រាជធានីភ្នំពេញ ៖ កាលពីជំនាន់មុនប្រជាជនកម្ពុជាតែងមានទំលាប់មួយទុកលុយនៅស្រោមខ្នើយ ឬទុកនៅក្នុងកូនជ្រូក ជាមធ្យោបាយក្នុងការសន្សំប្រាក់ផ្សេងៗពីគ្នា ប៉ុន្តែរហូតមកដល់ពេលនេះ ការសន្សំប្រាក់តាមមធ្យោបាយបែបនេះ ត្រូវបានកាត់បន្ថយចោលអស់ជាច្រើន ក្រោយពេលវត្តមានធនាគារ និងមីក្រូហិរញ្ញវត្ថុកាន់តែច្រើន បានចាប់បដិសន្ធិនៅក្នុងប្រទេសកម្ពុជា ។ បច្ចុប្បន្ននេះប្រជាជនបានយកធនាគារ និងមីក្រូហិរញ្ញវត្ថុ ជាកន្លែងរក្សាប្រាក់របស់ពួកគេ និងជាវិធីសាស្ត្រ ក្នុងការសន្សំប្រាក់ផង និងធ្វើប្រតិបត្តិការផ្សេងៗពាក់ព័ន្ធនឹងមុខជំនួញផង ។
បើតាមម្ចាស់ធនាគារនិងមីក្រូហិរញ្ញវត្ថុនានាក្នុងប្រទេសកម្ពុជា ក៏ដូចជារបាយការណ៍របស់ធនាគារជាតិជាដើម បានបញ្ជាក់ថាប្រាក់បញ្ញើនៅក្នុងប្រព័ន្ធធនាគារនិងមីក្រូហិរញ្ញវត្ថុ បានកើនឡើងជាបន្តបន្ទាប់ជាក់ស្ដែង នៅដំណាច់ឆ្នាំ ២០១៨ កន្លងទៅប្រាក់បញ្ញើក្នុងប្រព័ន្ធធនាគារបានកើនឡើងដល់ ២២,១ប៊ីលានដុល្លារ កើនឡើង១៥,៣ភាគរយ ធៀបនឹងឆ្នាំមុន ។ ដោយឡែកអ្នកដែលបានផ្ញើប្រាក់នៅក្នុងប្រព័ន្ធធនាគារក៏បានកើនឡើងដល់ ៦,២លាននាក់ ឬ គណនី ត្រឹមបំណាច់ត្រឹម ២០១៨ ។ បើតាមសេដ្ឋវិទូនានា ក៏បានបង្ហើបអោយដឹងផងដែរថា ការដាក់ប្រាក់បញ្ញើនៅក្នុងប្រព័ន្ធធនាគារនិងមីក្រូហិរញ្ញវត្ថុ វាមិនត្រឹមតែសុវត្ថិភាពប៉ុណ្ណោះទេ តែវាក៏បានជួយជំរុញចរន្តសាច់ប្រាក់អោយកាន់តែខ្លាំងថែមទៀតផង ជាក់ស្ដែងធនាគារនិងមីក្រូហិរញ្ញវត្ថុបានយកប្រាក់ដែលអតិថិជនខ្លួនបានផ្ញើទៅផ្ដល់កម្ចីជូនអ្នកត្រូវការ ហើយយកការប្រាក់ពីឥណទាននោះ មកផ្ដល់ជូនអ្នកដាក់ប្រាក់បញ្ញើវិញ ។ តែបើសិនជាទុកប្រាក់នៅក្នុងផ្ទះ ក្នុងស្រោម ខ្នើយ ឬកូនជ្រូក វាមិនត្រឹមតែ មិនបានកើនឡើងហើយថែមទាំងមិនមានសុវត្ថិភាពទៀតផង ។
គួរបញ្ជាក់ថា បច្ចុប្បន្ននេះ មានគ្រឹះស្ថានមីក្រូហិរញ្ញវត្ថុជាច្រើនបានធ្វើប្រតិបត្តិការរបស់ខ្លួននៅក្នុងប្រទេសកម្ពុជា ក៏ប៉ុន្តែមានតែមីក្រូហិរញ្ញវត្ថុ៧ប៉ុណ្ណោះដែលអាចមានសិទ្ធិទទួលប្រាក់បញ្ញើពីអតិថិជន ។ ជាក់ស្តែងកញ្ញា ដាលី ដាលី ដែលជាអ្នកប្រើប្រាស់គណនីនៅធនាគារមួយរូបបានចែករំលែកនូវគន្លឹះសំខាន់ៗមួយចំនួនដែលរូបកញ្ញាផ្ទាល់និងក្រុមគ្រួសារដែលមានឳពុក-ម្តាយជាអ្នកជំនួញបានបញ្ជាក់ថា ការសន្សំលុយនៅក្នុងកូនជ្រូក ឬក៏ការដាក់ក្រោមខ្នើយវាហួសសម័យនិងបង្កើតហានិភ័យខ្ពស់។ «ការពិត ក្រុមគ្រួសារខ្ញុំបានជ្រើសរើសការសន្សំតាមប្រព័ន្ធធនាគារផង និងធ្វើប្រតិបត្តិការក្នុងការផ្ទេរ ឬក៏ដក-ដាក់ តាមប្រព័ន្ធធនាគារ ព្រោះវាមានសុវត្តិភាព ងាយស្រួល ជាពិសេសគឺមិនមានការព្រួយបារម្មណ៍ពីការប្លន់នៅតាមផ្ទះ ឬបាត់បង់ដោយប្រការណាមួយ» ។ កញ្ញាដាលី ដាលី ដែលបច្ចុប្បន្នបានមានគណនីសន្សំចំនួនពីរបញ្ជាក់។
ចែករំលែកព័តមាននេះ