-ស្រុកមង្គលបូរី ខូចខាតអស់ចំនួន២១១ខ្នង ២-ស្រុកម៉ាឡៃ បណ្តាលឲ្យខូចខាតអស់ចំនួន១៧២ខ្នង ៣-ក្រុងសិរីសោភ័ណខូចខាតអស់ចំនួន១០ខ្នង ហើយរន្ទះបាញ់ងាប់គោ២ក្បាល ៤-ស្រុកព្រះនេត្រព្រះបណ្តាលខូចខាតផ្ទះ១ខ្នង និងរន្ទះបាញ់ស្លាប់ក្មេងប្រុស២នាក់ ម្នាក់ស្លាប់ និងម្នាក់ទៀតសន្លប់មិនទាន់ដឹងខ្លួនធ្ងន់ ។
លោកឧត្តមសេនីយ៍ទោ អាត់ ខែម បានបញ្ជាក់ថា ខេត្តបន្ទាយមានជ័យនៅអំឡុងខែមេសាដល់ខែឧសភា ឆ្នាំ២០១៩នេះ រងគ្រោះដោយខ្យល់កន្ត្រាក់បណ្តាលខូចខាតផ្ទះសម្បែងប្រជាពលរដ្ឋជិត៣ពាន់ខ្នង និងរន្ទះបាញ់ស្លាប់មនុស្ស៤នាក់ និងរបួសម្នាក់ និងរន្ទះបាញ់ស្លាប់សត្វពាហនៈចំនួន៥ក្បាល ។ ចឹងហើយសូមអំពាវនាវដល់បងប្អូនប្រជាពលរដ្ឋនៅពេលមេឃភ្លៀងសុំអោយមានការប្រុងប្រយ័ត្នការពារគ្រោះធម្មជាតិមានរន្ទះបាញ់ និងខ្យល់កន្ត្រាក់ដែលបង្កគ្រោះថ្នាក់គ្រប់ពេល ៕
ចែករំលែកព័តមាននេះ