ខេត្តកំពង់ឆ្នាំង ៖ ការជីកស្រះលើទួលបុរាណមួយកន្លែង បានត្រូវមន្ត្រីជំនាញចុះទៅពិនិត្យកាលពីដើមសប្តាហ៍នេះ ដើម្បីឱ្យដឹងច្បាស់ថា ទួលបុរាណនេះមានក្នុងបញ្ជីសារពើភ័ណ្ឌ ឬមានក្នុងផែនទីរបស់ក្រសួងពិតមែនដែរឬទេ ?
បើសិនមានមែន មន្ត្រីជំនាញនឹងកសាងសំណុំរឿងតាមផ្លូវច្បាប់ មិនទុកឱ្យអ្នកដែលរំលោភរួចខ្លួនឡើយ។ ទួលបុរាណដែលត្រូវបានគេលួចជីកស្រះនោះ ជាជើងទួលប្រាសាទសន្ធប់ចំណុចទួលតាអុង ស្ថិតក្នុងភូមិកង្កែប ឃុំច្រណូក ស្រុកកំ ពង់លែង ប៉ុន្តែគ្មានរូបរាងប្រាសាទនៅសល់ទេ គឺនៅសល់តែថ្មប្រាសាទ២-៣ដុំនៅលើដីប៉ុណ្ណោះ ។
លោក សុខ ធួក ប្រធានមន្ទីរវប្បធម៌និងវិចិត្រសិល្បៈខេត្ត មានប្រសាសន៍ថា ពិតជាមានការជីកស្រះលើទួលខាងលើមែន ហើយបើទួលនេះជាទួលបុរាណពិតមែន មន្ទីរជំនាញនឹងរៀបចំឯកសារប្តឹងអ្នកប្រព្រឹត្តបទល្មើសទៅតាមផ្លូវច្បាប់ ។ មូលហេតុដែលលោកនិយាយបែបនេះ ដោយសារទួលនេះវាបានរាបស្ទើរក្លាយជាដីស្រែទៅហើយ ។ ម្យ៉ាងវិញទៀត ក្រោយពីពិនិត្យនិងវាស់វែងហើយ លោកនឹងដកឃ្លាមកស្រាវជ្រាវសិនថា តើជាទួលបុរាណមានក្នុងបញ្ជីសារពើភ័ណ្ឌ ឬមានក្នុងផែនទីរបស់ក្រសួងវប្បធម៌និងវិចិត្រសិល្បៈដែរឬទេ? ហើយបើមានមែន លោកនឹងរៀបចំឯកសារដាក់ប្តឹងទៅតុលាការតាមផ្លូវច្បាប់ ។
ទោះជាយ៉ាងនេះក្តីលោកបញ្ជាក់ថា ចំពោះទីទួលមួយនេះ ពិតជាទីទួលប្រាសាទចាស់ដែលត្រូវបានរងការបំផ្លាញកាលក្នុងសម័យសង្គ្រាមក្នុងទសវត្សរ៍ឆ្នាំ១៩៧០និង១៩៨០ ដែលមកដល់ពេលនេះបានបាត់រូបរាងអស់ហើយ នៅសល់តែថ្មភក់ និងថ្មបាយក្រៀមតិចតួច និងខ្លះកប់ក្នុងដីតែប៉ុណ្ណោះ ។ តាមការបញ្ជាក់របស់អាជ្ញាធរឃុំច្រណូកបានប្រាប់មន្ត្រីជំនាញថា បទល្មើសលួចជីកស្រះនេះ បានកើតឡើងក្នុងអំឡុងក្រោយបុណ្យចូលឆ្នាំថ្មី៣-៤ថ្ងៃ ដោយគ្មានការសុំច្បាប់ទម្លាប់ពីអាជ្ញាធរ ឬមន្ត្រីជំនាញឡើយ ។
ហេតុនេះហើយ អាជ្ញាធរឃុំ សំណូមពរដល់មន្ត្រីជំនាញ សូមដាក់ពាក្យប្តឹងជនប្រព្រឹត្តបទល្មើសជីកស្រះលើទួលបុរាណនេះឱ្យបានខ្លាំងក្លាបំផុត ។ ក្រោយការវាស់វែង មន្ត្រីជំនាញបានពិនិត្យឃើញថា បទល្មើសជីកយកអាចម៍ដី និងបង្កើតជាស្រះនៅមិនឆ្ងាយពីជើងប្រាសាទសន្ធប់នេះ មានទទឹង១០ម៉ែត្រ បណ្ដោយ៣១,៥ម៉ែត្រ និងជម្រៅ៣,៥ម៉ែត្រ ៕
ចែករំលែកព័តមាននេះ