ប្រទេសថៃ ៖ ព្រះមហាក្សត្រីយានីថ្មីថៃ ជាអតីតឧត្ដមសេនីយ មេបញ្ជាការរងនៃកងអង្គរក្សព្រះមហាក្សត្រ ដែលទើបរៀបអភិសេកជាមួយព្រះមហាក្សត្រ គួរឲ្យភ្ញាក់ផ្អើលកាលពីថ្ងៃទី១ឧសភា ៣ថ្ងៃមុនព្រះអង្គឡើងគ្រងរាជ្យជាផ្លូវការ កាលពីថ្ងៃទី២ឧសភាបានយាងចូលរួមក្នុងពិធីផ្លូវការលើកដំបូង រួមជាមួយព្រះមហាក្សត្រមហាវ៉ាជីរ៉ាឡុងកន។ នេះបើតាមបណ្ដារូបភាពចេញផ្សាយដោយព្រះបរមរាជវាំង។
នាឱកាសនោះមហាក្សត្រីយានី ស៊ូធីដាវ៉ាជីរ៉ាឡុងកនណាអាយូធីយ៉ា បានឱនព្រះកាយគោរពរូបចម្លាក់បណ្ដាព្រះមហាក្សត្រនៃរជ្ជកាលចក្រី រួមជាមួយព្រះមហាក្សត្រមហាវ៉ាជីរ៉ាឡុងកន។
ព្រះនាងស៊ូធីដា ជាអតីតនារីបម្រើតាមយន្តហោះ បានរួមរស់ជាមួយព្រះមហាក្សត្រវ៉ាជីរ៉ាឡុងកន ចាប់តាំងពីច្រើនឆ្នាំមកហើយ។ ព្រះមហាក្សត្រអង្គនោះធ្លាប់រៀបអភិសេករួចហើយនិងមានការលែងលះគ្នា៣លើក។ ព្រះអង្គកាលពីមុនតែងយាងទៅកាន់ប្រទេសអាល្លឺម៉ង់ញឹកញាប់ សម្រាប់ជីវិតឯកជនរបស់ទ្រង់។
គេនៅពុំទាន់ដឹងនៅឡើយថាតើព្រះមហាក្សត្រីយានីថ្មីមានតួនាទីអ្វីពិតប្រាកដ នាចុងសប្ដាហ៍នេះក្នុងឱកាសនៃពិធីឡើងគ្រងរាជ្យសម្បត្តិរបស់ព្រះស្វាមី៕
ចែករំលែកព័តមាននេះ