ខេត្តកែប ៖ រហូតមកដល់ពេលនេះ អាជ្ញាធរមិនទាន់យកមែកឈើដែលបាក់សង្កត់លើអាស្រមអ្នកតាក្រហម.កនៅឡើយទេ ដែលអ្នកភូមិបានប្រាប់ថា គឺជាប្រផ្នូលអាក្រក់មួយ ប្រសិនបើមិនជួយយកមែកឈើដ៏ធំនេះ ចេញពីលើអាស្រមអ្នកតា ។ ស្ត្រីអ្នកភូមិឈ្មោះ…
ខេត្តកែប ៖ រហូតមកដល់ពេលនេះ អាជ្ញាធរមិនទាន់យកមែកឈើដែលបាក់សង្កត់លើអាស្រមអ្នកតាក្រហម.កនៅឡើយទេ ដែលអ្នកភូមិបានប្រាប់ថា គឺជាប្រផ្នូលអាក្រក់មួយ ប្រសិនបើមិនជួយយកមែកឈើដ៏ធំនេះ ចេញពីលើអាស្រមអ្នកតា ។
ស្ត្រីអ្នកភូមិឈ្មោះ មិល មុំ អាយុ៣០ឆាំ្ន នៅភូមិកែប សង្កាត់កែប ក្រុងកែប បាននិយាយប្រាប់អ្នកយកព័ត៌មានកោះសន្តិភាព កាលពីព្រឹកថ្ងៃទី៣០ មេសា ថា មែកឈើដ៏ធំមួយមែកនេះ បានបាក់សង្កត់ទៅលើអាស្រមអ្នកតា នៅជាប់ផ្លូវចូលទៅក្រុមហ៊ុនបកសាច់ក្ដាម របស់លោក ឡាយ ផេង គឺបាក់តាំងពីមុនចូលឆាំ្នប្រពៃណីខ្មែរ រហូតមកដល់ដំណាច់ខែមេសានេះ ក៏នៅតែអាជ្ញាធរមិនទាន់ស្ទូចយកមែកឈើនោះចេញនៅឡើយទេ ។
ស្ត្រីអ្នកភូមិរូបនេះ និយាយទៀតថា ពេលដែលមែកឈើបាក់សង្កត់អាស្រមអ្នកតាក្រហមក ក៏បានគ្របលើផ្លូវបេតុងដែរ គាត់បានទាក់ទងទៅអាជ្ញាធរឱ្យជួយយកមែកឈើសង្កត់លើអ្នកតានោះចេញដែរ តែមិនមានការអើពើអ្វីសោះ ។ ស្ត្រីដដែលបានរៀបរាប់ថា អាស្រមអ្នកតាក្រហមកនេះ គាត់មើលតាំងពីឪពុកគាត់នៅរស់ តែឥឡូវឪពុកគាត់បានស្លាប់បាត់ទៅហើយ ប៉ុន្តែសព្វថ្ងៃនេះគាត់ជាកូនបានបន្តថែរក្សាដូចឪពុកខ្លួនអីុចឹង ព្រោះបានសុខសាន្តរហូតមក ។
គាត់និយាយថាមែកឈើដែលបាក់នេះវាគឺបាក់ដោយឯកឯង មិនមែនដោយសារមានភ្លៀងខ្យល់អីទេ ហើយមនុស្ស២នាក់ បានរងរបួសពេលដែលមែកឈើនោះបាក់ព្រោះជិះម៉ូតូបុកមែកដែលបាក់ ។ ស្ត្រីអ្នកភូមិក៏បានអំពាវនាវដល់អាជ្ញាធរ សូមមេត្តាជួយមកយកមែកឈើដ៏ធំនេះចេញពីអាស្រមផង ហើយបើតាមជំនឿ អ្នកតាបានឱ្យប្រផ្នូលអាក្រក់ដល់អ្នកភូមិផងដែរប្រសិនបើមិនមកជួយយកចេញទេនោះ ៕
ចែករំលែកព័តមាននេះ