ខេត្តកំពង់ឆ្នាំង ៖ រថយន្តដឹកស៊ីម៉ង់ត៍មួយគ្រឿង បានផ្ទុះកង់មុខបណ្ដាលឲ្យឆេះស្ទើរទាំងស្រុង ខណៈ
កំពុងបើកបរលើផ្លូវជាតិលេខ៥ មកដល់ភូមិត្រពាំងចាន់ ឃុំត្រពាំងចាន់ ស្រុកបរិបូណ៌ កាលពីវេលាម៉ោងប្រមាណ១និង៣០ នាទីរសៀលថ្ងៃទី៣០ ខែមេសា ។
សមត្ថកិច្ចនគរបាលនៅកន្លែងកើតហេតុឲ្យដឹងថា រថយន្តដឹកស៊ីម៉ង់ត៍នេះ ធ្វើដំណើរពីខាងលិចទៅខាងកើត លុះមកដល់ចំណុចខាងលើដោយសារអាកាសធាតុក្តៅខ្លាំងពេក ស្រាប់តែផ្ទុះកង់មុខ ក្លាយជាអណ្ដាតភ្លើង ហើយក៏បានឆាបឆេះកាប៊ីនមុខតែម្តង ។ ភ្លាមៗនោះ អ្នកបើកបររថយន្តបានហក់គេចចេញរួចផុតពីគ្រោះថ្នាក់ ។
ប្រភពដដែលបន្តថា ក្នុងហេតុការណ៍ខាងលើនេះ រថយន្តពន្លត់អគ្គិភ័យរបស់អធិការដ្ឋាននគរបាលស្រុកបរិបូណ៌ចំនួន២គ្រឿង បានទៅជួយអន្តរាគមន៍បាញ់ទឹកពន្លត់ ប៉ុន្តែទោះជាយ៉ាងនេះក្តី រថយន្តបានឆេះខ្ទេចកាប៊ីនមុខស្ទើរទាំងស្រុងទៅហើយ ។
សមត្ថកិច្ចបញ្ជាក់ថា មូលហេតុមកពីអាកាសធាតុក្តៅខ្លាំងពេក ទើបបណ្ដាលឲ្យផ្ទុះកង់បែបនេះ ទោះបីជាបែបណាមិនមាននរណាម្នាក់រងរបួសទេ ប៉ុន្តែបណ្ដាលឲ្យស្ទះចរាចរណ៍អស់ជាង១ម៉ោងផងដែរ ៕
ចែករំលែកព័តមាននេះ