ខេត្តបាត់ដំបង ៖ ពួកក្មេងទំនើងចំនួន២នាក់ ក្នុងចំណោមបក្សពួក៣នាក់ ដែលបែកគំនិតស្ទាក់កាប់ប្លន់យកម៉ូតូតាមដងផ្លូវទាំងកណ្តាលថ្ងៃត្រូវបានកម្លាំងអន្តរាគមន៍ផ្នែកបង្ការ បង្ក្រាបនៃការិយាល័យព្រហ្មទណ្ឌកំរិតស្រាលសហការជាមួយកម្លាំងអធិការស្រុកសង្កែធ្វើការស្រាវជ្រាវឃាត់ខ្លួនបានកាលពីវេលាម៉ោង៩និង៤០នាទីព្រឹក ថ្ងៃទី០២ ខែឧសភា នៅចំណុចភូមិបល្ល័ង្ក សង្កាត់អូរម៉ាល់ ក្រុងបាត់ដំបង ក្រោយពីក្រុមនេះធ្វើសកម្មភាពបានមួយថ្ងៃ ។
នាយការិយាល័យព្រហ្មទណ្ឌកំរិតស្រាលលោកឈឿង គឹមសុង បានឲ្យដឹងថា ជនសង្ស័យទាំង២នាក់ ដែលត្រូវឃាត់ខ្លួនមាន១- ឈ្មោះ ភ័ណ្ឌ សុភា ភេទប្រុស អាយុ១៦ឆ្នាំ រស់នៅភូមិអណ្តូងព្រីង សង្កាត់អូរម៉ាល់ ក្រុងបាត់ដំបង និង២- ឈ្មោះ ផាន់ សង្វាពេជ្រ ភេទប្រុស អាយុ១៧ឆ្នាំ រស់នៅភូមិផ្កាស្លា សង្កាត់ចំការសំរោង ក្រុងបាត់ដំបង រីឯបក្សពួកម្នាក់ទៀតបានរត់គេចខ្លួន ។
លោកបានប្រាប់ថា ជនសង្ស័យទាំង០២នាក់រួម និងបក្សពួកម្នាក់ទៀត (រត់គេចខ្លួនបាត់) ត្រូវបានសង្ស័យថា បាននាំគ្នាធ្វើសកម្មភាពស្ទាក់កាប់ជនជនរងគ្រោះម្នាក់ឈ្មោះ ហុន កានឿន ភេទប្រុស អាយុ២១ឆ្នាំ រស់នៅភូមិអូរគគី ឃុំអូរដា ស្រុកកំរៀង ដើម្បី«ប្លន់»យកម៉ូតូមួយគ្រឿងម៉ាកស៊ូស៊ូគីនិច សេរីឆ្នាំ២០១៨ ពណ៌ស ពាក់ស្លាកលេខភ្នំពេញ 1JS-0748 កាលពីវេលាម៉ោងជាង១រសៀល ថ្ងៃទី០១ ខែឧសភា ខណៈដែលជនរងគ្រោះកំពុងធ្វើដំណើតាមផ្លូវដល់ត្រង់ចំណុចភូមិតាកុក ឃុំនរា ស្រុកសង្កែ ។
លោកឈឿង គឹមសុង បានបញ្ជាក់ថា ក្រោយកើតហេតុលោកស្នងការខេត្តបានបញ្ជាឲ្យកម្លាំងរបស់លោកតាមស៊ើបអង្កេតលើមុខសញ្ញាក្រុមជនសង្ស័យយ៉ាងដុតដៃដុតជើងបំផុតរហូតឈានដល់ការឃាត់ខ្លួនជនដៃដល់បាន២នាក់ រីឯម្នាក់កំពុងរត់គេចខ្លួន។ជាមួយនឹងការឃាត់ខ្លួននេះជនទំនើងដែលបែកគំនិតធ្វើចោរស្ទាក់ប្លន់អ្នកដំណើតាមដងផ្លូវនេះបានសារភាពថា ពួកខ្លួនមានគ្នា៣នាក់ ហើយពិតជាបានស្ទាក់កាប់ជនរងគ្រោះខាងលើ ដើម្បីប្លន់យកម៉ូតូនោះមែន។ ជនអន្ធពាលទាំង២នាក់នេះបាននិយាយបន្តថា ក្រោយពីពួកខ្លួនប្លន់បានសម្រេច ពួកខ្លួនក៏បានជិះម៉ូតូនោះយកទៅប្តូរស្លាកលេខនៅផ្ទះបក្សពួកនៅកន្លែងចាប់ខ្លួនខាងលើ តែទើបបានមួយថ្ងៃក៏សមត្ថកិច្ចឆ្មក់ទៅក្រសោបជាប់តែម្ដង ។ នៅពេលសួរថា តើហេតុអ្វីត្រូវប្ដូរស្លាកលេខ.? ក្រុមជនពាលនេះបានផ្ដល់ចម្លើយយ៉ាងខ្លីដែលធ្វើឲ្យភ័យស្រឡាំងកាំងយ៉ាងដូច្នេះថា «ពួកខ្លួនប្ដូរស្លាក ដើម្បីងាយស្រួលជិះធ្វើសកម្មភាពបទល្មើសទៀត» ។
នៅក្នុងសកម្មភាពប្លន់នេះ បើតាមលោកឈឿង គឹមសុង នាយការិយាល័យព្រហ្មទណ្ឌកំរិតស្រាលបាននិយាយថា នៅក្នុងហេតុការណ៍កាប់ប្លន់យកម៉ូតូនោះជនរងគ្រោះមិនមានរបួសស្នាមទេ ។ ព្រោះពេលនោះជនរងគ្រោះបានផ្ដូលម៉ូតូរត់ទើបក្រុមជនល្មើសលើកម៉ូតូជិះគេចខ្លួនបាត់ទៅ ។ លោកនាយការិយាល័យរូបនេះបានបញ្ជាក់ដែរថា បើតាមការស្រាវជ្រាវកន្លងមកក្រុមជនដៃដល់ទាំងនេះ គឺជាមុខសញ្ញាក្រុមក្មេងទំនើងតែពួកនេះបានបែកគំនិតធ្វើចោរឆក់ចោរប្លន់ម្ដង ។
ទោះយ៉ាងណាលោកថា ជាមួយនឹងការចាប់ខ្លួននេះកម្លាំងជំនាញដកហូតបានម៉ូតូចំនួន២គ្រឿង ពីជនសង្ស័យរួមទាំងវត្ថុតាងមួយចំនួនទៀត ។ ពេលនេះលោកស្នងការខេត្តបានបញ្ជាឲ្យមន្ត្រីជំនាញនៃអធិការនគរបាលស្រុកសង្កែធ្វើការសាកសួរ ដើម្បីកសាងសំណុំរឿង និងបញ្ជូនបន្តទៅការិយាល័យជំនាញ ដើម្បីចាត់ការតាមនីតិវិធីហើយ ៕
ចែករំលែកព័តមាននេះ