នាង MARISOL VALLES និស្សិតស្រី​​ម្នាក់ដែល​​ត្រូវបាន​តែង​តាំង​ជា​ប្រមុខ​ប៉ូលិសក្រុង PRAXEDIS GUADALUPE GUER-RERO ជាទីក្រុង​​មួយ​មានប្រជាជន​​១០.០០០​នាក់ ស្ថិត​នៅ​​ភាគខាង​កើត​​រដ្ឋ CHIHUAHUA កាលពីខែតុលា​កន្លងមក​នេះ ព្រោះតែ​​គ្មាន​​នរណា​​ហ៊ាន​​ឈរឈ្មោះ​​ធ្វើប្រមុខ​​ប៉ូលិស​ទីក្រុងនេះ​ទីបំផុត​​នាង​បាន​សម្រេច​សុំ​សិទ្ធិ​ជ្រកកោន​​នៅ​​សហរដ្ឋអាមេ​រិក​​ ក្រោយ​ការ​​គំរាមកំហែង​​នានា​មក ។​
នាង MARISOL VALLES អាយុ​​២០​ឆ្នាំ បានទៅ​កាន់​សហរដ្ឋ​អាមេរិក​​ជាមួយ​សមាជិក​គ្រួសារ​​នាង​​២នាក់ ​ហើយបានស្នើ​​សុំ​សិទ្ធិជ្រក​កោន​​​ខាងនយោបាយ ​ពីព្រោះ​នាង​បាន​ទទួល​ការ​គំរាម​​សម្លាប់​​​​​ពីសំណាក់​ក្រុម​​​​​ឧក្រិដ្ឋ​​ជន​មួយ​ដែល​ចង់​​បង្ខំ​​នាង​ឱ្យធ្វើការ​​សម្រាប់​ក្រុមគេ​។
កាលពីខែ​តុលា​កន្លង​មក​នេះ នាង MARISOL និស្សិត​ខាង​ការ​សិក្សា​ឧក្រិដ្ឋ​កម្ម​នៅ​ទីក្រុង​ CIUDAD JUAREZ បានយល់ព្រម​​ទទួល​យក​អម្រែក​​ដ៏​​ធ្ងន់នេះ​ធ្វើ​មេ​​ប៉ូលិសទីក្រុង PRAXEDIS GUADALUPE GUER-RERO ដែល​​ពួក​ឧក្រិដ្ឋ​​ជនគ្រឿងញៀន​មាន​​អំណាច​ខ្លាំង​ ។ អភិបាល​​ក្រុង​នេះ និង​​កូន​ប្រុស​​​ត្រូ​វគេ​សម្លាប់​​ជាមួយគ្នា កាលពីខែ​​មិថុនា កន្លង​មក​នេះ​ ។
ការចាកចេញរបស់នាង MARISOL VALLES ទៅកាន់​សហរដ្ឋ​អាមេរិក កើតមាន​​ក្រោយពី​​ការចាប់​ពង្រត់​​កាលពី​ថ្ងៃទី​​​២៦ ធ្នូ នូវ​នាង ERIKA GANDARA ប៉ូលិសស្ត្រី​​តែម្នាក់​​គត់​នៃ​ភូមិ​​ជិត​ខាង​មួយ​របស់​​នាង​ រួច​នារី​ប៉ូលិស​​រូបនេះ​បាត់ខ្លួន​រហូត ។ ទីក្រុង CIUDAD JUAREZ ជាទីក្រុង​​សំខាន់​របស់​រដ្ឋ​ CHIHUAHUA មាន​ប្រជាជន​​១លាននាក់ នៅ​ជាប់​​ព្រំដែន​​អាេមរិក ​​​មាន​អំពើ​​ហិង្សា​​ខ្លាំង​ជាង​គេ​បំផុតនៅ​​ម៉ិចស៊ិក​​ជាមួយ​មនុស្ស​ស្លាប់ជាង​​​៣.១០០​នាក់ ​កាលពី​ឆ្នាំ​២០១០ ៕