រាជធានីភ្នំពេញ ៖ អគ្គនាយកនៃអគ្គនាយកដ្ឋានពន្ធនាគារក្រសួងមហាផ្ទៃ លោកគួយ ប៊ុនសន បានមានប្រសាសន៍កាលពីព្រឹកថ្ងៃទី១១ មីនា ២០១១ ថា ទណ្ឌិតជនជាតិសៀមឈ្មោះវីរ៉ា ស៊ុមខ្វាមឃីត មិនអាចលើកលែងទោសបានទេ ពីព្រោះលោកវីរ៉ាស៊ុមខ្វាមឃីត មិនទាន់បានអនុវត្តទោសក្នុងពន្ធនាគារបាន២ភាគ៣នៅឡើយទេ ។ ប៉ុន្តែការលើកលែងទោសអាចធ្វើទៅបានល្គឹកណាតែលោកវីរ៉ាស៊ុមខ្វាមឃីត បានសារភាពថា ខ្លួនបានចូលក្នុងទឹកដីកម្ពុជាដោយខុសច្បាប់ និងប្រព្រឹត្តបទល្មើសចារកម្មដូចជាការចោទប្រកាន់នោះពិតប្រាកដមែន។
ការថ្លែងរបស់លោកគួយ ប៊ុនសន អគ្គនាយកនៃអគ្គនាយកដ្ឋានពន្ធនាគាររបស់ប្រទេសកម្ពុជាខាងលើនេះធ្វើឡើងបន្ទាប់ពីកាសែតថៃរ៉ាត់ របស់សៀមបានចេញផ្សាយកាលពីថ្ងៃទី១០ មីនា ម្សិលមិញថា ស្ថានទូតថៃប្រចាំនៅក្នុងប្រទេសកម្ពុជា នឹងនាំលិខិតសុំព្រះរាជទានទោសដល់ទណ្ឌិតវីរ៉ា ស៊ុមខ្វាមឃីត និងអ្នកទោសស្ត្រីម្នាក់ទៀតចុះហត្ថលេខាដើម្បីស្វែងរកការអភ័យទោសណាមួយពីកម្ពុជានៅវេលាថ្ងៃសុក្រ ទី១១ មីនា នេះ ។ កាសែតដដែលបានដកស្រង់សម្តីលោកឈួន នុនអុីកូម៉ាស៊ុត លេខាធិការនៃក្រសួងការបរទេសថៃនិយាយថា មេធាវីជនជាតិកម្ពុជាបានធ្វើសេចក្តីព្រាងលិខិតសុំព្រះរាជទានទោសជាភាសាកម្ពុជារួចរាល់ហើយ ។ លិខិតនេះត្រូវបានបញ្ជូនឱ្យស្ថានទូតថៃប្រចាំនៅកម្ពុជាបកប្រែជាភាសាថៃ ដើម្បីឱ្យវីរ៉ា ស៊ុមខ្វាមឃីត និងអ្នកស្រីរ៉ាទ្រី អាន ហើយនិងចុះហត្ថលេខានៅថ្ងៃសុក្រនេះ ។
លោកឈួន នុនអុីកូម៉ាស៊ុត លេខាធិការនៃក្រសួងការបរទេសថៃដដែលបាននិយាយទៀតថា បើគ្មានអត្ថន័យណាមួយត្រូវកែសម្រួលក្នុងខ្លឹមសារនៃលិខិតនោះទេ គេរំពឹងថា នឹងអាចបញ្ជូនលិខិតសុំព្រះរាជទានទោសនេះឱ្យដល់ក្រសួងការបរទេសកម្ពុជា ដើម្បីបញ្ជូនបន្តទៅក្រសួងយុត្តិធម៌ និងខុទ្ធកាល័យនាយករដ្ឋមន្ត្រីកម្ពុជានៅសប្តាហ៍ក្រោយនេះ ។
ថ្លែងតាមទូរស័ព្ទប្រាប់កោះសន្តិភាពនៅព្រឹកថ្ងៃសុក្រ ទី១១ មីនា ឆ្នាំ២០១១ នេះ លោកគួយ ប៊ុនសន អគ្គនាយកនៃអគ្គនាយកដ្ឋានពន្ធនាគារក្រសួងមហាផ្ទៃបានបញ្ជាក់ឱ្យដឹងដែរថា កាលពីថ្ងៃទី១០ មីនា ម្សិលមិញ លោកបានទទួលលិខិតថតចម្លងពីស្ថានទូតថៃប្រចាំកម្ពុជា ក្នុងការអនុញ្ញាតឱ្យទណ្ឌិតជនជាតិសៀមទាំង២នាក់នោះផ្តិតមេដៃ ដើម្បីរកការសុំលើេកលែងទោសនោះរួចហើយ ។ ប៉ុន្តែលោកបានបញ្ជាក់ថា លោកមិនទាន់បានទទួលលិខិតជាផ្លូវការពីក្រសួងការបរទេសថៃនោះនៅឡើយទេ ហើយថា ដរាបណាពុំមានលិខិតផ្លូវការ គឺមិនអនុញ្ញាតឱ្យអ្នកណាម្នាក់ចូលជួបដើម្បីឱ្យទណ្ឌិតទាំង២នាក់នោះផ្តិតមេដៃបានឡើយ៕
ចែករំលែកព័តមាននេះ