ខេត្តបាត់ដំបង ៖ តាមសេចក្តីរាយការណ៍បឋមបានឱ្យដឹងថា ដោយសារភ្លើងប្រច័ណ្ឌប្រពន្ធ ធ្វើឱ្យបុរសម្នាក់បានប៉ុនប៉ងធ្វើអត្តឃាតខ្លួនឯង តែមិនបានសម្រេច កាលពីវេលាម៉ោង១០និង១០នាទីព្រឹកថ្ងៃទី៣ ខែមេសា នៅភូមិប្រឡាយ១៨ ឃុំស្តុកប្រវឹក ស្រុករុក្ខគិរី។ នេះបើតាមប្រភពព័ត៌មានពីសមត្ថកិច្ច។
តាមប្រភពពីសមត្ថកិច្ចបានឱ្យដឹងថា បុរសខាងលើឈ្មោះហ៊ុត ហេង អាយុ៥៧ឆ្នាំ មុខរបររត់ម៉ូតូឌុប រស់នៅចំណុចភូមិ-ឃុំកើតហេតុខាងលើ។ ជនរងគ្រោះបានផឹកថ្នាំកណ្តុរដើម្បីបញ្ចប់ជីវិត និងបញ្ចប់បញ្ហាគ្រប់យ៉ាងដែលកំពុងកើតមាននៅក្នុងចិត្ត និងនៅក្នុងគ្រួសារ។ ប៉ុន្តែការធ្វើអត្តឃាតតាមរយៈការផឹកថ្នាំកណ្ដុរនេះមិនបានស្លាប់ដូចបំណងនោះទេ។ នេះបើតាមប្រភពព័ត៌មានពីសមត្ថកិច្ច ដោយសារតែក្រុមគ្រួសារដឹងទាន់ ហើយបញ្ជូនទៅសង្គ្រោះមន្ទីរពេទ្យភ្លាមៗ។
ពាក់ព័ន្ធនឹងការចង់សម្លាប់ខ្លួនរបស់បុរសខាងលើនេះ បើតាមព័ត៌មានបឋមដែលសមត្ថកិច្ចបានស្រង់សំដីពីសាច់ញាតិបានឱ្យដឹងថា មូលហេតុដែលបុរសខាងលើនេះប៉ងធ្វើអត្តឃាត គឺទំនងអាចពាក់ព័ន្ធនឹងភ្លើងប្រច័ណ្ឌប្រពន្ធ ប៉ុន្តែទោះបីយ៉ាងណា នេះគ្រាន់តែព័ត៌មានបឋមតែប៉ុណ្ណោះ រីឯរឿងពិតបែបណានោះ មានតែក្រុមគ្រួសារជនរងគ្រោះទេ ទើបដឹងច្បាស់ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ