ខេត្តក្រចេះ ៖ រូបសំណាកទីងមោងធ្វើពីចំបើង និងកែច្នៃពីឧប្បករណ៍ ផ្សេងៗទម្រង់ជាមនុស្សត្រូវអ្នកភូមិរស់នៅភូមិគោលាប់ ស្រុកចិត្របុរី ដាក់ពីមុខរបងខាងមុខផ្ទះ រៀងៗខ្លួន ។ អ្នកភូមិធ្វើបែបនេះបន្ទាប់ពីមានមនុស្សប្រុស…
ខេត្តក្រចេះ ៖ រូបសំណាកទីងមោងធ្វើពីចំបើង និងកែច្នៃពីឧប្បករណ៍ ផ្សេងៗទម្រង់ជាមនុស្សត្រូវអ្នកភូមិរស់នៅភូមិគោលាប់ ស្រុកចិត្របុរី ដាក់ពីមុខរបងខាងមុខផ្ទះ រៀងៗខ្លួន ។ អ្នកភូមិធ្វើបែបនេះបន្ទាប់ពីមានមនុស្សប្រុស ស្រីក្មេងចាស់ជាច្រើននាក់ធ្លាក់ខ្លួនឈឺជាបន្តបន្ទាប់គ្នាក្នុងអំឡុងប៉ុន្មានខែមកនេះ ពោលគឺចាប់ពីអាកាសធាតុក្តៅខ្លាំងមក ។
អ្នកភូមិនិយាយកាលពីពេល ថ្មីៗកន្លងមកថា ពួកគាត់បាននាំធ្វើគ្នារូបទីងមោងចងដាក់តាមរបងផ្ទះ និងរៀងរាល់ពេលព្រលប់នាំគ្នាដុតភ្នក់ភ្លើងនៅចំច្រកចូលពីមុខផ្ទះ គឺជាកិច្ចធ្វើឡើង តាមជំនឿពីបុរាណ ។ ជំនឿនេះត្រូវពួកគាត់ធ្វើឡើងក្នុងគោលបំណងដើម្បីបណ្តេញខ្មោច ព្រាយ បិសាច និងអំពើឧបទ្រពចង្រៃចេញពីក្នុងភូមិ ខណៈសព្វថ្ងៃមានអ្នកនៅក្នុងភូមិ ក្មេង ចាស់ប្រុសស្រី កំពុងតែជួបបញ្ហាសុខសភាព ដូចជាជម្ងឺរាករូស ក្អួតចង្អោរ និងក្តៅខ្លួន ។
ស្ត្រីវ័យចំណាស់មួយរូបរស់នៅក្នុងភូមិគោលាប់ ដែលមុខផ្ទះមានចងរូបទីងដែរនោះ បានរៀបរាប់ឲ្យដឹងថា «មួយរយៈពេលចុងក្រោយនេះមានអ្នករស់នៅក្នុងភូមិជាច្រើននាក់ មិនថាក្មេង ឬចាស់ បានធ្លាក់ខ្លួនឈឺដោយជំងឺរាក និងក្អួត ។ អ្នកភូមិមិនបានគិតពីបញ្ហាសុខភាពអនាម័យក្នុងការរស់នៅនោះទេ ដោយគិតលើជំនឿអរូបិយថា ក្នុងភូមិកំពុងតែកើតមានជម្ងឺអាសន្នរោគ ។
បន្ទាប់ពីអ្នកភូមិបានជួបបញ្ហាសុខភាពបែបនេះ ពួកកាត់ជាអ្នកក៏ចាប់ផ្តើមអនុវត្តនូវជំនឿ នេះឡើង ។ ការអនុវត្តនេះអាចកាត់បន្ថយបានខ្លះនូវប្រភេទជំងឺអាសន្នរោគ តែក៏ត្រូវនាំអ្នកជំងឺទៅព្យាបាលនៅមន្ទីរពេទ្យដែរ »។
តបទៅនឹងការអនុវត្តបែបអរូបីនេះ ប្រធានមន្ទីរសុខាភិបាលខេត្ត លោកឈ្នាង សុវត្ថា បានថ្លែងអំពាវនាវឲ្យពលរដ្ឋ ដែលជួបបញ្ហាសុខភាពកើតមានជំងឺរាកក្អួត នៅក្នុងភូមិត្រូវប្រញាប់ទៅព្យាបាលនៅមណ្ឌលសុខភាព ឬមន្ទីរពេទ្យឲ្យទាន់ពេលវេលា ។
លោកឈ្នាង សុវត្ថា ថ្លែងថា «កន្លងមកនេះមុនរដូវប្រាំងមន្ទីរបានចាត់ឲ្យសហគមន៍ចុះផ្សព្វផ្សាយធ្វើការជូនដំណឹងដល់ប្រជាពលរដ្ឋឲ្យពួកគាត់យល់ដឹងពីការថែទាំសុខភាព និងឲ្យមានការប្រុងប្រយ័ត្ន ពីសុខភាពនារដូវប្រាំងក្តៅខ្លាំងនេះ ។ ជំងឺរាក ក្អួតចង្អោរ គឺងាយនឹងកើតមានទៅលើពលរដ្ឋនារដូវក្តៅ ខណៈការហូបចុករបស់ពួកគាត់មិនស្អាត ទទួលទានឆៅ និងអាហារជូរផ្អូមជាដើម» ៕
ចែករំលែកព័តមាននេះ