ប្រទេសជប៉ុន ៖ កាសែតជប៉ុនមួយរាយការណ៍កាលពីថ្ងៃទី២ឧសភាថា នាយករដ្ឋមន្ត្រីជប៉ុនលោកស៊ីនហ្សូអាបេ អះអាងពីការត្រៀមខ្លួនរបស់លោកជួបជាមួយមេដឹកនាំកូរ៉េខាងជើង លោកគីមជុងអ៊ុនដោយគ្មានលក្ខខណ្ឌដើម្បីបង្កើតទំនាក់ទំនងការទូត រវាងប្រទេសជិតខាងទាំង២ ដែលមានទំនាស់នឹងគ្នាជាប្រវត្តិសាស្ត្រ។
លោកអាបេដែលធ្លាប់ប្រកាន់នយោបាយការបរទេសតឹងតែងនោះ នាពេលថ្មីៗនេះបានសម្រាលវោហាសាសន៍របស់លោក ចំពោះក្រុងព្យុងយ៉ាងហើយស្នើជួបជាមួយលោកគីមជុងអ៊ុន ដើម្បីដោះស្រាយ ជាពិសេសជម្លោះដ៏រសើបបំផុត ទាក់ទិននឹងការចាប់ពង្រត់ជនជាតិជប៉ុនទាំងឡាយ ដោយភ្នាក់ងារកូរ៉េខាងជើងកាលពីទសវត្សឆ្នាំ១៩៧០និង១៩៨០។
ក្នុងកិច្ចសម្ភាសន៍មួយជាមួយកាសែតSANKEI SHIMBUN កាលពីថ្ងៃទី១ឧសភាលោកអាបេថ្លែងថា ខ្ញុំចង់ជួបជាមួយលោកគីមជុងអ៊ុនដោយគ្មានលក្ខខណ្ឌ ហើយនិយាយគ្នាដោយត្រង់ទៅត្រង់មកជាមួយលោក ក្នុងស្មារតីបើកចំហ។ យើងនឹងពុំអាចលុបបំបាត់ការមិនទុកចិត្តគ្នាទៅវិញទៅមក រវាងជប៉ុននិងកូរ៉េខាងជើងបានឡើយ ប្រសិនបើខ្ញុំមិនជួបដោយផ្ទាល់ជាមួយលោកគីមទេនោះ។ ខ្ញុំសង្ឃឹមថាលោកគីមជាមេដឹកនាំមួយរូប ដែលអាចធ្វើការសម្រេចចិត្តជាយុទ្ធសាស្ត្រហើយមានការបត់បែន ចំពោះរឿងដែលល្អសម្រាប់ប្រជាជាតិលោក។
ជប៉ុនជាមហាអំណាចមួយ ដែលជាប្រវត្តិសាស្ត្រប្រកាន់ជំហរមឺុងម៉ាត់បំផុតចំពោះកូរ៉េខាងជើង ហើយម្យ៉ាងទៀតកូរ៉េខាងជើងធ្លាប់បាញ់មីស៊ីលកាត់ពីលើដែនដីខ្លួនទៀតផង។ ប៉ុន្តែមេដឹកនាំកូរ៉េខាងជើង ចាប់តាំងពី១ឆ្នាំមកហើយប្រកាន់យកជំហរកាត់បន្ថយ ភាពតានតឹងនៅឧបទ្វីបកូរ៉េ ហើយជម្រុញការវាយលុកខាងការទូតគួរឲ្យភ្ញាក់ផ្អើល។
បន្ទាប់ពីការជួបគ្នាជាច្រើនលើករយៈពេលប៉ុន្មានខែចុងក្រោយនេះ ជាមួយប្រធានាធិបតីកូរ៉េខាងត្បូង ប្រធានាធិបតីចិននិងប្រធានាធិបតីអាមេរិក លោកគីមបានជួបកាលពីសប្ដាហ៍មុនជាមួយប្រមុខវិមានក្រឹមឡាំងលោកវ្ល៉ាឌីមៀរពូទីន។
លោកអាបេបញ្ជាក់ប្រាប់កាសែតជប៉ុននោះថា លោកបានស្នើកាលពីថ្ងៃទី២៦មេសាកន្លងទៅនេះ ដល់ប្រធានាធិបតីអាមេរិក លោកដូណាល់ត្រាំឲ្យជួយលោក ក្នុងការដោះស្រាយបញ្ហានៃការចាប់ពង្រត់ជនជាតិជប៉ុន ពីសំណាក់ពួកភ្នាក់ងារក្រុងព្យុងយ៉ាង។
កូរ៉េខាងជើងទទួលស្គាល់កាលពីឆ្នាំ២០០២ពីការចាប់ពង្រត់ជនជាតិជប៉ុន១៣នាក់ ដើម្បីជួយបង្រៀនភាសានិងវប្បធម៌ជប៉ុន ដល់បណ្ដាចារបុរសរបស់ខ្លួន។ ១ខែបន្ទាប់ពីការសារភាពនោះជនជាតិជប៉ុន៥នាក់ត្រូវបានអនុញ្ញាតឲ្យវិលត្រឡប់មកប្រទេសពួកគេវិញ៕
ចែករំលែកព័តមាននេះ