ប្រទេសអុីរ៉ាក់ ៖ ជាលើកដំបូងក្នុងរយៈពេល៥ឆ្នាំក្រុមជីហាដរដ្ឋអ៊ិស្លាម កាលពីថ្ងៃទី២៩មេសា បានចេញផ្សាយវីដេអូមួយបង្ហាញប្រមុខដឹកនាំរបស់គេABOU BAKR AL BAGHDADI ក្រោយរយៈពេលជាងមួយខែនៃការដួលរលំទាំងស្រុង នៃកាលីហ្វាតរបស់ខ្លួន។…
ប្រទេសអុីរ៉ាក់ ៖ ជាលើកដំបូងក្នុងរយៈពេល៥ឆ្នាំក្រុមជីហាដរដ្ឋអ៊ិស្លាម កាលពីថ្ងៃទី២៩មេសា បានចេញផ្សាយវីដេអូមួយបង្ហាញប្រមុខដឹកនាំរបស់គេABOU BAKR AL BAGHDADI ក្រោយរយៈពេលជាងមួយខែនៃការដួលរលំទាំងស្រុង នៃកាលីហ្វាតរបស់ខ្លួន។
វីដេអូនោះពុំមានកាលបរិច្ឆេទនិងទីកន្លែងចេញផ្សាយឡើយ តែមនុស្សដែលបង្ហាញពិតជារូបរបស់ABOU BAKR AL BAGHDADI ដែលអះអាងពីការវាយប្រហារភេរវកម្មនានា ប្រឆាំងបណ្ដាព្រះវិហារកាតូលិក និងសណ្ឋាគារទាំងឡាយនៅស្រីលង្កាកាលពីថ្ងៃទី២១មេសា។
ជននោះក្នុងវីដេអូក៏ថ្លែងដែរថា ការប្រយុទ្ធដើម្បីទីក្រុងBAGHOUZពេលនេះត្រូវបានបញ្ចប់។ គេចង់និយាយដល់ក្រុងមួយនៅភាគខាងកើតសីុរី ដែលជាទីតាំងធំចុងក្រោយរបស់ក្រុមរដ្ឋអ៊ិស្លាម ឬដែនដីចុងក្រោយនៃកាលីហ្វាត។
ក្រសួងការបរទេសអាមេរិកបានសន្យាថាក្រុមចម្រុះប្រឆាំងជីហាដ នាំមុខដោយសហរដ្ឋអាមេរិក នឹងបន្តការប្រយុទ្ធដើម្បីតាមរកមេដឹកនាំ ក្រុមរដ្ឋអ៊ិស្លាមដែលនៅសល់យកមកកាត់ទោស។
ប្រកាសបង្កើតកាលពីឆ្នាំ២០១៤ដោយABOU BAKR AL BAGHDADIលើដែនដីកាន់កាប់ដ៏ធំនៅសីុរីនិងអីុរ៉ាក់ កាលីហ្វាតត្រូវបានប្រកាសថា លុបបំបាត់ទាំងស្រុងកាលពីថ្ងៃទី២៣មីនា ក្រោយបញ្ចប់ការវាយលុកធំមួយ របស់ពួកយុទ្ធជនអារ៉ាប់-ឃើត ជួយទ្រទ្រង់ដោយក្រុមចម្រុះអន្តរជាតិ ដណ្ដើមយកទីតាំងចុងក្រោយរបស់ពួកជីហាដនៅភាគខាងកើតស៊ីរី។
ក្នុងវីដេអូABOU BAKR AL BAGHDADIអះអាងថា ក្រុមរដ្ឋអ៊ិស្លាមនឹងសងសឹកឲ្យបណ្ដាសមាជិកដែលត្រូវសម្លាប់និងថា ការប្រយុទ្ធប្រឆាំងពួកលោកខាងលិចនឹងជាការប្រយុទ្ធប្រើពេលយ៉ាងយូរអង្វែងមួយ។ ជននោះក៏លើកពីភាពអង់អាចក្លាហានរបស់ពួកយុទ្ធជននៅBAGHOUZហើយលើកពីឈ្មោះរបស់ជនជីហាដបារាំង២នាក់គឺ FABIEN និងJEAN MICHEL CLAIN៕
ចែករំលែកព័តមាននេះ