ខេត្តព្រះវិហារ ៖ អាជីវករនៅច្រកទ្វាអានសេះព្រំដែនកម្ពុជាថៃ នៃខេត្តព្រះវិហារ កំពុងតែកាក់កប និងរកបានប្រាក់ចំណូលប្រចាំថ្ងៃច្រើនគួរសម តាមរយៈការលក់ផ្សិតប៉ក់ ជារៀងរាល់ថ្ងៃ ក្នុងចន្លោះចាប់ពី១តោនឡើងទៅ ឲ្យជនជាតិថៃ សម្រាប់យកទៅធ្វើជាម្ហូបអាហារដ៏ពេញនិយមរបស់ពួកគេ ។
អ្នកស្រី ថន ស្រីមុំ ជាអាជីវករលក់ដូរនៅក្នុងផ្សារច្រកទ្វាអានសេះទឹកដីកម្ពុជា បានឲ្យដឹងថា ចាប់ពីពាក់កណ្តាលខែមេសា នេះទៅ អាជីវករនៅច្រកទ្វារអានសេះបាននាំគ្នាប្រមូលទិញផ្សិតប៉ក់មកពីខាងក្រៅខេត្តនានា ដើម្បីយកមកលក់ឲ្យជនជាតិថៃ ដែលចូលមកទិញជារៀងរាល់ថ្ងៃ បានតម្លៃច្រើនគួរសមដែរ ។ ផ្សិតប៉ក់នេះ នៅពេលដែលមានភ្លៀងធ្លាក់ផ្សិតនេះនឹងដុះ រហូតដល់ពេលដែលភ្លៀងធ្លាក់ជោកជាំទើបផ្សិតនេះឈប់ដុះ ហើយកសិករអាចដើរជីកផ្សិតនេះបានយកមកលក់ចាប់ពីពាក់កណ្តាលខែមេសា រហូតដល់ខែកក្កដា ទើបផ្សិតនេះផុតរដូវ ។
អ្នកស្រីបានបន្ថែមថា ក្នុងមួយថ្ងៃៗ អាជីវករនៅក្នុងផ្សារច្រកទ្វាអានសេះនេះ អាចលក់បានចន្លោះពី២០គីឡូក្រាម ទៅ៥០គីឡូក្រាម ដោយក្នុងមួយគីឡូក្រាម មានតម្លៃចាប់ពី៤៥០បាត ទៅ៥០០បាត ទៅតាមគុណភាពផ្សិត ហើយអាចឲ្យអាជីវកររកប្រាក់ចំណូលបានក្នុងមួយថ្ងៃ ចន្លោះពី២ពាន់បាត ទៅ៥ពាន់បាតផងដែរ ។
អ្នកស្រីបានបន្តទៀតថា ក្នុងរដូវនេះក្រៅពីផ្សិតប៉ក់នោះ អាជីវករក៏មានបន្លែព្រៃជាច្រើនមុខទៀត ដូចជាផ្កាចាហ៊ួយ និងស្លឹកព្រិចជាដើម ពោលគឺអាជីវករនៅទីនោះ លក់បន្លែព្រៃទៅតាមរដូវនីមួយៗ ហើយបន្លែទាំងអស់នេះជាអាហារដ៏ពេញនិយមបំផុតរបស់ជនជាតិថៃ ។
ជាមួយគ្នានេះ ជនជាតិថៃម្នាក់ដែលបានចូលមកទិញបន្លែ និងទំនិញផ្សេងៗនៅទឹកដីកម្ពុជាក្នុងផ្សារច្រកទ្វារអានសេះនេះ បានលើកឡើងថា មូលហេតុដែលពួកគេបាននាំគ្នាមកទិញផ្សិតប៉ក់ ក៏ដូចជាបន្លែព្រៃផ្សេងៗទាំងនេះពីអាជីវករខ្មែរ ដោយសារតែនៅក្នុងទឹកដីថៃពុំសូវមានបន្លែប្រភេទទាំងអស់នេះទេ ម្យ៉ាងវិញទៀតនៅក្នុងព្រៃទឹកដីរបស់ពួកគាត់សម្បូរគ្រាប់មីន ដូច្នេះហើយទើបពុំមាននរណាម្នាក់ ចូលទៅរកបន្លែទាំងនេះយកមកលក់ ៕
ចែករំលែកព័តមាននេះ