រាជធានីភ្នំពេញ ៖ ចាប់តាំងពីដើមខែមករាឆ្នាំ២០១៩ តម្លៃប្រេងឥន្ធនៈលក់រាយ នៅតាមស្ថានីយ៍នានាក្នុងប្រទេសកម្ពុជា បាននឹងកំពុងឡើងថ្លៃជាបន្តបន្ទាប់ ខណៈអ្នកប្រើប្រាស់បានលើកឡើងថាតម្លៃសាំងលក់រាយឡើងថ្លៃលឿនជាងធ្លាក់ថ្លៃ ជាក់ស្តែងសម្រាប់អត្រាថ្មីនេះភ្លេចៗខ្លួន គឺតម្លៃសាំងលក់រាយមានតម្លៃជិត ៤០០០ រៀលក្នុងមួយលីត្រ ។
ក៏ប៉ុន្តែការឡើងតម្លៃប្រេងឥន្ធនៈលក់រាយនាពេលនេះ ហាក់មានផលប៉ះពាល់មួយចំណែកដល់អាជីវកម្មខ្នាតតូចមួយចំនួន ដែលថ្មីៗនេះបានជាវម៉ាស៊ីនភ្លើងប្រើសាំង ចំណែកបងប្អូនដែលជាវម៉ាស៊ីនភ្លើងធំៗបែបឃ្លុប ប្រើប្រាស់ម៉ាស៊ូតគឺមិនប្រឈមមុខនោះទេ ។«ទើបតែជាវម៉ាស៊ីនភ្លើងខ្នាតតូចប្រើសាំងដែលមានកម្លាំង ៤ គីឡូ ជិត ១ ខែសោះ ស្រាប់តែឥឡូវប្រេងសាំងក៏ឡើងទៀត ហើយភ្លើងរដ្ឋក៏ដាច់ទៀត មុខរបរតូចតាចដូចខ្ញុំពិបាកណាស់ ត្រូវចំណាយអស់ថ្លៃសាំងច្រើនតាំងពីប្រើម៉ាស៊ីនភ្លើងមក » ។ នេះជាការលើកឡើងរបស់លោក សីហា ដែលទើបតែជាវម៉ាស៊ីនភ្លើងប្រើសាំងសម្រាប់បម្រើការនៅអាជីវកម្មខ្នាតតូចរបស់ខ្លួន ។
បើយោងតាមសេចក្តីប្រកាសរបស់ក្រសួង ពាណិជ្ជកម្មកម្ពុជា តាំងពីដើមឆ្នាំ ២០១៩ ពោលគឺជាប់ពីថ្ងៃទី០១ដល់ថ្ងៃទី១៥មករា តម្លៃប្រេងឥន្ធនៈលក់រាយ មានតម្លៃត្រឹមតែ ៣២០០រៀលប៉ុណ្ណោះក្នុងមួយលីត្រ ចំពោះប្រេងសាំងធម្មតា ហើយវាបានឡើងថ្លៃជាបន្តបន្ទាប់ រយៈពេល១០ថ្ងៃម្ដង រឺ ២សប្ដាហ៍ម្ដង ក្នុងកម្រិត៥០រៀលក្នុងមួយលីត្រ ឬ១០០រៀលក្នុងមួយលីត្រ ។ ដោយឡែកចាប់ពីថ្ងៃទី០១ ដល់ថ្ងៃទី ១៥ ខែឧសភានេះ ក្រសួងពាណិជ្ជកម្មបានកំណត់តម្លៃជាថ្មីសម្រាប់សាំងធម្មតាលក់រាយនៅតាមស្ថានីយ៍នានាទូទាំងប្រទេស បានកើនឡើងដល់៤០០០រៀលក្នុងមួយលីត្រ ពោលគឺ លក់អតិបរិមា ៣៩៥០រៀលក្នុងមួយលីត្រ ចំណែកសាំងស៊ុបពែរមិនស្ថិតនៅក្នុងការកំណត់របស់ក្រសួងឡើយ ដូច្នេះអាជីវករអាចលក់ក្នុងតម្លៃណាក៏បាន ដែលមានការប្រកួតប្រជែង ។
អ្នកនាំពាក្យក្រសួងពាណិជ្ជកម្ម លោក ស៊ាង ថៃ ធ្លាប់បានលើកឡើងកន្លងមកថា ការកំណត់រូបមន្តតម្លៃប្រេងឥន្ធនៈនេះ មិនមែនជាសម្រេចរបស់កម្ពុជាឡើយ គឺមានការផ្ញើតម្លៃដើមពីប្រទេសនាំចូល ដើម្បីគន់គូរតម្លៃសមស្របណាមួយសម្រាប់ប្រជាជនកម្ពុជា ក្នុងគោលបំណងជួយសម្រួលដល់ជីវភាពរបស់ពលរដ្ឋដែលត្រូវការប្រើប្រាស់សាំងជាចាំបាច់ ។ អ្នកនាំពាក្យរូបនេះ បានអោយដឹងទៀតថា ការកំណត់តម្លៃប្រេងឥន្ធនៈ នៅតាមស្ថានីយ៍នានាក្នុងប្រទេសកម្ពុជានេះ គឺធ្វើឡើងដោយមានការឯកភាពពីក្រសួងពាក់ព័ន្ធ ដូចជាក្រសួងសេដ្ឋកិច្ច និងហិរញ្ញវត្ថុ ក្រសួងពាណិជ្ជកម្ម និងក្រសួងរ៉ែ និងថាមពល ហើយក៏មានការយល់ព្រមពីក្រុមហ៊ុននិងម្ចាស់ស្ថានីយ៍ប្រេងឥន្ធនៈនៅក្នុងប្រទេសកម្ពុជាផងដែរ ដើម្បីសម្រួលអោយតម្លៃប្រេងសាំងអាចទទួលយកបានពីអ្នកប្រើប្រាស់ ។ ដូច្នេះ តាមការសម្រេចរបស់អន្តរជាតិ បានឯកភាពគ្នាដោយកំណត់រយៈពេល១០ម្ដងឬ២សប្ដាហ៍ម្ដង ។ ក្នុងរយៈពេលនោះ វាអាចនឹងឡើងអាចនឹងចុះ អាស្រ័យទៅលើទីផ្សារប្រេងអន្តរជាតិ និងទីផ្សារប្រេងនៅប្រទេសដែលកម្ពុជានាំចូល ។
តាមលោកស៊ាង ថៃ បានបញ្ជាក់ផងដែរថា បច្ចុប្បន្ននេះកម្ពុជាបាននាំចូលប្រេងឥន្ធៈពីប្រទេសជាច្រើនមកផ្គត់ផ្គង់លើទីផ្សារប្រទេសកម្ពុជា ដូចជាពីប្រទេស វៀតណាម ប្រទេសថៃ ប្រទេសសឹង្ហបុរី ប្រទេសម៉ាឡេស៊ី ប្រទេស អារ៉ាប់ ញូវហ្ស៊ើឡែន សហរដ្ឋអាមេរិក ចិន ប្រទេសកូរ៉េ ប្រទេសអាឡឺម៉ង់ ហុងកុង ហ្វីលីពីន ជប៉ុន អូស្ត្រាលី អេស្ប៉ាញ អ៊ីតាលី អ៊ុយក្រែន ឥណ្ឌា ហូឡង់ តួគី ប៉ូឡូញ ចក្រភពអង់គ្លេស កាណាដា ប្រទេសអារ៉ាប៊ីសាអូឌីត និងប្រទេសប៊ែលហ្ស៊ិក។ ហើយក្នុងមួយឆ្នាំ កម្ពុជានាំចូលប្រេងឥន្ធនៈប្រមាណ២លានតោន គិតជាទឹកប្រាក់ប្រមាណជាង១ពាន់លានដុល្លារអាមេរិក ៕
ចែករំលែកព័តមាននេះ