រាជធានីភ្នំពេញ ៖ ទីបំផុត មន្ត្រីនគរបាលក្រសួងមហាផ្ទៃ ដែលបាញ់ជាច្រើនគ្រាប់ទៅលើរថយន្ដ២នាក់ប្តីប្រពន្ធនោះ ត្រូវសម្រេចបញ្ជូនទៅកាន់សាលាដំបូងរាជធានីភ្នំពេញ នារសៀលថ្ងៃទី០៣ ឧសភា នេះតែម្តង ដើម្បីចាត់ការតាមនិតិវិធី ។ ការសម្រេចឱ្យនាំខ្លួនជននេះ គឺបន្ទាប់ពីនាយឧត្តមសេនីយ៍សន្ដិបណ្ឌិត នេត សាវឿន អគ្គស្នងការនគរបាលជាតិ បានចេញបញ្ជារួចមក ។
ជនខាងលើឈ្មោះដួង ណាគ្រី ភេទប្រុស អាយុ៤៧ឆ្នាំ ជាមន្ត្រីនាយកដ្ឋានព្រហ្មទណ្ឌក្រសួងមហាផ្ទៃ ស្នាក់នៅផ្ទះលេខ ៩៤៣ ផ្លូវ៣៦០ សង្កាត់បឹងកេងកង៣ ខណ្ឌចំការមន បើករថយន្ត ម៉ាកឡិចស៊ិស RX-350 ពណ៌.ស ពាក់ស្លាកលេខសៀមរាប 2B-5153 (មានគ្នាជិះ៣នាក់)។
គួររំលឹដែរ នាយឧត្តមសេនីយ៍ នេត សាវឿន បញ្ជាឲ្យចាត់ការតាមវិន័យកងកម្លាំងលើអនុប្រធាននាយកដ្ឋានព្រហ្មទណ្ឌដែលបាញ់ក្រោយផ្ទុះបាតុភាពដេញបាញ់ផ្អើលកណ្តាលយប់ពីសំណាក់មន្ត្រីនគរបាលម្នាក់នេះលោកនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ បានដាក់បទបញ្ជាឲ្យចាត់ការតាមវិន័យកងកម្លាំងយ៉ាងម៉ឺងម៉ាត់ទៅលើអនុប្រធាននាយកដ្ឋានព្រហ្មទណ្ឌ លោកសក្តិ៤កន្លះ ដួង ណាគ្រី ដែលស្រវឹងស្រា ហើយបើករថយន្តដេញតាមរករឿង រហូតបាញ់ទៅលើរថយន្តអ្នកដ៏ទៃដែលជិះ២នាក់ប្តី-ប្រពន្ធចំនួន៥គ្រាប់ នៅក្បែរអធិការដ្ឋាននគរបាលខណ្ឌច្បារអំពៅ ។ នេះបើតាមលោកឧត្តមសេនីយ៍ផ្កាយ៣ ស ថេត ស្នងការនគរបាលរាជធានីភ្នំពេញ បានប្រាប់ឱ្យដឹងនៅព្រឹកថ្ងៃទី២ ឧសភា ។
ព័ត៌មានបន្ថែមនឹងមានផ្សាយជូនបន្តទៀត ។
ចែករំលែកព័តមាននេះ