ឪពុកម្តាយគប្បីតាំងចិត្តថា អាត្មាអញត្រូវតែផ្ដល់ចំណេះវិជ្ជាដល់កូនៗ មិនត្រូវទុកឲ្យកូនល្ងង់ខ្លៅឡើយ ព្រោះថាវិជ្ជាហ្នឹងហើយជាទ្រព្យគាប់ប្រសើរចាយកាន់តែច្រើនចម្រើនកាន់តែណាស់គឺ យើងប្រឹងចាយយ៉ាងណាក៏មិនចេះអស់ មានតែរឹងរឹតចម្រើនឡើង។
ឪពុកម្ដាយខ្លះគួរឱ្យអាសូរណាស់គាត់មិនបានសិក្សារៀនសូត្រឱ្យមានចំណេះវិជ្ជាខ្ពង់ខ្ពស់នៅក្នុងខ្លួនទេ ដូច្នេះគាត់ត្រូវប្រកបរបរចិញ្ចឹមជីវិតដ៏លំបាកលំបិន និងមិនអាចចិញ្ចឹមកូនឲ្យបានសុខស្រួលឡើយ បញ្ហានេះគាត់ក៏គួរគិតថា នឹងមិនឲ្យកូនគាត់លំបាកដូចគាត់ឡើយ ។
ការយល់ឃើញជាវិជ្ជមានបែបនេះឪពុកម្តាយក៏ត្រូវព្យាយាមផ្ដល់ចំណេះវិជ្ជាដល់កូន ដោយចំណាយទ្រព្យមួយចំណែកសម្រាប់រៀនសូត្រតាំងពីបឋមសិក្សារហូតដល់ថ្នាក់ខ្ពស់ គឺជាការប្រសើរក្រៃលែង លើកវង្សត្រកូលឱ្យខ្ពង់ខ្ពស់ឡើង ។
នេះជាទឹកចិត្តដ៏ល្អរបស់ឪពុកម្ដាយត្រូវមានចំពោះកូន មិនត្រូវមើលងាយចំណេះវិជ្ជាថា មិនមានប្រយោជន៍នោះឡើយ ព្រោះសព្វថ្ងៃនេះបើមិនមានចំណេះវិជ្ជាគ្រប់គ្រាន់ទេ នឹងមិនអាចស្វែងរកការងារធ្វើបានឡើយ ។
អ្នកមានចំណេះវិជ្ជាខ្ពស់ ធ្វើការងារស្រួល បានប្រាក់ខែច្រើន ចំណែកអ្នកមិនមានចំណេះវិជ្ជាត្រូវធ្វើការងារដ៏លំបាករាល់ថ្ងៃក៏នៅតែមិនគ្រប់ ។
ចែករំលែកព័តមាននេះ