ខេត្តក្រចេះ ៖ ក្នុងរយៈពេល២ថ្ងៃភ្លៀងធ្លាក់លាយឡំជាមួយខ្យល់កន្ត្រាក់បក់បោក បង្កជាមហន្តរាយបំផ្លិចបំផ្លាញលំនៅឋានតូចធំរបស់អ្នកភូមិមានចំនួន៦៧ខ្នង នៅតាមស្រុកចំនួន៣ក្នុងខេត្ត។
ផ្ទះចំនួន៦៧ខ្នងផ្ទះមានតូចមានធំនៅតាមតំបន់ផ្សេងគ្នាត្រូវបានរងការខូចខាតដោយសារអំណាចខ្យល់កន្ត្រាក់បោកបក់ ដោយមានផ្ទះខ្លះត្រូវបានបាក់រលំ ខ្លះប៉ើងដំបូល និងខ្លះត្រូវបានដួលបាក់ទ្រេត។
បាតុភូតគ្រោះធម្មជាតិខ្យល់កន្ត្រាក់នេះបានកើតមានឡើងក្នុងរយៈពេល២ ថ្ងៃជាប់ៗចាប់ពីថ្ងៃទី១-២ ខែឧសភា នេះ ត្រូវបានអាជ្ញាធរខេត្តបញ្ជាក់ក្នុងរបាយការណ៍ថា មិន បានបង្កឲ្យមានគ្រោះថ្នាក់ដល់អាយុជីវិតមនុស្សនោះទេ។
បើតាមរបាយការណ៍មួយបានបង្ហាញថា លំនៅឋានផ្ទះឈើតូច និងធំ ដែលបានរងការ ខូចខាត ដោយសារតែអំណាចខ្យល់កន្ត្រាក់ មានដូចជាស្ថិតនៅឃុំចង្ក្រង់ ស្រុកចិត្របុរី មានផ្ទះឈើតូចធំ ខ្លះប្រក់ក្បឿង និងខ្លះប្រក់សង្កសី មានចំនួន១៤ខ្នង ត្រូវបានរលំនិងខ្លះ ប៉ើងដំបូល។ ជាមួយគ្នានោះ ក៏នៅមានភូមិចំនួន២ ក្នុងឃុំកំពង់ដំរី ស្រុកឆ្លូង ដែលមានផ្ទះពលរដ្ឋចំនួន៥១ខ្នងផ្ទះបានរងការខូចខាតដូចគ្នា និងនៅស្រុកព្រែកប្រសព្វក៏មានផ្ទះឈើធំៗ ចំនួន២ខ្នងផ្ទះត្រូវបានរងការខូចខាតក្នុងគ្រោះមហន្តរាយខ្យល់កន្ត្រាក់ផងដែរ។
អាជ្ញាធរខេត្តក្រចេះ បានបញ្ជាក់ឲ្យដឹងនៅថ្ងៃទី៣ ខែឧសភា នេះ ដោយអះអាងថា អាជ្ញាធរនឹងចុះទៅពិនិត្យផលប៉ះពាល់ដោយសារមហន្តរាយគ្រោះធម្មជាតិខាងលើនេះ ដើម្បីរកលទ្ឋភាពជួយស្តារឡើងវិញខ្លះៗដល់ប្រជាពលរដ្ឋដែលរងគ្រោះ ៕
ចែករំលែកព័តមាននេះ