ខេត្តព្រៃវែង ៖ កុំឱ្យសាធារណជនមានមន្ទិលសង្ស័យ អ្នកយកព័ត៌មានកោះសន្តិភាព បានទៅដល់ទីតាំងដើមស្វាយតានី ដែលស្ថិតក្នុងភូមិស្វាយតានី ឃុំបឹងព្រះ ស្រុកបាភ្នំ ខេត្តព្រៃវែង និងបានជួបសម្ភាសន៍ ជាមួយប្រជាពលរដ្ឋ និងអាជ្ញាធរមូលដ្ឋានផងដែរ ទាក់ទិននឹងការលេចឮពីរឿងដើមស្វាយតានីនេះ ។
ទាក់ទិននឹងឈ្មោះដើមស្វាយតានី បានធ្វើឱ្យលេចឮព័ត៌មានថា ត្រូវបានគេគាស់លក់ឱ្យឈ្មួញបម្រុងនាំចេញទៅប្រទេសវៀតណាម ប៉ុន្តែទំនងជាដើមស្វាយតានី នៅមានបារមី ទើបបណ្តាលឱ្យរឿងរ៉ាវនេះ
ដឹងដល់ឯកឧត្តមម្នាក់ បានតាមទៅទិញយកមកវិញ និងដាក់ដាំនៅកន្លែងដើមវិញផងដែរ ។
តើព័ត៌មាននេះ ពិតដែរឬយ៉ាងណា ?
ជួបជាមួយលោកយាយ ឡឹក បាន អាយុ៧១ឆ្នាំ ដែលមានផ្ទះនៅជាប់នឹងដើមស្វាយតានី បានឱ្យដឹងថា ការលេចឮថា ដើមស្វាយតានី ត្រូវគេគាស់លក់នោះ មិនមែនជាការពិតទេ ព្រោះដើមស្វាយតានី បានងាប់និងត្រូវអ្នកស្រុកប្រមូលដុតអស់តាំងពីជាង១០ឆ្នាំមុនមកម្ល៉េះ តើបានដើមស្វាយតានីឯណាលក់នោះ ?លោកយាយក៏បានបញ្ជាក់ទៀតថា ចំពោះការលើកឡើងថា មានឯកឧត្តមម្នាក់បានទិញដើមស្វាយតានីយកមកដាំវិញនៅកន្លែងដើមនេះ ជាការពិត គឺឯកឧត្តម ជា ផើយ ជាអ្នកយកមកដាំ កាលពីថ្ងៃទី២៥
មេសា ថ្មីៗនេះ ដោយបានទិញដើមស្វាយ១ដើម អាយុប្រមាណជិត១០០ឆ្នាំ ក្នុងតម្លៃប្រមាណជា៤០០០ដុល្លារពីកន្លែងផ្សេង យកមកដាំនៅកន្លែងដើមស្វាយតានីនេះ ក្នុងបំណងឱ្យដើមស្វាយនោះ នៅជាតំណាងឱ្យដើមស្វាយតានី ធ្លាប់ជាឈ្មោះប្រវត្តិសាស្ត្រនៅក្នុងស្រុកភូមិបន្តទៀតកុំឱ្យបាត់ឈ្មោះ ។
ចំណែកចាស់ព្រឹទ្ធាចារ្យនៅក្នុងភូមិ បានបញ្ជាក់ឱ្យដឹងដែរថា ដើមស្វាយតានី កាលនៅរស់ អ្នកស្រុកតែងតែនាំគ្នាមកបន់ស្រន់គ្រប់ៗគ្នា ហើយការបន់ស្រន់នោះ ភាគច្រើនគឺបានសម្រេចដូចបំណង ទើបអ្នកស្រុកជឿថាមានបារមីកាន់ និងគោរពគ្រប់ៗគ្នា ។ ចំណែកប្រវត្តិនៃដើមស្វាយតានីនេះ ត្រូវបានចាស់ៗតំណាលតៗគ្នាមកថា ជាដើមស្វាយព្រៃ ដែលបានដុះនៅលើទួលមួយក្នុងដីលោកតាម្នាក់ឈ្មោះ តានី ហើយគិតមកដល់ថ្ងៃដែលដើមស្វាយតានីងាប់ គឺនៅអំឡុងឆ្នាំ២០០១ និងសន្មត់ថាមានអាយុប្រមាណជាង៣០០ឆ្នាំ ។
ពាក់ព័ន្ធដែលបណ្តាលឱ្យដើមស្វាយតានីនេះងាប់ ត្រូវបានអ្នកស្រុកអះអាងដូចៗគ្នាថា ដោយសារតែតាៗគណៈកម្មការវត្តរៀបឥដ្ឋចាក់សាបធ្វើខឿនព័ទ្ធជុំវិញគល់ស្វាយនេះ ក្នុងបំណងកែលម្អ និងអភិរក្សដើមស្វាយនេះ តែបែរជាធ្វើឱ្យវាងាប់ទៅវិញ ដោយសារតែមិនអាចស្រូបយកទឹក និងជីវជាតិមកចិញ្ចឹមខ្លួនបាន ។ ទោះជាយ៉ាងណាក៏ដោយ គេសង្ឃឹមថា ដើមស្វាយដាំថ្មីនេះ និងធ្វើឱ្យគេចងចាំដើមស្វាយតានី ជាដើមស្វាយប្រវត្តិសាស្ត្រមួយដែលមានឈ្មោះដោយសារអ្នកនិពន្ធទំនុកច្រៀងបទ «ឈើកាច់បាភ្នំ» រហូតតទៅ បើទោះជាដើមស្វាយតានីលែងមានទៅហើយក្តី ក៏មានស្វាយមួយដើមធំមកជំនួសវិញដែរ ។
បើនិយាយពីឈ្មោះដើមស្វាយតានី ប្រជាពលរដ្ឋខ្មែរជាទូទៅពិតជាធ្លាប់បានឮ តាមរយៈបទចម្រៀង១បទដែលច្រៀង ដោយលោក អុិន យ៉េង មានចំណងជើងថា «ឈើកាច់បាភ្នំ»ឬ«បាភ្នំរឿងថ្មី»ដែលបាននិពន្ធដោយលោក ម៉ាក ថុងជិក ដែលជារឿងពិតរបស់លោក ។ បទនេះ និពន្ធបទភ្លេងដោយលោក សាត សំឌិត ។ ដែលឃ្លាចុងក្រោយនៃបទចម្រៀង ដែលមានប្រជាប្រិយភាពនិងមោទនភាពសម្រាប់អ្នកខេត្តព្រៃវែងមានទំនុកថា «ដើមស្វាយតានីអ្នកធ្លាប់មានឫទ្ធិ ខ្ញុំមានវិបត្តិម្តេចអ្នកមិនជួយ បើខ្ញុំដូចទុំបាភ្នំត្រូវជួយ គេដាក់ឈ្មោះឱ្យថា ត្បូងឃ្មុំថ្មី» ។
ចែករំលែកព័តមាននេះ