ពួកបះបោរបច្ចុប្បន្នកំពុងលើកតម្រង់ទៅកាន់ទីក្រុង SYRTE ។ អង្គការអូតង់ប្រកាសថា ខ្លួនឡើងធ្វើមេបញ្ជាការរាល់ប្រតិបត្តិការយោធាដែលកំពុងធ្វើនៅលីប៊ីក្នុងពេលភ្លាមៗ។
កងកម្លាំងចំរុះលោកខាងលិចកាលពីថ្ងៃទី២៧ មីនា បានវាយប្រហារលើតំបន់ស៊ីវិល និងយោធាទាំងឡាយនៅទីក្រុងទ្រីប៉ូលី។ នេះជាការអះអាងរបស់អ្នកទទួលខុសត្រូវយោធាលីប៊ីមួយរូបដកស្រង់សំដីដោយទូរទស្សន៍លីប៊ី។ សាក្សីទាំងឡាយអះអាងប្រាប់ទីភ្នាក់ងារព័ត៌មានបារាំង AFP ថា ការវាយប្រហារតាមអាកាសតម្រង់លើផ្លូវថ្នល់ទៅកាន់ព្រលានយន្តហោះ (១០គីឡូម៉ែត្រពីកណ្តាលរដ្ឋធានី) និងតំបន់ AIN ZARAS ចម្ងាយ១៤គីឡូម៉ែត្រភាគខាងកើតពីកណ្តាលក្រុងទ្រីប៉ូលី។ ការបាញ់កាំភ្លើងការពារអាកាស DCA ត្រូវបានលាន់ឮក្នុងតំបន់ទាំង២នោះ។ កងយន្តហោះសម្ព័ន្ធមិត្តក៏ហោះហើរផងដែរពីលើទីក្រុង SYRTE ជាទីក្រុងកំណើតរបស់លោកកាដាហ្វី កាលពីយប់ថ្ងៃទី២៧ មីនា ។ ក្នុងទីក្រុងនោះស្ថិតនៅចន្លោះទីក្រុងទ្រីប៉ូលី និងបេនហ្គាហ្ស៊ីគេឮស្នូរផ្ទុះ២លើកយ៉ាងខ្លាំងនាវេលាម៉ោង២០។ កងការពារអាកាសពុំបានបាញ់ប្រហារឡើយនៅទីក្រុង SYRTE ទីក្រុងកំណើតរបស់លោកកាដាហ្វី ហើយជាទិសដៅវាយដណ្តើមយករបស់ពួកបះបោរលីប៊ី២ថ្ងៃក្រោយពួកគេរុលទៅមុខយ៉ាងលឿនឆ្ពោះទៅទិសខាងលិច។ ពួកនោះបានលើកទៅដល់ក្រុង OUKAILA នាថ្ងៃទី២៧ មីនា ហើយដណ្តើមកាន់កាប់ទីក្រុង RAS LANOUF ។ ទីតាំងប្រេងកាតនោះត្រូវបានកងទ័ពស្មោះត្រង់លោកកាដាហ្វីវាយដណ្តើមកាន់កាប់ពីពួកបះបោរកាលពីថ្ងៃទី១២ មីនា កន្លងមកនេះ។ កងយន្តហោះប្រដេញបារាំងនាថ្ងៃទី២៧ មីនា បានធ្វើការវាយប្រហារប្រឆាំងរថក្រោះលីប៊ីទាំងឡាយ និងឃ្លាំងគ្រាប់រំសេវសំខាន់មួយកន្លែងក្នុងតំបន់ MISRATA និង ZENTEN នៅភាគខាងលិចប្រទេស។ កាលពីថ្ងៃទី២៦ មីនា កន្លងមកនេះទីក្រុងយុទ្ធសាស្ត្រ AJDABIYA និង BREGA ភាគខាងកើតលីប៊ីត្រូវបានពួកបះបោរដណ្តើមយកបានហើយដែលនោះជាជោគជ័យដំបូងរបស់ពួកបះបោរក្រោយអន្តរាគមន៍របស់ពួកលោកខាងលិច ៕
ចែករំលែកព័តមាននេះ