រាជធានីភ្នំពេញ ៖ ដើម្បីទទួលបានការការពារផលប្រយោជន៍ក្រោមច្បាប់កម្មសិទ្ធិបញ្ញា ក្រសួងពាណិជ្ជកម្មបានអំពាវនាវ និងជំរុញឱ្យពាណិជ្ជករបរទេស ដែលមានផលិតផលមានលក្ខណៈពិសេសមកធ្វើការចុះបញ្ជីម៉ាកសម្គាល់ភូមិសាស្ត្រទំនិញនៅក្រសួងដើម្បីទទួលការគាំំពារតាមផ្លូវច្បាប់ ព្រោះប្រទេសកម្ពុជា គឺជាសមាជិកនៃអង្គការកម្មសិទ្ធិបញ្ញាពិភពលោក ដែលមានទាំងច្បាប់ និងលិខិតបទដ្ឋានគតិយុត្តជាច្រើន សម្រាប់ការពារទាំងម៉ាកសម្គាល់ភូមិសាស្ត្រទំនិញកម្ពុជា និងបរទេស។ នេះជាការលើកឡើងរបស់រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ នាឱកាសអញ្ជើញចូលរួមពិធីប្រកាសទទួលស្គាល់នូវផលិតផលស្រាមួយប្រភេទរបស់ប្រទេសបារាំង កាលពីរាត្រីថ្ងៃទី២៩ ខែមេសា ឆ្នាំ២០១៩ នៅស្ថានទូតបារាំង ដែលផលិតផលស្រានោះបានក្លាយជាម៉ាកសម្គាល់ភូមិសាស្ត្រទំនិញបរទេសដំបូងគេនៅកម្ពុជា ។
នៅក្នុងឱកាសនោះ លោក ប៉ាន សូរស័ក្តិ បានលើកឡើងពីកិច្ចប្រឹងប្រែងរបស់រាជរដ្ឋាភិបាលកម្ពុជា ក្នុងការលើកស្ទួយវិស័យកម្មសិទ្ធិបញ្ញាជាតិ តាមរយៈការខិតខំពង្រឹងអនុវត្តច្បាប់ ការបណ្តុះបណ្តាល និងបញ្ជ្រាបកម្មសិទ្ធិបញ្ញាទៅក្នុងកម្មវិធីអប់រំ ការរៀបចំទិវាកម្មសិទ្ធិបញ្ញាពិភពលោក និងការចូលរួមកិច្ចព្រៀមព្រៀងអន្តរជាតិសំខាន់ៗ ពាក់ព័ន្ធនឹងកម្មសិទ្ធិបញ្ញា។ បន្ថែមលើនេះ លោករដ្ឋមន្ត្រី ក៏បានវាយតម្លៃខ្ពស់ចំពោះកិច្ចសហប្រតិបត្តិការរវាងកម្ពុជា-បារាំង និងបានស្នើសុំលោកជំទាវឯកអគ្គរដ្ឋទូត និងពាណិជ្ជករបារាំង បន្តធ្វើធុរកិច្ច និងវិនិយោគថែមទៀតនៅកម្ពុជា ដើម្បីពង្រឹង និងពង្រីកទំនាក់ទំនងពាណិជ្ជកម្មប្រទេសទាំងពីរ ជាពិសេសចូលរួមអភិវឌ្ឍន៍កំណើនសេដ្ឋកិច្ច និងកាត់បន្ថយភាពក្រីក្រ ជាមួយរាជរដ្ឋាភិបាលកម្ពុជា។
ស្របពេលក្រសួងពាណិជ្ជកម្មអំពាវនាវដល់ពាណិជ្ជករបរទេសធ្វើការចុះបញ្ជីម៉ាកសម្គាល់ភូមិសាស្ត្រទំនិញដើម្បីទទួលបានការគាំពារផ្លូវច្បាប់ បើតាមមន្ត្រីអ្នកនាំពាក្យឆ្លាស់ វេណបញ្ជាក់ថាមកដល់បច្ចុប្បន្ននេះក្រសួងទើបប្រកាសទទួលស្គាល់ផលិតផលសម្គាល់ភូមិសាស្ត្រទំនិញមកពីបរទេសនេះ ទើបមានតែមួយគត់ ពោលគឺផលិតផលស្រាសំប៉ាញដែលមានប្រភពនៅប្រទេសបារាំង។
លោក ឡុង កែមវិចិត្រ មន្ត្រីអ្នកនាំពាក្យឆ្លាស់វេណនៃក្រសួងពាណិជ្ជកម្មបានឱ្យដឹងកាលពីថ្ងៃទី៣០ មេសា កន្លងទៅថា មកទល់ឥឡូវនេះគឺមាន ផលិតផលស្រាសំប៉ាញ របស់បារាំងតែមួយប៉ុណ្ណោះ ដែលត្រូវបានទទួលស្គាល់ថាជាផលិតផលសំគាល់ភូមិសាស្ត្រដែលបានចុះនៅប្រទេសកម្ពុជា។ លោកបានបន្តថា « ផលិតផលម៉ាកសំគាល់ភូមិសាស្ត្រវាជាម៉ាកមួយពិសេស។ ដូចនេះក្រុមហ៊ុនខ្លះគាត់ អត់សិទ្ធិក៏ចុះមិនបានដែរ ព្រោះនេះជាម៉ាកពិសេសហើយវាមិនសូវមានច្រើននោះទេនៅកម្ពុជា។ ការដែលថ្នាក់ដឹកនាំក្រសួងអំពាវនាវ គឺសម្រាប់ក្រុមហ៊ុនណាមួយដែលជាម្ចាស់ម៉ាកទំនិញមានលក្ខណៈពិសេសបែបនេះឱ្យគាត់យកមកចុះជាទំនិញសំគាល់ភូមិសាស្ត្រនៅកម្ពុជាដើម្បីអាចឱ្យយើងការពារផលិតផលគាត់បាន តាមច្បាប់ដែលយើងមាន»។
តាមមន្ត្រីអ្នកនាំពាក្យឆ្លាស់វេណខាងលើ បានពន្យល់បញ្ជាក់ថា « ការចុះបញ្ជីម៉ាកសម្គាល់ភូមិសាស្ត្រទំនិញការពារផលប្រយោជន៍ដល់ពាណិជ្ជករបរទេសនេះ គឺវាបង្ហាញថា ប្រព័ន្ធកម្មសិទ្ធិបញ្ញារបស់យើងបានវិវត្តន៍ទៅដល់កម្រិតមួយដែលយើងអាចចុះបញ្ជីម៉ាកផលិតផលដែលមានលក្ខណៈពិសេសបាន ព្រោះការចុះបញ្ជីផលិតផលសំគាល់ភូមិសាស្ត្រនេះវាមានលក្ខណៈស្មុគស្មាញ។ លើសពីនេះផលិតផលដែលមានលក្ខណៈពិសេសដូចស្រាសំប៉ាញ គឺគាត់អាចចុះបញ្ជីនៅកម្ពុជាបាន គាត់អាចទទួលបានការការពារបានក្រោមច្បាប់កម្មសិទ្ធិបញ្ញារបស់យើង»។
យោងតាមក្រសួង រាជរដ្ឋាភិបាលកម្ពុជាបានខិតខំលើកស្ទួយវិស័យកម្មសិទ្ធិបញ្ញាជាតិ តាមរយៈការខិតខំពង្រឹងអនុវត្តច្បាប់ ការបណ្តុះបណ្តាល និងបញ្ជ្រាបកម្មសិទ្ធិបញ្ញាទៅក្នុងកម្មវិធីអប់រំ ការរៀបចំទិវាកម្មសិទ្ធិបញ្ញាពិភពលោក និងការចូលរួមកិច្ចព្រៀមព្រៀងអន្តរជាតិសំខាន់ៗ ពាក់ព័ន្ធនឹងកម្មសិទ្ធិបញ្ញា។
យ៉ាងណាមិញសម្រាប់ផលិតផលរបស់កម្ពុជាវិញ គេកត់សម្គាល់ឃើញថា ស្ករត្នោតកំពង់ស្ពឺ និងម្រេចកំពតបន្ទាប់ពី ត្រូវបានចុះបញ្ជីនិងទទួលស្គាល់នៅសហភាពអឺរ៉ុប បង្ហាញពីប្រភពដើម និងការចង្អុលបង្ហាញភូមិសាស្ត្រការពារ (PGI) បន្ទាប់ពីចុះបញ្ជីម៉ាកសម្គាល់ភូមិសាស្ត្រពីអឺរ៉ុប ក៏បានធ្វើឲ្យតម្លៃនៃផលិតផលទាំងពីរខាងលើត្រូវបានការពារនិងមានតម្លៃទីផ្សារខ្ពស់ផងដែរ ៕
ចែករំលែកព័តមាននេះ