ខេត្តមណ្ឌលគិរី ៖ ជនជាតិដើមភាគតិចរស់នៅស្រុកកោះញែកបានអះអាងថា មន្ត្រីដែនជម្រកការពារសត្វព្រៃភ្នំព្រេចបានគំរាមគំហែងប្ដឹងទៅតុលាការនិងបម្រុងវាយខ្នោះតំណាងក្រុមប្រជាពលរដ្ឋរបស់ខ្លួន ដែលនាំគ្នាចុះទៅល្បាតក្នុងព្រៃប្រទះឃើញក្រុមឈ្មួញកំពុងដឹកជញ្ជូនឈើខុសច្បាប់ដោយចោទថា នាយកដែនជម្រកលោក ហាន សាខន ជាអ្នកកាងក្រុមរកស៊ីឈើទាំងនោះ ។…
ខេត្តមណ្ឌលគិរី ៖ ជនជាតិដើមភាគតិចរស់នៅស្រុកកោះញែកបានអះអាងថា មន្ត្រីដែនជម្រកការពារសត្វព្រៃភ្នំព្រេចបានគំរាមគំហែងប្ដឹងទៅតុលាការនិងបម្រុងវាយខ្នោះតំណាងក្រុមប្រជាពលរដ្ឋរបស់ខ្លួន ដែលនាំគ្នាចុះទៅល្បាតក្នុងព្រៃប្រទះឃើញក្រុមឈ្មួញកំពុងដឹកជញ្ជូនឈើខុសច្បាប់ដោយចោទថា នាយកដែនជម្រកលោក ហាន សាខន ជាអ្នកកាងក្រុមរកស៊ីឈើទាំងនោះ ។
លោក ក្រើង តុលា បណ្តាញសហគមន៍ជនជាតិដើម ក្នុងខេត្តមណ្ឌលគិរីបាននិយាយកាលពីយប់ថ្ងៃទី០២ ឧសភា ថា «ប្រជាសហគមន៍ភូមិមេមុំ ឃុំរយ៉ ស្រុកកោះញែក ខេត្តមណ្ឌលគិរី នាំគ្នាចុះល្បាតការពារព្រៃឈើជាង៦០នាក់ ស្រី៤២នាក់ កាលពីថ្ងៃទី២៩ មេសា មកដល់ថ្ងៃទី០១ ឧសភា ឆ្នាំ២០១៩ បានជួបក្រុមប្រព្រឹត្តបទល្មើសកំពុងដឹកឈើបម្រុងទៅលក់នៅប្រទេសវៀតណាម តែលោកនាយកដែនជំរកសត្វព្រៃ
ភ្នំព្រេច លោក ហាន សាខន មកកាងថែមទាំងគំរាមគំហែងប្ដឹងទៅតុលាការ និងបំរុងវាយខ្នោះតំណាងក្រុមប្រជាពលរដ្ឋទៀតផង ពេលនេះ ប្រជាសហគមន៍គ្រោងរៀបចំពាក្យបណ្ដឹងដាក់នៅតុលាការនិងស្វែងរកមេធាវីមកការពារអាយុជីវិតពួកគាត់» ។
ឆ្លើយតបករណីនេះ លោក ហាន សាខន នាយកដែនជម្រកសត្វព្រៃភ្នំព្រេចបានឲ្យដឹងថា «នៅថ្ងៃទី០១ ឧសភា ឆ្នាំ២០១៩ រូបលោក(ដែនជម្រកសត្វព្រៃភ្នំព្រេច លំផាត់)បានដឹកនាំមន្ត្រីបរិស្ថានចំនួន០៨នាក់
ចុះពិនិត្យទីតាំងដែលប្រជាពលរដ្ឋប្រមូលផ្តុំគ្នា នៅចំណុចព្រៃចាស់មេម៉ុម ចំណុចនិយាមកា៦៨៨៣៩៩.១៤៥២២៨៨ក្នុងភូមិរវាក់ ឃុំរយ៉ ស្រុកកោះញែក។ក្រុមសមត្ថកិច្ចបានជួបប្រជាពលរដ្ឋចំនួន៣៥នាក់ ប្រុស២០នាក់ មកពីភូមិមេមុំ ភូមិរយ៉ក្រោម ភូមិស្រែហ៊ុយ ភូមិរវាក់ ស្រុកកោះញែក ពេលនោះក្នុងនាមលោកជាមន្ត្រីការពារបរិស្ថានបានណែនាំ និងផ្សព្វផ្សាយច្បាប់ស្តីពីតំបន់ការពារធម្មជាតិហើយលោកបានប្រាប់ប្រជាពលរដ្ឋដែលបានចូលមកប្រមូលផ្តុំគ្នាដើម្បីចាប់យកដីនៅក្នុងដែនជម្រកសត្វព្រៃលំផាត់ ខេត្តមណ្ឌលគិរីជាតំបន់ស្នូលដ៏សំខាន់»។
លោកហាន សាខន បន្តថា «ការដែលបងប្អូនមកនេះក្នុងគោលបំណងរស់នៅកន្លែងខាងលើគឺមិនបានទេ
វាជាការខុសច្បាប់។តែប្រជាពលរដ្ឋនិយាយថា ការចង់មករស់នៅទីតាំងនេះ ព្រោះជាដីដូនតារបស់គាត់ ។ទោះជាព្យាយាមពន្យល់ដល់ពួកគាត់ហាមចាប់យកដីនេះ តែបងប្អូនជនជាតិបានពោលថា ត្រូវតែយកដីនេះតាមចិត្តពួកគាត់ចង់ ហើយគាត់(អ្នកភូមិ)និយាយទៀតថា គាត់នៅប៉ុន្មានថ្ងៃក៏បានដែរ ទោះជាដេញពួកគាត់ក៏មិនទៅវិញដែរ» ។ លោក ហ៊ាន សាខន បានបញ្ជាក់ថា ការចោទប្រកាន់មន្ត្រីរបស់លោកទៅគម្រាមពួកគាត់ឬកាងបទល្មើសជាដើមនោះ គឺមិនពិតទេ។ដ្បិតពួកគាត់ត្រូវបានមេខ្យល់ ញ៉ុះញ៉ង់ឲ្យចូលទៅកាប់រានដីព្រៃអភិរក្សដើម្បីយកជាកម្មសិទ្ឋប៉ុណ្ណោះ។ហើយពេលនេះមន្ត្រីជំនាញកំពុងស្រាវជ្រាវវែកមុខរកមេខ្យល់ដើម្បីចាត់ការតាមផ្លូវច្បាប់។
ចំណែកក្រុមអ្នកតាមដានបរិស្ថានបានលើកឡើងថា បន្ទាប់ពីមានព័ត៌មានបង្កើតខេត្តថ្មីនៅតំបន់ស្រុកកោះញែក ហើយតម្លៃដីបានឡើងថ្លៃកប់ពពក គេសង្តេតឃើញថា ដីព្រៃរាប់រយហិចតាត្រូវបានគេលួចកាប់ទាំងយប់ទាំងថ្ងៃ វាត់ទីយកជាកម្មសិទ្ឋរៀងៗខ្លួន។រហូតដីព្រៃអភិរក្សក្នុងដែនជម្រកជាច្រើនក៏រងការកាប់បំផ្លាញខណៈក្រុមមន្ត្រីជំនាញទប់ស្កាត់ពីមុខគេទៅលួចកាប់ពីក្រោយដូចវែកចក ៕
ចែករំលែកព័តមាននេះ