រាជធានីភ្នំពេញ ៖ មកទល់ពេលនេះ អាចមានតែកីឡាករ កែវ រំចង់ ម្នាក់ប៉ុណ្ណោះ ដែលប្រកាសមិនវាយជាមួយកីឡាករខ្មែរដូចគ្នា ដោយលោកប្រកាសយ៉ាងមុតមាំថា បើទោះជាបានតម្លៃខ្លួនប៉ុន្មានក៏មិនប្រកួតដែរ ដោយសារតែលោកមិនចង់ប្រើច្ចេកទេសខ្លាំងៗបណ្ដាលឱ្យជនជាតិគ្នាឯងរងគ្រោះ ។ អ្វីដែលគួរអោយចាប់អារម្មណ៍ទៅទៀត គឺលោកមិនភ័យនឹងបាត់ទីផ្សារឡើងរេញនោះផង ខណៈដែល តម្លៃខ្លួនដែលលោកទទួលឡើងរេញ ក៏ខ្ពស់កប់ពពកបើធៀបនឹងកីឡាករក្នុងស្រុកដូចគ្នាផងដែរ។
កីឡាករ កែវ រំចង់ បានអះអាងថា ដ្បិតថាលោកមិនទទួលប្រកួតជាមួយកីឡាករក្នុងស្រុកគ្នាឯង ប៉ុន្តែសម្រាប់ការប្រកួតរបស់លោកជារៀងរាល់ខែ គឺមិនដាច់នោះទេ បើទោះជាលោកទទួលប្រកួតអោយប៉ុស្តិ៍បាយ័នមួយ ដែលមានន័យថានៅតាមបណ្ដាប៉ុស្តិ៍ផ្សេងបើចង់បានលោកប្រកួតក៏មិនអាចទៅរួច លើកលែងតែមានការអនុញ្ញាតពីលោកនាង ស៊ីវត្ថា ដែលជាអ្នកលើកស្ទួយលោកអោយល្បីនៅប៉ុស្តិ៍បាយ័ន ។
លោកថ្លែងដោយជំហរដដែលថា លោកឈប់ទទួលប្រកួតជាមួយកីឡាករក្នុងស្រុកជាយូរមកហើយ ដោយសារតែហេតុផល អោយតែឡើងប្រកួតជាមួយកីឡាករជាតិឯងលើកណា ក៏ប្រើកម្លាំងមិនអស់ដៃ ដែលធ្វើអោយលោកមានការរំខានចិត្ត។ លោកថា ការវាយកីឡាករគ្នាឯងទោះជាមានកម្លាំងប៉ុនណា ក៏វាយមិនអស់ដៃនោះដែរ ជាពិសេសនៅពេលឃើញគូប្រកួតជាជាតិសាសន៍ដូចគ្នា បែកឈាម ឬមានរបួសធ្ងន់ ។
លោកថា កាលពីមុនអោយតែបានតម្លៃខ្លួនខ្ពស់ លោកមិនដែលខ្វល់ថា តើត្រូវប្រកួតជាមួយកីឡាករជនជាតិណា ឬរូបណានោះទេ ប៉ុន្តែសម្រាប់ពេលនេះ គឺលោកប្រកាន់អត់ប្រកួតជាមួយគ្នាឯងដាច់ខាត បើទោះជាខាងអ្នករៀបចំកម្មវិធីហ៊ានអោយតម្លៃខ្លួនលោកទ្វេគុណ បានលុយច្រើនក៏ដោយ ។ តាំងពីលោកឡើងកូដ លោកថាមួយស្នៀតៗរបស់លោក មិនខុសពីញញួរ៥គីឡូដែលគេសំពងនោះទេ ទើបលោករមែងមានចិត្តអាណិតនៅពេលជ្រុលដៃវាយបែកលើគ្នាឯង ដែលសុទ្ធតែជាកីឡាករជនជាតិខ្មែរដូចគ្នា។
លោកថា ខ្លួនមិនដែលសប្បាយចិត្តទេក្នុងពេលកីឡាករជាដៃគូបែកមុខបែកមាត់ ហើយកីឡាករជាជនជាតិខ្មែរ ដែលខ្លួនបានប្រកួតជាមួយទាំងនោះ អ្នកខ្លះជាអ្នកមានជីវភាពក្រខ្សត់ ដែលធ្វើអោយដឹងហើយឮហើយ គឺមានវិប្បដិសារៈ។ លោកថា ខ្លួនឈប់ប្រកួតជាមួយកីឡាករក្នុងស្រុកប្រមាណ២ឆ្នាំមកហើយ ដោយប្រកាសជំហរថាជ្រុលតែនៅបន្តការប្រកួតនៅលើសង្វៀន គឺក្រៅពីកីឡាករបរទេស មិនខ្ចីធ្វើការប្រកួតជាមួយ ។ យ៉ាងណាមិញលោកថាជំហរដែលដាក់ចេញនេះ ក៏ដោយសារតែបានភ្លើងខៀវពីអ្នករៀបចំទូរទស្សន៍បាយ័ន ដែលជាអ្នកផ្ដល់ប្រាក់ខែផ្ដាច់មុខអោយខ្លួន និងធានាថាលោករង់ចាំតែឡើងប្រកួតជាមួយកីឡាករបរទេសបានហើយ ដោយឈប់រវល់ជាមួយកីឡាករក្នុងស្រុកគ្នាឯងតាមចិត្តចុះ ។
លោកប្រកាសជំហរប្រកួតតែជាមួយកីឡាករបរទេស ដោយអះអាងថាសម្រាប់តម្លៃខ្លួន បើបានទទួលទាបជាងការទាមទាររបស់លោកតិចតួចក៏គ្មានបញ្ហា ប៉ុន្តែបើអោយប្រកួតជាមួយកីឡាករក្នុងស្រុក ហើយបានខ្ពស់កម្រិតណា ក៏មិនខ្ចីប្រកួតនោះដែរ ។ លោកថា តម្លៃខ្លួនក្នុងមួយប្រកួតរបស់លោកក្នុងមួយរយៈចុងក្រោយ មិនក្រោម១ពាន់ដុល្លារនោះទេ បើទោះជាលោកត្រូវប្រកួតនៅលើសង្វៀនទូរទស្សន៍បាយ័ន ដែលជាស្ថាប័នដែលលោកទទួលប្រាក់ខែហើយប្រកួតអោយផ្ដាច់មុខនោះក្ដី ។
ជារៀងរាល់ខែលោកថាអត់មានខែណាដែលគ្មានការប្រកួតនោះទេ ការប្រកួតក្នុងស្រុកគឺទាល់តែ១ពាន់ដុល្លារយ៉ាងតិច ទើបបានទទួលប្រកួត ហើយជំហរដែលបានប្រកាសនេះ ក៏មិនដែលទំនេរមិនបានឡើងរេញម្ដងក្នុងមួយខែ ក្នុងពេលដែលលោក នាង ស៊ីវត្ថា ក្រៅពីដាក់អោយប្រកួតនៅលើសង្វៀនទូរទស្សន៍បាយ័ន ក៏ជួយស្វែងរកទីផ្សារអោយបានចេញប្រកួតក្នុង និងក្រៅស្រុក និងនៅក្រៅសង្វៀនរបស់ប៉ុស្តិ៍ផងដែរ ទើបកាន់តែធ្វើអោយលោកឈានឡើងទីផ្សារ បើទោះជាអត់ទទួលប្រកួតជាមួយកីឡាករខ្មែរគ្នាឯង។
ជាក់ស្ដែងរាល់ថ្ងៃ លោកថាខ្លួនមិនមែនរង់ចាំប្រកួតតែនៅសង្វៀនទូរទស្សន៍បាយ័ននោះទេ គឺមានព្រឹត្តិការណ៍ធំៗក្នុងស្រុក និងក្រៅស្រុកច្រើនណាស់ដែលលោកទទួលប្រកួត សំខាន់អោយតែមានការជូនដំណឹងទៅកាន់លោកនាង សុីវត្ថា ជាមុន ។ លោកនិយាយថា«ដ្បិតថាខ្ញុំប្រកាសអត់ប្រកួតប៉ុស្តិ៍ផ្សេង និងអត់ប្រកួតជាមួយកីឡាករខ្មែរគ្នាឯង ប៉ុន្តែសម្រាប់ទីផ្សារអត់មានខែទំនេរនោះទេ»។
លោក កែវ រំចង់ បន្តថា ជារៀងរាល់ថ្ងៃលោកមិនដែលខ្វល់នឹងរកការងារខាងក្រៅ ឬ ប្រហែសនឹងការហ្វឹកហាត់នោះទេ ដោយសារទី១លោកមានប្រាក់ខែ ហើយទោះមិនសូវជាមានការប្រកួតទាល់តែសោះ ក៏មានការប្រកួតមួយប្រកួតជាមួយកីឡាករបរទេសនៅប៉ុស្តិ៍បាយ័នដែលអាចរកបានក្នុងមួយប្រកួត១ពាន់ដុល្លារដែរ ដែលចំណូលទាំងនេះ គឺលោកអាចរស់បានយ៉ាងស្រួល ។
លោកថា រាល់ថ្ងៃ គឺដឹងតែម្យ៉ាង រក្សាកម្លាំង និងខំប្រឹងប្រកួតកុំអោយអ្នកស្នេហាវិស័យប្រដាល់បាក់ទឹកចិត្តតែមួយមុខ ក៏ដូចជាដើម្បីការពារទីផ្សារកុំអោយធ្លាក់ចុះ។ លោកថា ការប្រដាល់មិនមែនសុទ្ធតែមិនល្អ និងធ្វើអោយជីវភាពខ្សត់ខ្សោយនៅពេលពឹងតែលើការប្រដាល់មួយមុខនោះទេ ជាក់ស្ដែងសម្រាប់រូបលោក ដ្បិយថាមិនធ្វើការងារផ្សេងជាត្រីមុខ តែការប្រដាល់នៅតែជួយអោយលោករស់នៅល្អប្រសើរ សំខាន់សួរថា តើយើងដាក់ចិត្ត និងស្រលាញ់វិស័យមួយនេះអោយអស់ពីចិត្តពីថ្លើមឬទេ ។
លោកប្រកាសមិនចោលអាជីពមួយនេះនោះទេ ដោយលោកនឹងប្រឹងប្រកួតបង្កើនសមត្ថភាពអោយកាន់តែខ្លាំង បើទោះជាវ័យរាងជ្រេបន្តិច ដើម្បីកុំអោយគេថា កីឡាករខ្មែរចាស់បន្តិចប្រកួតមិនកើតនោះផង៕
ចែករំលែកព័តមាននេះ