ហុងកុង ៖ យោងតាមភ្នាក់ងារសារព័ត៌មាន Reuters កាលពីថ្ងៃទី ៣០ខែមេសាកន្លងមកនេះបានឲ្យដឹងថា នៅខែមិនា តម្លៃផ្ទះឯកជនក្នុងហុងកុងបានកើនឡើងដល់កម្រិតខ្ពស់ជាងគេតាំងពីខែកញ្ញាឆ្នាំ ២០១៦ មកព្រោះតែកំណើនតម្រូវការនិងជំនឿចិត្ត។ តម្លៃផ្ទះក្នុងទីក្រុងដែលមានប្រជាជនច្រើនកុះករនេះបានកើនឡើង ២.៩%កាលពីខែមុន ដែលជាការកើនឡើងបានបីខែជាប់ៗគ្នាមកហើយបន្ទាប់ពីកើនបាន ១.៦% កាលពីខែកុម្ភៈ។
តម្លៃផ្ទះហុងកុងបានធ្លាក់ចុះក្នុងកំឡុងពីខែសីហាដល់ធ្នូកាលពីឆ្នាំមុនព្រោះតែភាពតានតឹងពាណិជ្ជកម្មរវាងសហរដ្ឋអាមេរិកនិងប្រទេសចិន ព្រមទាំងកំណើនអត្រាការប្រាក់បន្ទាប់ពីកើនឡើងបាន ២៨ខែជាប់ៗគ្នាជាដើម។ លោក Thomas Lam ដែលជានាយកប្រតិបត្តិរបស់ Knight Frank បាននិយាយថា “កំណើននេះមានខ្ពស់ជាងការគិតទុក។ ប្រសិនបើសន្ទស្សន៍បន្តកើនឡើងក្នុងរយៈពេលពី២ទៅ៣ខែ ហើយមិនមានកត្តាអវិជ្ជមាននោះ តម្លៃផ្ទះអាចនឹងកើនឡើងបន្ថែមទៀតក្នុងរយៈពេលខ្លី”។
ក្នុងរយៈពេល១០ឆ្នាំកន្លងមកនេះ អត្រាការប្រាក់ដ៏ទាប កង្វះខាតការផ្គត់ផ្គង់ និងលំហូរមូលធនពីអតិថិជនមកពីប្រទេសចិនដីគោកបានជំរុញដល់តម្លៃផ្ទះក្នុងហុងកុងឲ្យកើនឡើងច្រើនជាង២០០%ទៅទៀត ដែលបង្កឲ្យប្រជាជនដែលរស់នៅក្នុងទីក្រុងមិនពេញចិត្តព្រោះតែពួកគេបាត់បង់សមត្ថភាពក្នុងការទិញផ្ទះ។ ក្រុមហ៊ុនផ្តល់សេវាកម្មប្រឹក្សាយោបល់អចលនទ្រព្យ CBRE បានកំណត់ថាហុងកុងជាទីផ្សារផ្ទះដែលមានតម្លៃខ្ពស់ជាងគេអស់៨ឆ្នាំជាប់ៗគ្នាមកហើយ ដោយមានតម្លៃផ្ទះជាមធ្យមស្មើប្រមាណ ១.២លានដុល្លារ ឬ២,០៩១ដុល្លារក្នុងមួយហ្វីតការេ។
ក្រុមហ៊ុន JLL វិញបាននិយាយកាលពីថ្ងៃច័ន្ទមកថា ការទម្លាក់ពន្ធរត់ឯកសារកាលពីត្រីមាសទី១បានបង្ហាញថាអតិថិជនភាគច្រើនជាអតិថិជនទិញផ្ទះដំបូង។ ខណៈដែលទីផ្សារអចលនទ្រព្យចាប់ផ្តើមងើបឡើងវិញ ក្រុមហ៊ុនអចលនទ្រព្យកំពុងតែលក់ផ្ទះក្នុងគម្រោងថ្មីៗក្នុងតម្លៃខ្ពស់ជាងប៉ុន្មានខែមុនផងដែឬ៕
ចែករំលែកព័តមាននេះ