រាជធានីភ្នំពេញ ៖ ដោយមានការអភិវឌ្ឍនូវការសាងសង់កំពង់ផែស្វយ័តក្រុងព្រះសីហនុតាមជំហានៗ និងការកើនឡើងនៃការធ្វើពាណិជ្ជកម្មអន្តរជាតិជាបន្តបន្ទាប់ នាំឲ្យការដឹកជញ្ជួនតាមផ្លូវសមុទ្ររបស់កម្ពុជាមានកំណើនគួរឲ្យកត់សម្គាល់ ។ ជាក់ស្តែងបរិមាណទំនិញឆ្លងកាត់កំពង់ផែក្រុងព្រះសីហនុ បានកើនឡើងខ្ពស់ក្នុងឆ្នាំ២០១៨ ពោលគឺមានកំណើន ២២,០៨%…
រាជធានីភ្នំពេញ ៖ ដោយមានការអភិវឌ្ឍនូវការសាងសង់កំពង់ផែស្វយ័តក្រុងព្រះសីហនុតាមជំហានៗ និងការកើនឡើងនៃការធ្វើពាណិជ្ជកម្មអន្តរជាតិជាបន្តបន្ទាប់ នាំឲ្យការដឹកជញ្ជួនតាមផ្លូវសមុទ្ររបស់កម្ពុជាមានកំណើនគួរឲ្យកត់សម្គាល់ ។ ជាក់ស្តែងបរិមាណទំនិញឆ្លងកាត់កំពង់ផែក្រុងព្រះសីហនុ បានកើនឡើងខ្ពស់ក្នុងឆ្នាំ២០១៨ ពោលគឺមានកំណើន ២២,០៨% ធៀបនឹងឆ្នាំ២០១៧។ រីឯចំណូលអាជីវកម្មសរុបសម្រេចបានប្រមាណ៧២ លានដុល្លារអាមេរិក។ នេះបើតាមការបញ្ជាក់ឲ្យដឹងរបស់លោក ស៊ុន ចាន់ថុល ទេសរដ្ឋមន្ត្រី និងជារដ្ឋមន្ត្រីក្រសួងសាធារណការ និងដឹកជញ្ជូន នាឱកាសជួបសំណេះសំណាលជាមួយកម្មករ កម្មការិនី បុគ្គលិក កំពង់ផែស្វយ័តខេត្តព្រះសីហនុនៅថ្ងៃទី ០១ ខែឧសភា ម្សិលមិញនេះ ។
លោករដ្ឋមន្ត្រីក៏បានបន្តទៀតថា ផ្អែកលើកំណើនសេដ្ឋកិច្ចដ៏រឹងមាំ និងកំណើនបរិមាណទំនិញឆ្លងកាត់កំពង់ផែ កំពង់ផែស្វយ័តក្រុងព្រះសីហនុ នឹងរំពឹងថាបរិមាណកុងតឺន័រ ដែលឆ្លងកាត់កំពង់ផែនឹងកើនលើស ៧០០.០០០ TEUs នៅឆ្នាំ ២០២០ និងលើស ១.០០០.០០០ TEUs នៅឆ្នាំ ២០២៣ ដែលនាំឱ្យតម្រូវការអភិវឌ្ឍ និងសាងសង់កំពង់ផែ ត្រូវសម្រេចឱ្យបានទាន់ពេលវេលា និងប្រើប្រាស់យុទ្ធសាស្ត្រគ្រប់ជ្រុងជ្រោយ ដោយបញ្ចុះតម្លៃលើកដាក់ទំនិញ បញ្ចុះតម្លៃសេវាឡូជិស្ទិក ពង្រឹងនូវប្រសិទ្ធភាពគ្រប់គ្រង និងប្រតិបត្តិការកំពង់ផែ និងកតា្តផ្សេងៗទៀត ដើម្បីពង្រឹងការប្រកួតប្រជែងក្នុងតំបន់ និងសកលលោក។
លោក ស៊ុន ចាន់ថុល មានប្រសាសន៍បន្ថែមទៀតថា «ថ្មីៗនេះ កំពង់ផែស្វយ័តក្រុងព្រះសីហនុ ក៏បានចូលរួមគាំទ្រដល់កិច្ចសម្រួលពាណិជ្ជកម្ម និងធុរកិច្ចនៅកម្ពុជាសំដៅជំរុញភាពប្រកួត ប្រជែង និងបង្កើនល្បឿននៃការធ្វើពិពិធកម្មសេដ្ឋកិច្ចជាតិ ដើម្បីធានាឱ្យបាននូវចីរភាពកំណើនសេដ្ឋកិច្ចសម្រាប់រយៈពេលខាងមុខ តាមរយៈវិធានការបញ្ចុះថ្លៃលើកដាក់ Lo-Lo ចំនួន ១០% បញ្ចុះថ្លៃ Bonus ពី ៧,៥០ ដុល្លារ មក ៥ ដុល្លារអាមេរិក ក្នុងមួយ Box និងកែសម្រួលមិនគិតថ្លៃឈ្នួលបម្លាស់ទីនាវា (Shifting)»។ យ៉ាងណាមិញតាមរយៈវិធានខាងលើនេះ កំពង់ផែធំៗចំនួនពីរ គឺកំពង់ផែស្វយ័តក្រុងព្រះសីហនុ និងកំពង់ផែស្វយ័តក្រុងភ្នំពេញប្រឈមមុខនឹងការខាតបង់ប្រាក់ប្រមាណជាង ៣ លានដុល្លារសហរដ្ឋអាមេរិកផងដែរ ។ នេះបើតាមការបញ្ជាក់របស់លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ។
លោក អូន ព័ន្ធមុនីរ័ត្នបានបញ្ជាក់ថាការកែទម្រង់ដ៏មុតស្រួចដាក់ចេញដោយសម្តេចតេជោ ហ៊ុន សែន នាយករដ្ឋមន្ត្រី តាមរយៈការបញ្ចុះតម្លៃការលើកដាក់ ព្រមទាំងថ្លៃ និងការមិនយកឈ្នួលបំលាស់ទីចំណតនាវា នឹងធ្វើឲ្យកំពង់ផែក្រុងព្រះសីហនុ បាត់បង់នូវចំណូលប្រមាណជាង ២ លានដុល្លារអាមេរិក និងកំពង់ផែភ្នំពេញនឹងខាត ប្រមាណជាង ១ លានដុល្លារអាមេរិកនេះក៏ដោយ «ក៏ប៉ុន្តែប្រការនេះ បានធ្វើឲ្យថ្លៃឡូជីស្ទីករបស់កម្ពុជាយើងមានកម្រិតទាបជាងមុន និងពង្រឹងនូវភាពប្រកួតប្រជែងរបស់កម្ពុជាទាំងមូលតែម្តង» ។ លោករដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុបានបន្តថា ការចូលរួមរបស់កំពង់ផែដល់សេដ្ឋកិច្ចជាតិទាំងមូល បើទោះបីជាមិនទាន់ធំធេងក្តី តែកំពង់ផែ គឺជាអង្គភាពសេដ្ឋកិច្ចមួយដ៏សំខាន់ និងមិនអាចខ្វះបាននៅក្នុងការធ្វើទំនាក់ទំនងពាណិជ្ជកម្មរបស់កម្ពុជា ជាមួយនឹងពិភពលោក ទាំងមូលក៏ដូចជាសម្រាប់ការអភិវឌ្ឍសេដ្ឋកិច្ចជាតិ» ។
បន្ថែមពីលើនេះលោក អូន ព័ន្ធមុនីរ័ត្ន បានសម្តែងនូវក្តីរីករាយ ដោយបានឃើញបរិមាណទំនិញឆ្លងកាត់ផែ បានកើនឡើងខ្ពស់នៅក្នុងឆ្នាំ០១៨ នេះ ពោលគឺមានកំណើន ២២,០៨ ភាគរយ ក្នុងនោះបរិមាណកុងតឺណ័រឆ្លងកាត់មានកំណើនប្រមាណ ១៧,៧ ភាគរយ ធៀប២០១៧ ប៉ុន្តែទោះបីជាយើងសម្រេចបាននូវសមិទ្ធិផល ដែលបានរៀបរាប់ខាងលើ ក៏យើងមិនត្រូវមានភាពស្កប់ស្កល់ ក៏យើងមិនត្រូវភ្លេចខ្លួនជាមួយនឹងលទ្ធផលទាំងនេះទេ ។ ពីព្រោះកិច្ចដំណើរការនៃការអភិវឌ្ឍន៍សេដ្ឋកិច្ចក្នុងប្រទេស និងសមាហរណកម្មសេដ្ឋកិច្ច កម្ពុជានៅក្នុងតំបន់ និងពិភពលោក តម្រូវឲ្យយើងទាំងអស់គ្នា បន្តខិតខំជាប្រចាំ។ ព្រោះកំពង់ផែ ជាមាត់ច្រកចេញចូលដ៏សំខាន់បំផុតសម្រាប់ការធ្វើពាណិជ្ជកម្ម ជាពិសេសសម្រាប់សេដ្ឋកិច្ចកម្ពុជា ដែលជា សេដ្ឋកិច្ចបើកចំហរ និងពឹងផ្អែកជាចម្បងលើការធ្វើពាណិជ្ជកម្ម សម្រាប់ការអភិវឌ្ឍន៍ ។
លោករដ្ឋមន្ត្រីក៏បានស្នើទៅថ្នាក់ដឹកនាំក្រសួងសាធារណការនិងដឹកជញ្ជួន ដើម្បីពង្រឹងភាពប្រកួតប្រជែងរបស់កំពង់ផែស្វ័យ័តដោយ «ស្នើបន្តការចរចារជាមួយក្រុមហ៊ុនកប៉ាល់ដឹកកុងតឺណ័រ ទាំងអស់ឲ្យបញ្ចុះតម្លៃដឹក ជញ្ជួនបន្ថែមទៀត នឹងធ្វើការពិនិត្យ តាមដានការអនុវត្តរបស់ក្រុមហ៊ុនទាំងអស់នេះ ទាក់ទងនឹងការបញ្ចុះតម្លៃដូចដែលបានឯកភាពគ្នាកន្លងមក «ទី២ ដើម្បីបញ្ចុះថ្លៃឡូជីស្ទីកនិងពង្រឹងភាពប្រកួតប្រជែងរបស់កម្ពុជា ខ្ញុំសុំស្នើឲ្យកំពង់ផែស្វយ័តក្រុងព្រះសីហនុ បន្តពិនិត្យលទ្ធភាព កាត់បន្ថយថ្លៃ សេវា តាមរយៈការកាត់បន្ថយ ចំណាយដែលមិនចាំបាច់ និងការពង្រឹង ប្រសិទ្ធភាព ប្រតិបត្តិការរបស់ កំពង់ផែបន្ថែមទៀត» ។ លោក អូន ព័ន្ធមុនីរ័ត្ន បញ្ជាក់។ លោកបានបន្តទៀតថា លោកសូមលើក ទឹកចិត្តឲ្យកំពង់ផែ ជម្រុញគម្រោងសាងសង់ ចំណតផែកុងតឺន័រថ្មី ប្រវែង ៣៥០ ម៉ែត្រ ជម្រៅទឹក ១៤,៥ ម៉ែត្រ និងការបំពាក់គ្រឿង ចក្រធុនធ្ងន់ឲ្យសម្រេចបានទាន់ពេលវេលា ។
សូមបញ្ជាក់ថា ចំណតផែកុងតឺន័រថ្មីមួយនេះ នឹងធានាដល់ការចូលចតនាវាកុងតឺន័រខ្នាតធំៗ មានចំណុះរហូតដល់ទៅ ៦០.០០០ តោន ឬ ស្មើនឹង ៩៣% នៃចំនួននាវាប្រចាំតំបន់អាស៊ី-ប៉ាស៊ីហ្វិក។ ក្រោយការសាងសង់ចំណតផែកុងតឺន័រថ្មីនេះរួចនៅដើមឆ្នាំ២០២៣ កំពង់ផែស្វយ័តក្រុងព្រះសីហនុ នឹងក្លាយទៅជាកំពង់ផែលំដាប់ថ្នាក់ ខ្នាតមធ្យម ដែលនឹងមានបរិមាណកុងតឺន័រឆ្លងកាត់លើសពី ១.២៩លានTEUs/ឆ្នាំ រីឯតម្លៃដឹកជញ្ជូនតាមសមុទ្រទៅ-មកកម្ពុជា នឹងកាន់តែចុះទាបប្រហាក់ប្រហែលនឹងថ្លៃដឹកជញ្ជូនតាមសមុទ្រនៃប្រទេសជិតខាង។
លោក អូន ព័ន្ធមុនីរ័ត្ន បញ្ជាក់ថា «គម្រោងនេះនឹងធ្វើឲ្យ ថ្លៃដឹកជញ្ជួនតាមផ្លូវសមុទ្រ ពីកម្ពុជាមានកម្រិត ប្រហាក់ប្រហែលជាមួយនឹងប្រទេសជិតខាង ព្រមទាំងផ្តល់លទ្ធភាពសម្រាប់ការនាំទំនិញចេញ-ចូល ដោយផ្ទាល់ពីកម្ពុជាទៅកាន់ បណ្តាផែក្នុងតំបន់ មួយចំនួនថែមទៀត ឲ្យបានកាន់តែល្អប្រសើរ» ៕
ចែករំលែកព័តមាននេះ