ប្រទេសថៃ ៖ ៣ថ្ងៃមុនឡើងគ្រងរាជ្យជាផ្លូវការ ព្រះមហាក្សត្រថៃមហា វ៉ាជីរ៉ាឡុងកន បានបង្កើតភាពភ្ញាក់ផ្អើល ដោយប្រកាសពីការរៀបអភិសេកជាមួយព្រះជយាតាំងពីយូរមកហើយ ដែលត្រូវក្លាយជាព្រះមហាក្សត្រីយានី។ តាមទស្សនាវដ្ដីព្រះបរមរាជវាំង ដែលចេញផ្សាយកាលពីយប់ថ្ងៃទី១…
ប្រទេសថៃ ៖ ៣ថ្ងៃមុនឡើងគ្រងរាជ្យជាផ្លូវការ ព្រះមហាក្សត្រថៃមហា វ៉ាជីរ៉ាឡុងកន បានបង្កើតភាពភ្ញាក់ផ្អើល ដោយប្រកាសពីការរៀបអភិសេកជាមួយព្រះជយាតាំងពីយូរមកហើយ ដែលត្រូវក្លាយជាព្រះមហាក្សត្រីយានី។
តាមទស្សនាវដ្ដីព្រះបរមរាជវាំង ដែលចេញផ្សាយកាលពីយប់ថ្ងៃទី១ ឧសភា ២០១៩ នូវសេចក្ដីប្រកាសមួយថា ព្រះមហាក្សត្រអង្គនោះដែលធ្លាប់រៀបអភិសេក ពីមុនរួចមកហើយ និងមានការលែងលះគ្នា៣លើក បានរៀបអភិសេកជាផ្លូវការជាមួយព្រះនាងស៊ូធីដាវ៉ាជីរ៉ាឡុងកន ណាអាយូធីយ៉ា(SUTHIDA VAJIRALONGKORN NA AYUDHYA)។ ព្រះមហេសីព្រះអង្គជាអតីតអ្នកបម្រើតាមយន្តហោះ ដែលរួមរស់ជាមួយគ្នាចាប់តាំងពីច្រើនឆ្នាំមកហើយ។ ព្រះនាងស៊ូធីដាវ៉ាជីរ៉ាឡុងកន ចាប់ពីពេលនេះតទៅក្លាយជាព្រះមហាក្សត្រីស៊ូធីដា។
ពិធីរៀបអភិសេកនោះប្រព្រឹត្តទៅនារសៀលថ្ងៃទី១ ឧសភា នៅព្រះបរមរាជវាំងតុសិតក្រុងបាងកក ដោយនាឱកាសនោះព្រះមហាក្សត្រទ្រង់គ្រងឯកសណ្ឋានពណ៌ស រៀបអភិសេកជាមួយព្រះនាងស៊ូធីដា ដែលគ្រងរ៉ូបប្រពៃណីថៃផលិតពីសូត្រពណ៌ផ្កាកុលាប។ បន្ទាប់ពីនេះព្រះនាងត្រូវដំឡើងព្រះឋានៈជាព្រះមហាក្សត្រីយានី។
ត្រូវដំឡើងឋានៈជាឧត្ដមសេនីយកាលពីឆ្នាំ២០១៦ ព្រះនាងស៊ូធីដាតែងមានវត្តមាននៅអែបព្រះមហាក្សត្រ នាឱកាសពិធីផ្លូវការជាច្រើន។ ព្រះនាងពេលនេះត្រូវការពារដូចបណ្ដាសមាជិកគ្រួសាររាជវង្សឯទៀតៗដែរ ដោយច្បាប់ស្ដីពីការប្រមាថព្រះមហាក្សត្រ។
ព្រះនាងស៊ូធីដាវ៉ាជីរ៉ាឡុងកន ជាជយាទី៤ របស់ព្រះមហាក្សត្រថៃ។ ជយាទី៣ព្រះនាងស្រ៊ីរស្មី(SRIRASMI) បានរៀបអភិសេកជាសម្ងាត់កាលពីឆ្នាំ២០០១ ហើយត្រូវបានដកឋានៈចេញពីព្រះរាជវង្សក្នុងឆ្នាំ២០១៤។ ចាប់តាំងពីពេលនោះមកសមាជិកគ្រួសារបស់នារីជារាស្ត្រនោះច្រើននាក់ ត្រូវចាប់ដាក់គុកពីបទ ប្រមាថព្រះមហាក្សត្រ។
ព្រះមហាវ៉ាជារ៉ាឡុងកន បានឡើងលើរាជបល្លង្កកាលពីខែធ្នូឆ្នាំ២០១៦ ក្រោយពីព្រះបិតាចូលព្រះទិវង្គត។ ពិធីដ៏មហោឡារិកនៃការឡើងគ្រងរាជ្យសម្បត្តិជាផ្លូវការ ត្រូវប្រព្រឹត្តទៅចាប់ពីថ្ងៃទី៤ដល់ថ្ងៃទី៦ឧសភា នៅក្រុងបាងកក។ ពិធីឡើងគ្រងរាជ្យសុទ្ធត្រូវធ្វើនាថ្ងៃទី៤ឧសភា។ នាថ្ងៃទី៥ឧសភា ព្រះមហាក្សត្រនឹងគង់លើស្នែងពណ៌មាស ដែលកងយោធាសែងព្រះអង្គដង្ហែក្នុងចម្ងាយផ្លូវជាង៦គីឡូម៉ែត្រ នាភាគកណ្ដាលក្រុងបាងកក។ ថ្ងៃ្ងទី៦ឧសភាព្រះអង្គនឹងគង់នៅយ៉ព្រះបរមរាជវាំង ហើយទ្រង់ទទួលធ្វើសវនាកាជាមួយបណ្ដាអង្គទូតបរទេស៕
ចែករំលែកព័តមាននេះ