រាជធានីភ្នំពេញ ៖ ក្លិបបឹងកេត អេហ្វស៊ី ដែលជាក្លិបបាល់ទាត់ដ៏ល្បីមួយនៅក្នុងប្រទេសកម្ពុជា កាលពីថ្ងៃទី៣០ មេសា បានធ្វើពិធីចុះហត្ថលេខាលើអនុស្សរណៈយោគយល់ជាមួយសាលារៀនវេស្ទឡាញន៍សាខាសន្ធរម៉ុក ដោយភាគីខាងក្លិបបាល់ទាត់បឹងកេត អេហ្វស៊ី…
រាជធានីភ្នំពេញ ៖ ក្លិបបឹងកេត អេហ្វស៊ី ដែលជាក្លិបបាល់ទាត់ដ៏ល្បីមួយនៅក្នុងប្រទេសកម្ពុជា កាលពីថ្ងៃទី៣០ មេសា បានធ្វើពិធីចុះហត្ថលេខាលើអនុស្សរណៈយោគយល់ជាមួយសាលារៀនវេស្ទឡាញន៍សាខាសន្ធរម៉ុក ដោយភាគីខាងក្លិបបាល់ទាត់បឹងកេត អេហ្វស៊ី មានលោកស្រី ពុធ ធីតា ជាប្រធាន
ក្លិប និងលោក ប៉ិច បូឡែន តំណាងឱ្យ សាលា ។ ការចុះហត្ថលេខាលើអនុស្សរណៈនេះផ្ដោតសំខាន់ទៅលើការបណ្ដុះបណ្ដាលកីឡាករថ្នាលដើម្បីឱ្យពួកគេក្លាយជាកីឡាករអាជីពទៅថ្ងៃអនាគត។
លោកស្រី ពុធ ធីតា បានថ្លែងថា លោកស្រីពិតជាមានការចាប់អារម្មណ៍យ៉ាងខ្លាំងចំពោះការចូលរួមអភិវឌ្ឍន៍វិស័យកីឡាបាល់ទាត់របស់សាលាឯកជននៅក្នុងពេលនេះ ។ លោកស្រីថា សព្វថ្ងៃនេះមានតែក្លិបបាល់ទាត់បឹងកេតអេហ្វស៊ីតែ១គត់ដែលទទួលបានអាជ្ញាប័ណ្ណពីសហព័ន្ធកីឡាបាល់ទាត់អាស៊ី (AFC) ហើយនេះក៏ជាលើកទី១ផងដែរដែលក្លិបបាល់ទាត់បឹងកេតចាប់យកសាលារៀនវេស្ទឡាញន៍ ជាដៃគូអភិវឌ្ឍន៍វិស័យកីឡាបាល់ទាត់ ដោយបានផ្ដោតសំខាន់ទៅលើកីឡាករថ្នាល ។
លោកស្រីបន្តថា ការសិក្សាមួយមុខនៅមិនទាន់គ្រប់គ្រាន់នោះទេ ផ្ទុយទៅវិញការលេងកីឡាជាផ្នែកមួយក្នុងការចូលរួមលើកកម្ពស់សុខុមាលភាព និងការសាមគ្គីភាព ។ ជាងនេះទៅទៀត ក្លិបបាល់ទាត់បឹងកេតអេហ្វស៊ី ក៏បានត្រៀមខ្លួនរួចជាស្រេចក្នុងការសម្រេចគោលដៅរបស់ក្មួយៗដែលចង់ក្លាយជាកីឡាករអាជីពនាពេលអនាគត។
លោក ប៉ិច បូឡែន បានលើកឡើងថា បច្ចុប្បន្នទីផ្សារកីឡាបាល់ទាត់កំពុងតែមានការរីកចម្រើនខ្លាំង ។ អ្នកដែលក្លាយជាកីឡាករល្បី កីឡាករអាជីពទទួលបានប្រាក់ខែខ្ពស់ជាងបុគ្គលិកជាន់ខ្ពស់របស់ក្រុមហ៊ុនទៅទៀត ។ ដូច្នេះលោកគិតថា ការចាប់ដៃគូជាមួយក្លិបបាល់ទាត់បឹងកេតនាពេលនេះ គឺជាឱកាសមួយសម្រាប់ប្អូនៗដែលមាននិស្ស័យចូលចិត្តលេងកីឡាបាល់ទាត់ ហើយចង់ក្លាយជាកីឡាករបាល់ទាត់អាជីព។
ជាមួយ គ្នានេះលោកក៏បានលើកឡើងពីការលេងកីឡាមិនត្រឹមតែអាចអូសទាញមនុស្សឱ្យងាកចេញពីភាពមិនល្អនោះទេ លោកសង្ឃឹមថា ក្មួយៗទាំងអស់នឹងក្លាយជាកីឡាករឆ្នើមសម្រាប់ចូល រួមប្រកួតកីឡាស៊ីហ្គេមលើកទី៣២ ឆ្នាំ២០២៣ដែលកម្ពុជាទទួលធ្វើជាម្ចាស់ផ្ទះ ៕
ចែករំលែកព័តមាននេះ