រាជធានីភ្នំពេញ ៖ ដោយកត់សម្គាល់ឃើញថាកន្លងមកបងប្អូនប្រកបអាជីវកម្មដឹកជញ្ជួនអ្នកដំណើរក្នុងរាជធានីភ្នំពេញ ជាពិសេសអ្នកបើកបករត្រីចក្រយានយន្ត (ម៉ូតូរម៉ក់ ឬម៉ូតូកង់៣ឥណ្ឌា) ទាំងអ្នកបំពាក់បច្ចេកវិទ្យា App ដើម្បីឲ្យភ្ញៀវកក់ហៅតាមប្រព័ន្ធបច្ចេកវិទ្យា និងអ្នកបើកបរដឹកភ្ញៀវដោយមិនមានបំពាក់ App ភាគច្រើនបើកបរយានយន្តលើដងផ្លូវដោយពុំមានប័ណ្ណបើកបរយានយន្តត្រឹមត្រូវ សាលារាជធានីភ្នំពេញបានចាត់ឲ្យមន្ទីរសាធារណការនិងដឹកជញ្ជួនរាជធានីភ្នំពេញ រៀបចំវគ្គបណ្តុះបណ្តាលច្បាប់ចរាចរផ្លូវគោករយៈពេល ២ ខែគិតចាប់ពីខែមីនា កន្លងទៅដោយចែកចេញជា ៩ វគ្គបណ្តុះបណ្តាល ។
ចាប់ពីដើមខែ មីនា ដល់ខែមេសា ឆ្នាំ២០១៩ កន្លងទៅនេះការបណ្តុះបណ្តាលច្បាប់ចរាចរផ្លូវគោករៀបចំបានចំនួនសរុប ៨ វគ្គដែលមានសិក្ខាកាមជាអ្នកបើកបរត្រីចក្រយានយន្តសរុប ៥៨៧៩ នាក់ ដែលក្នុងនោះគឺមានសិក្ខាកាមជាអ្នកបើកបរម៉ូតូកង់៣ឥណ្ឌាចំនួន ២៨៥១ នាក់បានដាក់ពាក្យប្រឡងយកប័ណ្ណបើកបរ ក៏ប៉ុន្តែគឺមានចំនួនតែ ១៤៩៥ នាក់ប្រឡង «ជាប់»ជាស្ថាពរ ខណៈអ្នកប្រឡងធ្លាក់មានចំនួន ១២៤៥ នាក់ ។ នេះបើយោងតាមប្រសាសន៍របស់ លោក ឡូវ នីកូវឌ្ឍនា ប្រធានអង្គភាពផ្តល់បណ្ណ័បើកបរ និងសុវត្ថិភាពចរាចរណ៏ផ្លូវគោក នៃមន្ទីរសាធារណការនិងដឹកជញ្ជូនរាជធានីភ្នំពេញ ប្រាប់សារព័ត៌មានកោះសន្តិភាពនាថ្ងៃទី ០១ ខែឧសភា ឆ្នាំ២០១៩ ។
យ៉ាងណាមិញ លោក ឡូវ នីកូវឌ្ឍនា បានបញ្ជាក់ឲ្យដឹងផងដែរថា ការសម្រេចរបស់ថ្នាក់ដឹកនាំសាលារាជធានីឲ្យរៀបចំវគ្គបណ្តុះបណ្តាលស្តីពីច្បាប់ចរាចរណ៍នេះឡើង គឺក្នុងគោលបំណងឲ្យបងប្អូនរត់ម៉ូតូកង់៣ឥណ្ឌាចេះច្បាប់ចរាចរណ៍និងត្រូវប្រឡងឲ្យជាប់ដើម្បីទទួលបានប័ណ្ណបើកបរត្រឹមត្រូវតាមផ្លូវច្បាប់ ក្នុងន័យចូលរួមចំណែកកាត់បន្ថយគ្រោះថ្នាក់ចរាចរណ៍នៅលើដងផ្លូវ ដែលការបណ្តុះបណ្តាលកន្លងមករៀបចំធ្វើរៀងរាល់ថ្ងៃសៅរ៍ពេញមួយថ្ងៃ ។ ប្រធានអង្គភាពផ្តល់បណ្ណ័បើកបរ និងសុវត្ថិភាពចរាចរណ៏ផ្លូវគោក នៃមន្ទីរសាធារ ណការនិងដឹកជញ្ជូនរាជធានីភ្នំពេញ ក៏បានបញ្ជាក់ថាការបណ្តុះបណ្តាលគឺជាធ្វើឡើងដោយឥតគិតថ្លៃ តែសិក្ខាកាមដែលជាម្ចាស់ម៉ូតូកង់៣ឥណ្ឌា ដែលដាក់ពាក្យប្រឡងគឺត្រូវបង់ថ្លៃសេវារដ្ឋ សរុបចំនួន ៤ ម៉ឺនរៀល (គឺប្រឡងទាំងដៃចង្កូតនិងទ្រឹស្តី ចំនួន ៣ម៉ឺនរៀល និងពិនិត្យសុខភាព ១ម៉ឺនរៀល) ។
លោក ឡូវ នីកូវឌ្ឍនា មានប្រសាសន៍បញ្ជាក់ថា «ចំពោះបងប្អូនមានបណ្ណបើក បរឡានផ្សេងៗ ក៏ត្រូវតែមកប្រឡងយកប័ណ្ណបើកបរម៉ូតូកង់៣ឥណ្ឌាផងដែរ មិនអាចប្រើ ប្រាស់ប័ណ្ណបើកបររថយន្ត មកបើកបរម៉ូតូកង់៣ឥណ្ឌាដើម្បីដឹកភ្ញៀវបាននោះទេ។ ដូច្នេះ អ្នកមានប័ណ្ណបើកបររថយន្តហ្នឹង ក៏ប្រឡងបានដែរ» ។ តាមប្រភពព័ត៌មានពីក្រសួងសាធារណការនឹងដឹកជញ្ជួនបានប្រាប់កោះសន្តិភាពឲ្យដឹង ផងដែរថា ថ្មីៗនេះក្រសួងគ្រោងបើកវគ្គបណ្តុះ បណ្តាលចំនួន ៣ ខែផ្សេងទៀតដល់អ្នករកស៊ីបើកម៉ូតូកង់៣ឥណ្ឌានិងម៉ូតូរម៉ក (ដែលខ្មែរយើងនិយមហៅថាកង់៣ខ្មែរ) ទូទាំងប្រទេសអញ្ចឹងអាចនឹងចាប់ផ្តើមក្នុងពាក់កណ្តាលខែ ៥ ទៅ គឺធ្វើទូទាំងប្រទេសតែម្តង ។
សូមរម្លឹកថាកន្លងមកលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នៅក្នុងកិច្ចប្រជុំបូកសរុបការងាររបស់គណៈកម្មាធិការសុវត្ថិភាពចរាចរណ៍ផ្លូវគោលនៅពីថ្ងៃទី០៩ ខែមេសា ឆ្នាំ២០១៩ ធ្លាប់បានបញ្ជាក់ថាក្រសួងសម្រេចទុកពេល៣ខែឱ្យ អ្នកប្រកបរបររត់ម៉ូតូកង់បីទាំងអស់ចូលទៅរៀន និងប្រឡងយកប័ណ្ណបើកបរ។ លោករដ្ឋមន្ត្រីបានបញ្ជាក់ឲ្យដឹងនាពេលនោះថា អ្នករត់ម៉ូតូឌុបប្រមាណជា ៩៨ភាគរយ មិនទាន់មានប័ណ្ណបើកបរនៅឡើយនោះទេ។ លោកបានអះអាងថា ការចាត់វិធានការបង្ខំឱ្យអ្នករត់ម៉ូតូកង់បីទៅរៀនច្បាប់ចរាចរណ៍ និងប្រឡងយកប័ណ្ណបើកបរនេះ ក្នុងគោលបំណងរួមចំណែកកាត់បន្ថយគ្រោះថ្នាក់ចរាចរ និងការកកស្ទះចរាចរណ៍ក្នុងរាជធានីភ្នំពេញ ដែលបណ្តាលមកពីការមិនយល់ដឹងពីច្បាប់ចរាចរណ៍ក្នុងពេលបើកបររបស់ពួកគេ ។
ជាក់ស្តែងបងប្រុសជិន សុភាព ដែលជាអ្នកដឹកភ្ញៀវតាមរយៈម៉ូតូរម៉ក់ខ្មែរ (កង់បីខ្មែរ) នៅម្តុំផ្សារទូលទំពូង ទទួលស្គាល់ថារូបលោកពុំទាន់មានប័ណ្ណបើកបរពិតមែន ខណៈដែលភាគច្រើនភ្ញៀវដែលលោកដឹកជញ្ជួន ភាគច្រើនជាភ្ញៀវបរទេសដែលស្នាក់ប្រទេសកម្ពុជានិងភ្ញៀវទេសចរ ។ «ការពិតទៅខ្ញុំពិតជាមិនមានប័ណ្ណបើកបរមែន ប៉ុន្តែខ្ញុំក៏មានការប្រុងប្រយ័ត្នដែរ ពេលដឹកភ្ញៀវបរទេស ហើយខ្ញុំជឿជាក់ថាភាគច្រើនអ្នកប្រកបរបរដូចខ្ញុំគឺគ្មានប័ណ្ណបើកបរទេ ព្រោះយល់ថាទាល់តែបើកឡានតូច ឬឡានធំទើបតម្រូវឲ្យមានប័ណ្ណបើកបរ»។ ម្ចាស់ម៉ូតូរម៉កខាងលើបញ្ជាក់ ។ លោកបានបន្ថែមថាលោកពេញចិត្តទៅចូលរៀនវគ្គបណ្តុះបណ្តាលនិងប្រឡងយកប័ណ្ណបើកបរ នាពេលខាងមុខ ។
ចំណែកម្ចាស់កង់បីឥណ្ឌាមួយរូបឈ្មោះ រ៉ូ នី ក៏បានលើកជាសំនួរទៅកាន់មន្ទីរសាធារណការ និងដឹកជញ្ជូនរាជធានីភ្នំពេញ ផងដែរថាតើវគ្គទី ៩នឹងចាប់ផ្តើមពេលណាដោយសារតែគាត់ទើបតែមកពីខេត្ត មិនបានដឹងព័ត៌មានច្បាស់ ៕
ចែករំលែកព័តមាននេះ