ជប៉ុនបានឆ្លុះបញ្ចាំងអំពីដំណើរការលូតលាស់នៃទំនាក់ទំនងកម្ពុជា-ជប៉ុន ហើយសន្យាលើកស្ទួយទំនាក់ទំនងនេះ ខណៈដែលព្រះចៅអធិរាជថ្មីបានឡើងគ្រងរាជ្យនៅថ្ងៃនេះ ។ លោក ហូរីណូអ៊ុជិ ហ៊ីដេហ៊ីសា ឯកអគ្គរាជទូតជប៉ុនប្រចាំព្រះរាជាណាចក្រកម្ពុជាបាននិយាថា «ខ្ញុំមានសេចក្តីសោមនស្សរីករាយដែលបានផ្ញើសារទៅកាន់ប្រជាជនកម្ពុជា នៅថ្ងៃទី០១…
ជប៉ុនបានឆ្លុះបញ្ចាំងអំពីដំណើរការលូតលាស់នៃទំនាក់ទំនងកម្ពុជា-ជប៉ុន ហើយសន្យាលើកស្ទួយទំនាក់ទំនងនេះ ខណៈដែលព្រះចៅអធិរាជថ្មីបានឡើងគ្រងរាជ្យនៅថ្ងៃនេះ ។ លោក ហូរីណូអ៊ុជិ ហ៊ីដេហ៊ីសា ឯកអគ្គរាជទូតជប៉ុនប្រចាំព្រះរាជាណាចក្រកម្ពុជាបាននិយាថា «ខ្ញុំមានសេចក្តីសោមនស្សរីករាយដែលបានផ្ញើសារទៅកាន់ប្រជាជនកម្ពុជា នៅថ្ងៃទី០១ ខែឧសភា ឆ្នាំ២០១៩ ដែលជាថ្ងៃឡើងគ្រងរាជ្យរបស់ព្រះករុណា ណារូហ៊ីតូ ព្រះចៅអធិរាជជប៉ុន ។»
លោកបាននិយាយរំលឹកថា ទំនាក់ទំនងរវាងព្រះរាជវង្សានុវង្សកម្ពុជា និងជប៉ុន បានចាប់ផ្តើមកំឡុងពេលព្រះរាជទស្សនកិច្ចរបស់ព្រះករុណាព្រះបាទសម្តេចព្រះនរោត្តមសីហនុព្រះមហាក្សត្រកម្ពុជាបានយាងទៅកាន់ប្រទេសជប៉ុន នៅឆ្នាំ១៩៥៣ ។ បន្ទាប់មកព្រះរាជវង្សានុវង្សនៃប្រទេសទាំងពីរបានយាងបន្តផ្លាស់ប្តូរទំនាក់ទំនងជាញឹកញាប់ ។ នៅឆ្នាំ២០១០ ព្រះករុណា ព្រះបាទសម្តេចព្រះបរមនាថនរោត្តមសីហមុនីព្រះមហាក្សត្រកម្ពុជាបានយាងព្រះរាជទស្សនកិច្ចផ្លូវរដ្ឋទៅកាន់ប្រទេសជប៉ុន ។
នៅខែមិថុនា ឆ្នាំ២០១២ នៅពេលព្រះករុណាណារូហ៊ីតូ នៅជាព្រះអង្គម្ចាស់រាជទាយាទព្រះអង្គក៏បានយាងព្រះរាជទស្សនកិច្ចមកកាន់ព្រះរាជាណាចក្រកម្ពុជា ។ កំឡុងពេលព្រះរាជទស្សនកិច្ចនេះព្រះករុណា ណារូហ៊ីតូ បានយាងគាល់ព្រះករុណាព្រះបាទសម្តេចព្រះបរមនាថ នរោត្តមសីហមុនី និងបានយាងជួបសវនាការជាមួយសម្តេចតេជោ ហ៊ុន សែន នាយករដ្ឋមន្ត្រីកម្ពុជា ព្រមទាំងបានយាងសំណេះសំណាលជាមួយនិស្សិតដេប៉ាតឺម៉ង់ ភាសាជប៉ុននៃសាកលវិទ្យាល័យភូមិន្ទភ្នំពេញ ។
ព្រះករុណា ណារូហ៊ីតូ ក៏បានយាងព្រះរាជទស្សនកិច្ចប្រាសាទអង្គរវត្ត និងប្រាសាទបាយ័នដែលជាអច្ឆរិយប្រាសាទរបស់ព្រះរាជាណាចក្រកម្ពុជា ក្នុងតំបន់វប្បធម៌ប្រវត្តិសាស្ត្រដ៏ល្បីល្បាញរបស់ពិភពលោក ។ ថ្ងៃនេះរជ្ជកាលថ្មី «Reiwa» នឹងចាប់ផ្តើម ។ ពាក្យ «Reiwa» មានន័យថា វប្បធម៌នឹងត្រូវបានរីកលូតលាស់ឡើងនៅពេលដែលដួងចិត្តរបស់ប្រជាជនរួមគ្នាជាធ្លុងមួយប្រកបដោយសុខុដុមរមនា ។ លោកទូតនិយាយថា «ខ្ញុំសង្ឃឹមថា នៅរជ្ជកាល Reiwa ប្រជាជនជប៉ុន និងកម្ពុជាបន្តលើកស្ទួយមិត្តភាព និងការផ្លាស់ប្តូរវប្បធម៌ទៅវិញទៅមក» ៕
ចែករំលែកព័តមាននេះ